Нерюнгрига Федерация Сэбиэтин кэмитиэтэ мунньахтыаҕа

Нерюнгри оройуонун историята Саха сирин соҕуруу өттүн таас чохтоох сирдэрин баһылааһыны кытта ыкса сибээстээх. Чуолаан манна таас чох баай саппааһа баар. БАМ хотугу утаҕын тутуу уонна Саха сирин соҕуруу өттүнээҕи территориальнай-производственнай комплексын үөскэтии 1975 сыл сэтинньитигэр оройуон историятыгар саҥа кэрдиис кэми саҕалаабыта. Быйыл сэтинньигэ оройуон уонна Нерюнгри куорат 40 сыллара бэлиэтэнэр.
Бу бэлиэ түгэни көрсө ыытыллар үөрүүлээх тэрээһиннэр чэрчилэринэн Судаарыстыбаннай Мунньах (Ил Түмэн) Бэрэссэдээтэлэ Александр Жирков баһылыктаах Саха Өрөспүүбүлүкэтин народнай депутаттара РФ ФМ Федерация Сэбиэтин федеративнай тутулга, регион политикатыгар, олохтоох салайыныыга уонна Хоту сир дьыалаларыгар кэмитиэтэ тэрийэн ыытар көһө сылдьар «төгүрүк остуолугар» кыттыахтара. Манна Саха сирин соҕуруу өттүн кэлимсэ социальнай-экономическай сайдыытын боппуруостара дьүүллэһиллиэхтэрэ.
Тэрээһиҥҥэ Уһук Илин, Илиҥҥи Сибиир уонна Арктика сайдыыларын боппуруостарыгар судаарыстыбаннай уорганнарга Федерация Сэбиэтин Боломуочуйалаах бэрэстэбиитэлэ Вячеслав Штыров, Федерация Сэбиэтин федеративнай тутулга, регион политикатыгар, олохтоох салайыныыга уонна Хоту сир дьыалаларыгар кэмитиэтин бэрэссэдээтэлин солбуйааччы Александр Акимов, Саха сирин баһылыга Егор Борисов, өрөспүүбүлүкэ Бырабыыталыстыбатын чилиэннэрэ, сокуону оҥорор уорганнар, олохтоох салайыныы уорганнарын, хаһаайынныыр субъектар, аччыгый бизнес бэрэстэбиитэллэрэ кытталлара күүтүллэр. Ону сэргэ «төгүрүк остуолга» былаас федеральнай уорганнарыттан: Уһук Илин сайдыытыгар министиэристибэттэн, Экономическай сайдыыга министиэристибэттэн уонна да атын биэдэмистибэлэртэн бэрэстэбиитэллэр ыҥырылыннылар.
Нерюнгри оройуонун Чульманыгар кэлээт да, официальнай делегация тута «Инаглинскай» хайа-байытар комплекска сылдьыаҕа. Санатан эттэххэ, РФ Бырабыыталыстыбатын уурааҕынан бигэргэммит Уһук Илин сиригэр олоххо киирэллэрэ былааннанар инвестиция бырайыактарын кэрискэтигэр бу хайа-байытар комбинаты тутуу баар. Инвестиция бырайыагын олоххо киллэриигэ 22,87 млрд чааһынай инвестиция тардыллара былааннанар. Билигин графикка сөп түбэһиннэрэн инфраструктураны тутуу үлэтэ барар. Сэтинньи 7 күнүгэр «Инаглинскай» ГОК тиэйэр тимир суолун станциятын үөрүүлээхтик аһыы буолуоҕа.
Салгыы делегация Нерюнгрига үлэлиэҕэ, манна Г.И.Чиряев бюһун, С.С.Каримова аатынан 1 №-дээх гимназия уонна Е.А.Варшавскай аатынан 24 №-дээх иһитиннэрии-технология лицейин дьиэлэригэр мемориальнай дуоскалары аһыы күүтүллэр. Нерюнгри оройуонун киин балыыһатын акушерскай отделениетын «А» блога аһыллыаҕа.
Сэтинньи 7 күнүн иккис аҥаарыгар «Саха сирин соҕуруу өттүн салгыы кэлимсэ социальнай-экономическай сайдыытын судаарыстыба өттүттэн өйөөһүн миэрэлэрин туһунан» Федерация Сэбиэтин федеративнай тутулга, регион политикатыгар, олохтоох салайыныыга уонна Хоту сир дьыалаларыгар кэмитиэтин көһө сылдьар «төгүрүк остуола» буолуоҕа. Тэрээһин кыттыылаахтара «Саха сирин соҕуруу өттүн кэлимсэ сайдыыта» инвестиция бырайыагын олоххо киллэрии туһунан РФ Бырабыыталыстыбатын 2009 с. кулун тутар 10 к. 302-р №-дээх дьаһалын олоххо киллэрии хаамыытын уонна «Нерюнгри оройуона 40 сааһын туолуон иннинэ. Атаҕар туруутун уопута, историята уонна сайдыытын кэскиллэрэ» темаҕа «төгүрүк остуол» рекомендацияларын көрүөхтэрэ. СӨ Соҕуруу Саха сиринээҕи территориальнай-производственнай комплексын базатыгар урутаан социальнай-экономическай сайдыы сирин-уотун үөскэтии боппуруостарын дьүүллэһии былааннанар.
Ити күн киэһэтигэр Нерюнгри оройуонун уонна Нерюнгри куорат 40 сылларыгар аналлаах уопсастыбаннаһы кытта үөрүүлээх мунньах уонна театрализованнай көрдөрүү буолуохтара.
Сэтинньи 8 к. өрөспүүбүлүкэ народнай депутаттара Нерюнгри оройуонун баһылыга оройуон Бочуоттаах гражданнарын кытта көрсүһүүтүгэр кыттыахтара, ветераннары уонна ыччат активын кытта көрсүөхтэрэ, И.И.Пьянков аатынан Саха сирин соҕуруу өттүн баһылааһын историятын музейыгар сылдьыахтара.
Күн иккис аҥаарыгар СӨ народнай депутаттара кыттыылаах РФ ФМ Федерация Сэбиэтин федеративнай тутулга, регион политикатыгар, олохтоох салайыныыга, Хоту сир дьыалаларыгар кэмитиэтин уонна Нерюнгри оройуонун олохтоох салайыныытын бэрэстэбиитэллээх уорганнарын депутаттарын кыттыгас мунньаҕа буолуоҕа.