Инвестиция боппуруостарыгар

Егор Борисов инвестициялары тардыыга туһуламмыт нуормалаах-правовой база өрөспүүбүлүкэҕэ бэлэмнэммитин, ол эрээри систиэмэлээх үлэ өссө даҕаны тиһэҕэр тиэрдиллэ илигин бэлиэтээтэ. Тас бэлитиичэскэй быһыы-майгы уустугун үрдүнэн, инвестицияны тардыы эйгэтигэр өрөспүүбүлүкэ куһаҕана суох туруктаах диэн этиэххэ наада.

«Саха сирин экэниэмикэтигэр туһу­ламмыт хаачыстыбалаах инвес­тициялары тардыахтаах сайдыы саҥа тииптээх үнүстүүтэ биһиэхэ наада. Аныгы технологиялары олохтооһун, квалификациялаах каадыры тардыы уонна биисинэс-процесстары көдьүүстээхтик салайыы соруктарын ситиһиэхтээхпит», — диэтэ Ил Дархан.

Корпорация генеральнай дириэктэрэ Геннадий Алексеев өрөспүүбүкэ са­лал­­татыгар эрэгийиэн инвестицияны тардыыга кэрэхсэбиллээх буолуутун кэнсиэпсийэтин билиһиннэрдэ. Генеральнай дириэктэр Ил Дархан этиилэрин кытта толору сөбүлэһэрин биллэрдэ. «Инвестициялаах үлэни-хамнаһы ыытарга, — диэтэ кини, — сиһилии уонна дириҥник ырытан оҥоһуллубут суол каартата суох, инвестициялары тардыы систиэмэтигэр ону киллэрбэккэ эрэ, ситиһиини кэтэһэр кыаллыбат».

Геннадий Алексеев сүрүн күүһү кутталлаах балаһыанньа бары факторын уонна иэрэҥ-саараҥ буолуу майгытын кыччатыыга уурарга суоттанар. Уруттата тутуллар соруктарга хапытаалынай тутуу эбийиэктэригэр туһуланар бюджет инвестицияларын көдьүүстэрин үрдэтии киирэр. Ол иһигэр судаарыстыбаннай-чааһынай кыттыгастаах буолуу мэхэ­ньиисимнэрин олохтооһун соруга эмиэ учуоттанар.

Сүбэ мунньах түмүгүнэн, корпо­ра­цияны капитализациялааһын мэхэньии­симин оҥорууга, өрөспүүбүлүкэ инвестициялаах стратегиятын чопчу­лаа­һыҥҥа, ааксыйалаах инвестициялаах декларациятын ырытан оҥорууга туһу­ламмыт бырайыак бэлэмнэннэ.

СИА.