825
19 июня 2015 в 16:07
Өлөөн нэһилиэнньэтэ лицензиялаах үлэлэри тохтоторо ситиһилиннэ
Сири-уоту промышленнай баһылааһын историятыгар аан бастаан нэһилиэнньэ лицензиялаах үлэлэри тохтоторо ситиһилиннэ. Ол курдук Өлөөн улууһугар Аччыгый Куонапкаҕа үлэлэр тохтотулуннулар. «Бу лицензия ирдэбилин тохтотууну общественность ситиспит бастакы түгэнэ», — диэн айылҕа харыстабылын миниистирэ Сахамин Афанасьев Ил Түмэн Хоту сир аҕыйах ахсааннаах норуоттарын боппуруостарыгар уонна Арктика дьыалаларыгар сис кэмитиэтин бэрэссэдээтэлэ Елена Голомарева ыйытыытыгар хардарда.
Елена Голомарёва санаппытынан, 2015 с. кулун тутар 23 к. буолбут общественнай истиилэргэ Өлөөн улууһун Дьэлиҥдэ нэһилиэнньэтэ «Анаабыр алмаастара» ААО Аччыгый Куонапкаҕа геологическай уонна хостуур үлэлэри ыытарын биир киһи курдук утарбыта. Түөрт учаастак талыллыбытыттан, үс учаастагар нэһилиэнньэ сөбүлэҥин биэрбитэ. Аччыгый Куонапка Дьэлиҥдэ нэһилиэгэр ыраас иһэр ууну хааччыйар, бултуур, балыктыыр соҕотох өрүс ситиминэн буолар. Ону сэргэ төрүт нэһилиэнньэ бу өрүскэ ытык сиргэ курдук сыһыаннаһар, онон промышленнай баһылааһыҥҥа сөбүлэҥин биэрбэтэҕэ.
Елена Христофоровна Усуйаана, Өймөкөөн уонна Муома улуустарыгар кыһыл көмүс хостуур хампаанньалар үлэлэрин түмүгэр өрүстэргэ, үрэхтэргэ мөлтөх дьайыы баара биллибитин эттэ. Миниистир вертолету туһанан киһи кыайан тиийбэт ыраах промышленнай учаастактары айылҕа харыстабылын, айылҕаны харыстыыр прокуратура, ИДьМ үлэһиттэрэ кэрийэн көрөллөрүн иһитиннэрдэ. «2012 сылтан предприятиелар кыһыл көмүһү ылҕыылларыгар кэһиилэри таһаараллара утумнаахтык бэлиэтэнэр», – диэтэ Сахамин Афанасьев.
13 кыһыл көмүһү хостуур тэрилтэ үлэлиир 22 хайа учаастагар айылҕа сокуоннарын төһө тутуһаллара бэрэбиэркэлэммит. Индигиир өрүскэ уонна кини салаа үрэхтэригэр, үрүччэлэригэр уу хаачыстыбата бэрэбиэркэлэммит. Айылҕа уутуттан уонна кирдээх тобох уулартан 60 боруоба ылыллан чинчийиллибит. 9 тэрилтэ үлэлиир 10 хайа учаастагар ууну туһаныы уонна уу объектарын харыстааһын эйгэтигэр кэһиилэр булуллубуттар. Ол курдук, ууну харыстааһын быраабылалара тутуһуллубаттар, кирдээх тобохтор ууга быраҕыллаллар, уу объектарын бэйэлэрэ билэллэринэн туһаналлар.
Кэһээччилэр, бастатан туран, ыстарааптаналлар. Иккиһинэн, Сахамин Афанасьев этэринэн, айылҕаҕа оҥоһуллубут хоромньуну тэрилтэлэр толуйаллар. «Уу объектарыгар тахсыахтаах, эрдэттэн туоратыллыбыт экологическай хоромньу 1 млрд 360 мөл. солк. тэҥ буолуохтааҕа», – диэтэ кини.
Елена Голомарёва Усуйаана улууһугар Депутатскайдааҕы ГОК кирдээх тобоҕу харайар сирин туругун туһунан ыйытыы биэрдэ. Миниистир бэлиэтээбитинэн, хвостохранилищелар олус кутталлаах объектарынан буолаллар уонна мэлдьи хонтуруолга сылдьаллар.
