Дьиҥнээх Кэбээйи балыгын ким атыылыырый?

Балыксыттар араас ыйытыыларыгар Ил Түмэн бэрэссэдээтэлин солбуйааччы Виктор Губарев, парламент сис кэмитиэттэрин бэрэссэдээтэллэрэ Василий Местников, Дмитрий Саввин, Елена Голомарёва, СӨ Бырабыыталыстыбатын бэрэссэдээтэлин бастакы солбуйааччы Пётр Алексеев, Росрыболовство Өлүөнэтээҕи территориальнай управлениетын салайааччыта Олег Кузьмин, тыа хаһаайыстыбатыгар уонна ас-үөл политикатыгар миниистири солбуйааччы Сталик Дерягин, Арктика дьыалаларыгар Судаарыстыбаннай кэмитиэт салайааччытын бастакы солбуйааччы Иван Павлов уо.д.а. хоруйдаатылар.
Дьүүлгэ турбут биир проблеманан суобаһа суох күрэстэһиини туоратыы буолла. Хомойуох иһин, балык хаһаайыстыбатыгар эмиэ бу кыһалҕа баар. Дьокуускай куоракка ханна барытыгар Кэбээйи уонна Ньидьили дэнэр собо балыгы атыылыыллар. Ол эрээри атыылаһар собоҥ аатырбыт Ньидьили күөл балыга буоларын бэрэбиэркэлиир кыаҕыҥ суох. Оттон быйылгыттан ыла ону итэҕэйэр кыах көстөр буолла.

Балыксыттар мунньахтарыгар Кэбээйи улууһун Арыктаах нэһилиэгин «Чараҥ» тыа хаһаайыстыбатын оҥорон таһаарар кооперативын бэрэстэбиитэлэ иһитиннэрбитинэн, «Чараҥ» ТХПК интеллектуальнай бас билиигэ Федеральнай сулууспаҕа (Роспатент) «Кобяйский карась. Кэбээйи собото» уонна «Ниджилийский карась. Ньидьили собото» диэн табаар бэлиэлэрин регистрациялаабыт. Быйыл сайын балыксыттар ити бренд судаарыстыбаннай регистрацияны ааспытын туһунан бигэргэтиини туппуттара. Онон «Кобяйский карась. Кэбээйи собото» уонна «Ниджилийский карась. Ньидьили собото» табаар бэлиэлэрин бас билэр бырааптааҕынан Кэбээйи улууһун Арыктаах сэлиэнньэтиттэн «Чараҥ» ТХПК буолар. Оттон бу кооператив балыктаабатах балыга «Кэбээйи собото» диэн суруктаах атыыланарыгар сокуоннай бырааба суох. Эбэн эттэххэ, балыксыттар патеннары ылыыларыгар норуот депутата Владимир Членов салайааччылаах Атыы-эргиэн-промышленнай палаататыгар көмөлөстүлэр.
Табаар бэлиэтин ылыы – дьыала аҥаара, оттон ол үлэлиирин туһугар тугу оҥоруохха сөбүй? «Чараҥ» ТХПК бэрэстэбиитэлэ итини хайдах ситиһиэххэ сөбүн ыйытта. «Кэбээйи балыгын көрүҥүнэн балыгы атыылыылларын бэйэм көрдөхпүнэ хайыыбыный? Биһиги сокуоннай бырааппытын ким көмүскүөхтээҕий? Кинилэргэ чугаһаан: «Бу биһиги табаарбыт бэлиэтэ. Тоҕо онон туһанаҕыт?» – диэн этэбин дуо?» – диэн туоһуласта кини.
Тыа хаһаайыстыбатыгар уонна ас-үөл политикатыгар миниистири солбуйааччы Сталик Дерягин боппуруоһу суут бэрээдэгинэн быһаарыахха сөп диэтэ. «Проблема баар. Собо – бу ураты бородуукта, хас биирдиитигэр бэчээт уурбаккын уонна хас биирдии балыгы кумааҕыга суулуур кыаллыбат. Быһаарыыта – суут нөҥүө эрэ. Атыылааччылартан балык бородууксуйатыгар докумуоннары ыйытан, чуолкайдаан баран, докумуоннары суукка ыытыахха наада», — диэтэ кини.
Табаар бэлиэлэрэ суобаһа суох күрэстэһиини туоратыыга, намыһах хаачыстыбалаах уонна атын ханнык эмэ көрдөрүүлэринэн дьиҥнээх бэлиэтигэр сөп түбэспэт табаардары, өҥөлөрү сокуоннайа суох батарыыны тохтотууга көмөлөөхтөр. Табаар бэлиэтигэр быраабы кэһээччини эппиэтинэскэ тардыахха сөп, ол эбэтэр патеннары бас билээччилэр бырааптарын федеральнай сокуоннар көмүскүүллэр – «О товарных знаках, знаках обслуживания и наименованиях мест происхождения товаров» Федеральнай Сокуон, РФ Холуобунай уонна Гражданскай кодекстара.
Табаар бэлиэлэрин регистрациялааһын түмүгэр хортуоппуй барыта Сиинэ уонна Өлүөхүмэ киэнэ, ынах арыыта – Таатта, убаһа этэ – Чурапчы, үрүҥ балык – Индигиир киэнэ буолалларын тохтотор ситиһиллиэн сөп.

Ил Түмэн пресс-сулууспатын
матырыйаалынан.