Киллэм хотонугар сүөһүлэр баайыллыбакка иитиллиэхтэрэ

Дьокуускай таһынааҕы сэлиэнньэҕэ соторутааҕыта «Сахаплемхолбоһук» ААО сүөһү иитэр комплекса киллэриллибитэ, манна билигин 200 төбө племенной сүөһү турар. Бырайыак сакаасчытынан уонна инвесторынан «Туймаада-лизинг» ААО буолар, бэдэрээтчитинэн – «Айтал» ХЭТ.
Саҥа объект аныгы ирдэбиллэргэ эппиэттиир, салгылатар тэрилинэн, гааһынан сылытыынан, илии үлэтин солбуйар технологияларынан уонна техниканан хааччыллыбыт. Ону ааһан оборудованиета олохтоох усулуобуйаларга сөптөөх, онон, үлэһиттэрэ этэллэринэн, эрэллээх. Оҥорон таһаарыы уратытынан сүөһүнү баайбакка эрэ иитии технологиятын туһаныы буолар.

«Комплекска салгына үчүгэй, сиигэ суох. Техника барыта кэм ирдэбиллэригэр эппиэттиир. Новосибирскай уобаластан аҕалыллыбыт сүөһүлэр ветеринардар кэтэбиллэригэр карантиҥҥа бааллар. Кинилэр олохтоох усулуобуйаларга уонна аһылык уратыларыгар үөрэниэхтэригэр диэри 2-3 сыл ирдэнэр. Байтаһын ынахтар искусственнай сиэмэлээһини ааспыттар, онтон төрүөҕү кэлэр сыл кулун тутарыгар-муус устарыгар күүтэбит», — диэн кэпсээтэ ыалдьыттарга сүөһү иитэр комплекс салайааччыта Лидия Захарова уонна ынахтары массажтыыр тэрилгэ болҕомтону туһаайда.
Специалистар этэллэринэн, бу хара-эриэн ынах боруодатын үүтүн сыата 3,8-4% тиийэр, үүтү ыаһын – 5,6-6 тыһ. лиитирэ.
Саҥа комплексы билсиһии кэнниттэн Дьокуускай тулатынааҕы сирдэр уонна агропромышленнай курдааһын сайдыыларын боппуруостара дьүүллэһилиннилэр. Манна тыа хаһаайыстыбатын миниистирэ Александр Артемьев, «Дьокуускай куорат» куорат уокуругун» баһылыга Айсен Николаев, «Сахаплемхолбоһук» ААО директора Степан Охлопков, о.д.а. кытыннылар.
Тутаах быһаарыллыахтаах боппуруостарынан оҥорон таһаарыыга кэлимсэ сыһыаны киллэрии, сүөһү аһылыгын базатын тупсарыы бэлиэтэннилэр.
Александр Жирков эдэр специалистары тардыыга уонна кинилэри көҕүлээһиҥҥэ болҕомтону тарта.
«Сахаплемхолбоһук» ААО директора Степан Охлопков бэлиэтээбитинэн, коллективка 10 эдэр специалист кэлбит, ол иһигэр Новосибирскайдааҕы аграрнай университеты уонна Дьокуускайдааҕы тыа хаһаайыстыбатын академиятын бүтэрбиттэр.
Егор Борисов СӨ Тыа хаһаайыстыбатыгар уонна ас-үөл политикатыгар министиэристибэтэ эдэр үлэһиттэргэ олохтоммут бэрээдэгинэн 3 сыл устатыгар сүрүн хамнастарыгар 15 тыһ. солк. кээмэйинэн хас ый аайы стипендияны төлөөһүнү хааччыйарыгар уонна бу комплекс специалистарыгар анаан 4 квартиралаах олорор дьиэни тутар кыаҕы көрөрүгэр сорудахтаата.

Ил Түмэн пресс-сулууспата.