Албыннаатыҥ — ыстараабы төлөө

Табаары  ким,  хаһан  уонна  ханна  оҥорбутун ыйбатаххына

Юридическай сирэйдэр эбэтэр биирдиилээн предпринимателлэр оҥорон таһаарааччы эбэтэр быһаччы толорооччу туһунан иһитиннэриитэ суох табаары атыы­лыыр эбэтэр өҥөнү оҥорор буоллахтарына, оччоҕуна дуоһунастаах сирэйдэргэ ыстараап суумата 30-40 тыһыынча солкуобай буолуоҕа, оттон юридическай сирэйдэргэ – 300-400 тыһ. солк. Оттон билигин ити кэһии иһин дуоһунастаах сирэйдэр муҥутаан 4 тыһ. солк. төлүүллэр, юридическай сирэйдэр – 40 тыһ. Табаар сертификатын эбэтэр декларациятын туһунан сибидиэнньэлэри ыйбакка эрэ атыылааһын иһин дуоһунастаах сирэйгэ ыстараап муҥутуур кээмэйин 30 тыһ. солк. диэри үрдэтиэхтэрэ. Итинник дьайыыны оҥорбут юридическай сирэйдэргэ 300-400 тыһ. солк. буолуон сөп. Билигин накаастабыл муҥутаан 300 тыһ. тэҥ.

Роспотребнадзор дааннайдарынан, туһанааччылары албыҥҥа үктэтии сүнньүнэн чэпчэки бырамыысыланнас бородууксуйатыгар бэлиэтэнэр. Ол курдук, кулун тутар ый туругунан, биэдэмистибэ 11,7 тыһ. араас эргиэн туочукаларын бэрэбиэркэлээбит. Кэһиилэри маҕаһыыннар 80-тан тахса бырыһыаннарыгар булбуттар. Чэпчэки бырамыысыланнас (тас таҥас, атах таҥаһа, ис таҥас, түүлээх таҥас уо.д.а.) бородууксуйатын барыта 200-тэн ордук партията бэрэбиэркэлэммит. Онтон 81 тыһ. тахса партия техническэй нуормаларга сөп түбэспэтэх.

Кэһиилэр үгүстэрэ маркировка уонна докумуоннар ирдэбиллэрин тутуспаты кытта сибээстээхтэр. Ол курдук, чэпчэки бырамыысыланнас бородууксуйатын ирдэбилгэ эппиэттээбэт партияларын 74 бырыһыана Кытайга оҥоһуллубут. Онтон ураты таҥаһы, атах таҥаһын ханна оҥорон таһаарбыттара биллибэт, табаардарга оҥорон таһаарааччы кода, маркировката суох эбит. 20 бырыһыаныгар арыаллыыр докумуоннара сөп түбэспэттэр. “Ити бородууксуйа контрафакт буолуон сөбүн туоһулуур”, — диэн ааҕаллар Роспотребнадзорга.

“Бүгүҥҥү күҥҥэ, экспердэр сыанабылларынан, туһанааччы ырыынагар бородууксуйа сокуоннайа суох эргиирин кээмэйэ 2,5 триллион солкуобай таһымынан ааҕыллар, — диэн Бырамыысыланнаска уонна эргиэҥҥэ министиэристибэ баһылыгын солбуйааччы Виктор Евтухов быһаарда. – Бу бытархай атыы-эргиэн 9 бырыһыаныгар итиэннэ бытархай эргиэн ырыынактарын атыытын 15 бырыһыаныгар чугаһыыр (аһылык бородуукталара, арыгы, табах, чэпчэки бырамыысыланнас оҥоһуктара, ол иһигэр спортивнай таҥас, парфюмерия уонна косметика, дьахтар уонна оҕо гигиенатын тээбириннэрэ, эти-сиини ыраастыыр, сууйар-сотор сириэстибэлэр)”.