Бастакы 3 850 тонна таас чох тимир суолунан ыытылынна

Сэтинньи 7 к. Нерюнгри оройуона уонна Нерюнгри куорат төрүттэммиттэрэ 40 сылыгар аналлаах официальнай үөрүүлээх тэрээһиннэр «Инаглинскай» хайа-байытар комплекс тиэйэр тимир суолун станциятын аһыыттан уонна таас чохтоох бастакы маршруту ыытыыттан саҕаланнылар.
Официальнай делегация састаабыгар бу тэрээһиҥҥэ СӨ Судаарыстыбаннай Мунньаҕын (Ил Түмэн) Бэрэссэдээтэлэ Александр Жирков, парламент вице-спикерэ Ольга Балабкина, Ил Түмэн сис кэмитиэттэрин бэрэссэдээтэллэрэ Василий Местников, Юрий Николаев, Александр Романов, Александр Корякин, народнай депутаттар Сергей Павлов, Виктор Станиловскай, Александр Александрович Дудников, Александр Кошуков кытыннылар.
«Инаглинскай» ХБК тиэйэр тимир суолун станцията – бу 5 км ордук тимир суол, орто кылаастаах 3 муоста, 5 ууну аһарар турба, «Лена» М-56 федеральнай массыына суолун аннынааҕы суол провода, 4 быстах кэмнээх ууну аһарар турбалар.

Тиэйэр станцияны аһыы уонна таас чохтоох бастакы маршруту ыытыы үөрүүлээх тэрээһинигэр «Колмар» Салайар хампаанньа» ХЭТ генеральнай директора Сергей Цивилёв сыл анараа өттүгэр баара-суоҕа биир эрэ объект тутуллубутун санатта. «Бүгүн көрөрбүт барыта биир сыл иһигэр өрөспүүбүлүкэ уонна РФ Бырабыыталыстыбатын күүстээх өйөбүлүнэн биһиги коллективпыт күүһүнэн оҥоһулунна. Тимир суол станциятын тутууга судаарыстыбаннай-чааһынай бииргэ үлэлээһин программата олоххо киирдэ, эмиэ итинник механизм электрическэй уот линияларыгар туһаныллар. Биһиги бэртээхэй куораппыт үбүлүөйүгэр анаммыт үлэбитинэн киэн туттабыт», – диэн бэлиэтээтэ Сергей Цивилёв.
«Саха сирин соҕуруу өттүн территориальнай оҥорон таһаарар комплексын промышленнай баһылааһын кэскилэ Саха сирин соҕуруу өттүн картатыгар ойууланыаҕыттан ыла 40 сыл ааста, – диэн бэлиэтээтэ Ил Түмэн спикерэ Александр Жирков уонна билигин «Саха сирин соҕуруу өттүн промышленнай баһылааһыны уочараттаах сөргүтүү» саҕаламмытын эбэн эттэ. Спикер «Колмар» Салайар хампаанньа таас чоҕу хостооччуларыгар ситиһиилээх үлэни баҕарда. «Этэр тыл дьыаланы кытта арахсыбатыгар уонна оҥорон таһаарыыга үчүгэй көрдөрүүлэринэн бигэргэтиллэригэр, дьон манна олохсуйарыгар, кинилэр санаалара бөҕөх уонна сарсыҥҥы күҥҥэ эрэллээх буолалларыгар баҕарабын», – диэтэ Александр Жирков.
Федерация Сэбиэтин оборонаҕа уонна куттал суох буолуутугар кэмитиэтин чилиэнэ, ФС иһинэн Арктикаҕа уонна Антарктикаҕа Сэбиэт бэрэссэдээтэлэ Вячеслав Штыров дойду экономикатыгар уустуктар баалларын үрдүнэн, Саха сирин соҕуруу өттө сайдарын бэлиэтээтэ. Кини судаарыстыбаннай-чааһынай бииргэ үлэлээһин механизмын туһаныы үтүө холобурунан буолбутун эттэ. «Колмар» хампаанньа Саха сиригэр биир бастыҥ хостуур тэрилтэнэн буоларыгар баҕарда.
Саха сирин Бырабыыталыстыбатын бэрэссэдээтэлин бастакы солбуйааччы Павел Маринычев: «Бу тэрилтэ ситиһиилээх үлэтин түмүгэр Саха сиригэр 2300 кэриҥэ саҥа үлэ миэстэтэ үөскэтиллиэҕэ, оттон «Колмар» хампаанньаларын бөлөҕүн туһунан этэр буоллахха – бу номнуо 4 тыһ. үлэ миэстэтэ», – диэтэ. Нерюнгри оройуонун баһылыга Андрей Фитисов сокуону оҥорооччуларга туһаайан, муниципальнай-чааһынай бииргэ үлэлээһин механизмын ылынар кыаҕы көрөллөрүгэр эттэ.
«Инаглинскай» хайа-байытар комплекс тиэйэр тимир суолун станциятын үлэҕэ киллэрэр уонна таас чохтоох бастакы маршруту ыытар бочуоттаах быраап Саха сирин Бырабыыталыстыбатын бэрэссэдээтэлин бастакы солбуйааччыта Павел Маринычевка, Нерюнгри оройуонун баһылыга Андрей Фитисовка, «Колмар» хампаанньа генеральнай директора Сергей Цивилёвка уонна «Саха сирин тимир суоллара» АК ААО генеральнай директорын эбээһинэһин толорооччу Владимир Магдичка бэрилиннэ. Саҥа тиэйэр станцияттан бастакы 3 850 тонна таас чох ыытылынна.