Ирбэт тоҥҥо сокуону көҕүлээһини өйөөтүлэр

“Экология” форум Уопсастыбаннай сэбиэтигэр Россия Федерациятын 67 субъегыттан 158 киһи чилиэнинэн буолар – бу былаас регионнааҕы уорганнарын, коммерческайа суох уопсастыбаннай тэрилтэлэр, экологическай хайысхалаах тэрилтэлэр, сонуну тарҕатар сириэстибэлэр бэрэстэбиитэллэрэ.

Ил Түмэн спикерэ 2017 сыл кулун тутар 21 күнүгэр буолбут VIII Норуоттар икки ардыларынааҕы “Экология” форум Резолюциятын толорор сыалтан, Саха сирин парламена “Ирбэт тоҥу харыстааһын уонна сөптөөхтүк туһаныы туһунан” федеральнай сокуон барылын оҥорбутун Уопсастыбаннай сэбиэккэ иһитиннэрдэ.
“Ирбэт тоҥу харыс­тааһын уонна сөптөөхтүк ту­һаныы туһунан” сокуон барылыгар ирбэт тоҥ туругар сабыдыаллыыр өрүттэри судаарыстыба өттүттэн регистрациялааһыны итиэннэ кинилэр дьайыыларын таһымын кэмиттэн кэмигэр учуоттааһыны киллэрии туһунан этиллэр. Докумуоҥҥа мониторинг итиэннэ судаарыстыба уонна уопсастыба кэтээн көрүүтүн механизмнарын бэрээдэгэ быһаарыллыбыттар, ирбэт тоҥҥо дьайыыны нуормалыыр уонна толуйар, ирбэт тоҥу харыстааһын эйгэтигэр сокуону кэһии иһин эппиэтинэһи киллэрэр туһунан этии оҥоһуллар.
Ил Түмэн спикерэ Александр Жирков этиитин дьүүллэһии кэмигэр Уопсастыбаннай сэбиэт чилиэннэрэ, ол иһигэр Госдума экологияҕа уонна тулалыыр эйгэни харыстааһыҥҥа кэмитиэтин бэрэссэдээтэлин бастакы солбуйааччыта, “Экология” форум Уопсастыбаннай сэбиэтин бэрэссэдээтэлэ Николай Валуев тус бэйэтинэн Саха сирин парламенын көҕүлээһинин өйөөтүлэр.

Бу иннинэ алтынньы 11 к. Салехард куоракка буолбут Уһук Хоту сир оройуоннарыгар уонна онно тэҥнэниллибит сирдэргэ олохсуйбут РФ субъектарын сокуону оҥорор уорганнарын салайааччыларын сүбэ мунньаҕын кыттыылаахтара ити сокуон барылыгар өйөбүлү биллэрбиттэрэ. Итини сэргэ Камчаткатааҕы Петропавловскай куоракка быйыл алтынньы 4 к. буолан ааспыт “Уһук Илин уонна Забайкалье” Парламеннар Ассоциацияларын Уопсай мунньаҕар Уһук Илиҥҥи федеральнай уокурук субъектарын сокуону таһаарар уорганнарын салайааччылара эмиэ ити сокуон барылын өйөөбүттэрэ.
Саха сирин парламена сокуон барылын көрүүгэ таһаарыыга үлэтин салгыыр. “Ирбэт тоҥу харыстааһын уонна сөптөөхтүк туһаныы туһунан” сокуон барылын өйөөбүт РФ субъектарын Сокуону оҥорор мунньахтарын ахсаана улаата турар.