833
31 июля 2015 в 10:18
Үс тыһыынча Кытай хампаанньата Саха сиригэр инвестициялыыр баҕалаах
Соторутааҕыта 13 киһилээх кытай делегацията Саха сиригэр дьыалабыай сырыыта түмүктэннэ. Бу иннинэ Саха сирин уонна Кытай өрүттэрин икки ардыларыгар оробуочай көрсүһүү муус устар ыйга Пекиҥҥэ буолан ааспыта. Оттон КНР бэрэстэбиитэллэрин Саха сиригэр билиҥҥи кэлиитэ онуоха харданан буолар. «Хуа Цин Ань Цзю» хампаанньа директордарын сэбиэтин бэрэссэдээтэлэ Чжу Чхунь Юй СИА-тыгар оробуочай көрсүһүүлэр түмүктэрин туһунан кэпсээтэ.
«Биһиги кэккэ предприятиелары кытта кэпсэтиини ыыттыбыт, өйдөһүү уонна салгыы бииргэ үлэлээһини уопсай көрүү ситиһилиннэ. Билигин сөбүлэһиилэр барыллара бэлэмнэнэллэр. Быйыл күһүн олорго илии баттыахпыт диэн эрэнэбит. Тутуу туһунан этэр буоллахха, биһиги Дьокуускай куорат 84-с кыбартаалын тутуохпут. Ону сэргэ инновационнай киини тэрийиини кэрэхсээтибит», – диэтэ Чжу Чхунь Юй.
Кытай делегациятын бэрэстэбиитэллэрэ өрөспүүбүлүкэ министиэристибэлэригэр, биэдэмистибэлэригэр, үп тэрилтэлэригэр, «Якутия» технопааркаҕа, «Туймаада-лизинг» хампаанньаҕа сырыттылар.
«Хуа Цин Ань Цзю» хампаанньа – Кытайга бөдөҥнөртөн биирдэстэрэ, кини КНР бырабыыталыстыбатынан хонтуруолланар, устааптаах фондата 50,08 мөл. юань. Саамай чугастааҕы бырайыагынан Алдаҥҥа ньиэби переработкалыыр собуоту ааттыахха сөп. Ыалдьыппыт этэринэн, Кытай 3 тыһыынчаттан тахса хампаанньата биһиги ырыынакпытыгар киирэр баҕалаах. Ити маассабайдык буолуо суоҕа, барыта түһүмэхтэринэн, биһиги бырайыактары көрөрбүтүгэр, докумуоннары оҥорорбутугар бириэмэ наада. Кытай өрүтэ 10 мөл. юань устааптаах хапытааллаах анал фонданы тэрийэр баҕатын биллэрдэ. Кинилэр 51% угарга бэлэмнэр. Кытайтан эрийдилэр, биһигини Өлүөнэ өрүһү туоруур нөҥүө муостаҕа докумуоннары биэриини түргэтэтэргэ көрдөстүлэр. Кэлэр көрсүһүү балаҕан ыйыгар Владивостокка Уһук Илиннээҕи экономическай форумҥа буолуоҕа», – диэн федеративнай сыһыаннаһыыларга уонна тас сибээстэргэ СӨ миниистирэ Владимир Васильев кэпсээтэ.
Наталья Борисова, СИА.
