Мэҥэ Хаҥалас улууһун Төҥүлү уонна Тумул нэһилиэктэригэр айылҕа гааһа киирэр

— «Бырайыак быһыытынан, 30 км уһуннаах 900 дьиэҕэ диэри гааһы үллэрэр ситими уурабыт. Төҥүлүгэ биэс социальнай тутуулар хочуолунайдарыгар гаас ситимэ киирбитэ. Үс газорегуляторнай пууну туруоруохтаахпыт. Оттон Тумулга үлэ сүрүнэ бүттэ, 205 дьиэттэн 20-э эрэ хаалла», — диэн «Сахатранснефтегаз» начальнига Михаил Кириллин кэпсээтэ.

— Төҥүлү уонна Тумул олохтоохторо дьиэлэригэр гаас тардылларыттан олус үөрэн-көтөн олороллор.

Төҥүлүгэ 2238 киһи олорор. Ыаллар бары гаас ситимигэр холбонорго бэлэмнэммиттэрэ, анал оборудованиелары атыыласпыттара, гаас оһоҕор туспа помещениены бэлэмнээбиттэрэ. Нэһилиэнньэ улахан аҥаара 100 тыһ кээмэйдээх субсидиянан туһанна. Холобура, былырыын маннык субсидиены 42 ыал ылбыта, оттон быйыл 47 ыал. Нэһилиэнньэ чэпчэтии­нэн туһанар араҥата гааска босхо холбонуохтара. Бу улахан өйөбүл буолар. Дьон “Сахатранснефтегаз” үлэһиттэригэр олус махтанар. Гааһы тардааччылар нэһилиэнньэни кытта алтыһан үлэлииллэрэ үчүгэй. Өскөтүн ким эмэ сөбүлэспэт этиилээх буол­лаҕына ону тутатына көннөрөллөр, — диэн нэһи­лиэк дьаһалтатын специалиһа Ни­колай Скрябин гааһы тардааччылар үлэ­лэ­рин туһунан кэпсээтэ.

Сорох ыалларга гаас өссө былырыын тардыллыбыт эбит.
— Гаас киирэрэ диэн дьол! Билигин урут хайдах гааһа суох олорбуппутун сатаан санаабаппын даҕаны – диир Доллу нэһилиэгин баһылыга Иннокентий Птицын. Кини дьиэтигэр гаас былырыын ахсынньы ыйга тардыллыбыт. – Урут биһиги, эр дьон, оһох оттортон, мас бэлэмнииртэн соло буолбат этибит. Билигин иллэҥ бириэмэ баарынан туһанан, атынынан дьарыктаныахха сөп. Уонна дьиэбит быдан сылыйда.

Нэһилиэк баһылыга Тумулу гааһынан хааччыйыыга үөскээбит уустук балаһыанньа туһунан санаатын үллэһиннэ. “Өссө үс сыллааҕыта бэдэрээччик ИП Алексеев тендери кыайан, гааһы тардыы үлэтин саҕалаабыта. Ол эрээри үлэтин кыайбатаҕа, тиһэҕэр тиэрдибэтэҕэ уонна сүтэн хаалбыта. Ол түмүгүнэн бүгүн 33 дьиэ гааһа суох хаалла. Уонна бу боппуруос аһаҕас турар. Мин өрөспүүбүлүкэ бырамыысыланнаска министиэристибэтиттэн бу кыһалҕаны быһааралларыгар көрдөһөбүн. Бырамыысыланнас министиэристибэтэ бу кыһалҕаны быһаарыаҕа уонна бу 33 ыалга гаас ситимэ хайаан да тардыллыаҕа диэн эрэнэбит. Төҥүлү нэһилиэгэр гаас аан бастакынан тыыл бэтэрээнэ Устинья Стручкова дьиэтигэр умайбытын туһунан былырыын балаҕан ыйыгар суруйан турабыт. Биһиги киниэхэ дьиэтигэр киирэ сылдьарга быһаарынныбыт. Устинья Игнатьевна биһигини үөрэ-көтө көрүстэ.

— Мин үйэм уһаабытыттан дьоллоохпун. Мин сааһым — 85. Былырыын бастакыбытын мас бэлмнээһинин туһунан уонна оһох оттор туһунан санаабакка кыстаабыппыт. Дьиэбит уруккутунааҕар биллэ сылыйда. Кыыһым үөрэр, ас астыырга түргэн буолла диир. Мин өрөспүүбүлүкэ салалтатыгар, Ил Дархан Егор Борисовка, улуус баһылыгар Николай Старостиҥҥа, нэһилиэк баһылыгар Анатолий Плотниковка уонна саамай сүрүнэ гааһы тардааччыларга сүҥкэн үлэлэрин иһин махтанабын. Кинилэр баар буоланнар, нэһилиэк олохтоохторо сылаастык олоробут, — диир Устинья Игнатьевна.

— Биһиги Төҥүлүгэ кэлэрбитигэр үлэ нэһилиэк киин уулуссатыгар ыытылла турара. Маастардар Семен Решетников уонна Петр Дегтярев үлэ үөһүгэр сылдьаллар этэ. Күн аайы өрөбүлэ суох, сарсыарда 8 чаастан киэһээ 10 чааска диэри үлэлиибит. Ардыгар түүннэри да үлэлиибит. Бэйэбит базабытыгар олоробут, бары усулуобуйа барыта олохтоммут, остолобуойдаахпыт, баанньыктаахпыт. Биригээдэҕэ уопсайа 25 киһи үлэлиир, сварщиктар, слесардар, экскаваторщиктар симиэнэнэн үлэлииллэр, — диэн үлэһиттэр кэпсээтилэр.
Нэһилиэктэри гааһынан хааччыйар үлэ өрөспүүбүлүкэ улуустарыгар судаарыстыбаннай программа чэрчитинэн күргүөмнээхтик ыытыллар. Судаарыстыбаннай сакаасчыт — бырамыысыланнас министиэристибэтэ, инвестор – АО “РИК” уонна АО “РИК+”.

СИА.