Пенсияҕа тахсыан иннинээҕи саастаах дьону таарыйыахтара суоҕа

Парламентарийдар депутаттарга уонна судаарыстыбаннай сулууспалаахтарга пенсияҕа тахсар саастарын 65-кэ диэри үрдэтэр туһунан этиилэригэр хоруйдаан, Медведев «бу олоххо тугу эмэ саҕалыыр буоллахха, бэйэттэн саҕалыыр ордук» диэтэ.

Дмитрий Медведев бэлиэтээбитинэн, «депутаттар уонна судаарыстыбаннай сулууспалаахтар үгүстэрэ, дьиҥэр, пенсияҕа тахсарга ыксаабаттар уонна өр үлэлииргэ бэлэмнэнэллэр». «Итини дьүүллэһиэххэйиҥ, оттон гражданнар сорох категориялара бэлэмнэр диэн түмүккэ кэллэхпитинэ, маннык сокуон барыла киллэриллиэн сөп», – диэн хоруйдаата премьер.

«Депутаттарга уонна судаарыстыбаннай сулууспалаахтарга сыһыаннаан бу боппуруоһу дьүүллэһэр сорудаҕы билигин да биэрэргэ бэлэммин», – диэтэ Медведев.

Манан сибээстээн Госдума бэрэссэдээтэлэ Сергей Нарышкин санаппытынан, депутаттарга уонна сенатордарга хамнастарын сарбыйар туһунан быһаарыы олус түргэнник ылыллыбыта.

Россия атын олохтоохторун эттэххэ, пенсияҕа тахсар саас боппуруоһун быһаарарга бырабыыталыстыба ыксыыр санаата суоҕун бигэргэтэн Медведев: «Дьүүллэһии кэнниттэн быһаарыы ылыллыах тустаах», – диэтэ.

Билиҥҥи пенсияҕа тахсар саас — 60 уонна 55 сыл — 1932 сыллаахха олохтоммутун санатта премьер. Кини оччолорго олох уһуна баара-суоҕа 35 сааска тэҥнэһэригэр болҕомтону тарта. 1940-с сыллар бүтүүлэригэр ССРС-ка олох 45 сааска диэри уһаабыт.

Ааспыт нэдиэлэҕэ Минфин баһылыга Антон Силуанов болдьоҕун иннинэ тахсар пенсияны суох оҥоруу уонна пенсияҕа тахсар сааһы үрдэтии боппуруоһун былаас суһаллык быһаарыахтааҕын эппитэ. Силуанов этэринэн, ити бюджекка ноҕуруусканы намтатыаҕа.

Президент Владимир Путин телевидениенэн муус устар 16 күнүгэр кэпсэтиитигэр пенсия сааһын үрдэтии кыаллыбат диэбэтэҕэ, ол эрээри уларыйыылар «пенсияҕа тахсыан иннинээҕи саастаах дьону таарыйыахтара суоҕа» диэн бэлиэтээбитэ. Путин этэринэн, пенсияҕа тахсар сааһы үрдэтии «бу системаҕа сиппит-хоппут, ол эрээри балайда эдэр дьон сымнаҕастык киириилэринэн буолуохтаах, 10-15 сылынан кинилэри туох күүтэрин өйдүөхтээхтэр».