Петр Гоголев: тулалыыр эйгэҕэ ноҕурууска аччыыр

Судаарыстыбаннай Мунньах (Ил Түмэн) бэрэссэдээтэлэ Петр Гоголев атырдьах ыйын 6 к. «Вызов-кузов» акцияҕа кытынна. Бу күн Дьокуускай куорат Сайсаар уокуругун Широких-Полянскай уулуссатыттан  хаһаайыннара бырахпыт хас да массыына дьардьаматын тиэйдилэр.

Бу акция түөрт сыл анараа өттүгэр – 2015 сыл муус устар 10 к. саҕаламмыта, оччолорго Дьокуускай баһылыгын куорат хаһаайыстыбатыгар солбуйааччыта Дмитрий Садовников уонна Саха эстрадатын сулуһа Далаана бэйэлэрин тус холобурдарынан “Вызов-кузов” экологическай акцияны саҕалаабыттара.

Ол кэмҥэ Дзержинскэй уулуссатын 50/4 нүөмэригэр турар 2 этээстээх олорор дьиэ олбуоруттан уонна Покровскай суолун 9-с килэмиэтиригэр баар күөх зонаттан анал техника көмөтүнэн 3 быраҕыллыбыт массыына кузова уонна гаас билиитэтин эргэ куорпуһугар тиийэ араас тимир тобоҕо тиэйиллибиттэрэ.

Салгыы ити эстафетаны салайар тэрилтэлэр үлэһиттэрэ, култуура деятеллэрэ, бизнесменнэр уонна да атын куорат көхтөөх олохтоохторо иилэ хабан ылбыттара.

Саха сирин парламенын спикерэ Петр Гоголев иһитиннэрбитинэн, акция ыытыллыбытын тухары номнуо 700-тэн тахса кузов тиэйиллибит.

«Ити акция түмүгэр тулалыыр эйгэҕэ олус улахан ноҕурууска уһулунна, кутталлаах түгэннэр аҕыйаатылар. Мин кэллиэгэм – Дьокуускай куорат Думатын бэрэссэдээтэлэ Альберт Семенов бэс ыйын 20 к. миэхэ “ыҥырыы” бырахпыта, манна кыттыым онтон төрүөттээх, онон бүгүн, быыбардаммыт Университеттааҕы уокурукпуттан массыыналар кузовтарын тиэйэн илдьиэхпит. Бэйэм өттүбүттэн салгыы Дьокуускай куорат Думатыгар үлэлиир кэллиэгэлэрбэр, чуолаан депутаттар Степан Павловка, Софрон Новгородовка уонна Алексей Осиповка “ыҥырыы” тиэрдиэхпин баҕарабын, – диэн кэпсээтэ Ил Түмэн спикерэ.