09 сентября 2016 в 14:11

Саха сирэ 15 сөбүлэһиини түһэристэ

Владивостокка буолбут 56 дойдуттан инвестордары, судаарыстыбаннай үлэһиттэри муспут улахан форумҥа уопсайа 1 триллион 800 мөл. солк. суумалаах 200 сөбүлэһии түһэрсиллибит. Саха сирэ көрдөрбүт 325 млрд. солк. суумалаах 15 сөбүлэһиитигэр илии баттаммыт.

СӨ бырабыытылылыстыбатын бэрэссэдээтэлин бастакы солбуйааччы, экономика миниистирэ Алексей Стручков Илиҥҥи экономическай форум түмүгүн туһунан журналистарга пресс-конференцияҕа кэпсээтэ. «Быйыл ИЭФ киэҥ далааһыннаахтык ыытылынна. Инвестордар Арассыыйаҕа бастакы күөҥҥэ сылдьар бырайыактары кытта билсэр уонна ону ырытыһар улахан былаһааккаларынан буолла. Ил Дархан Егор Борисов салайааччылаах Саха сирин дэлэгээссийэтэ 22 бырайыагынан кытынна, онтон 15-гэр сөбүлэһии түһэрсилиннэ. Ол курдук, туризм, промышленность, тыа хаһаайыстыбатын, энергетика уонна да атын салаалары таарыйар бырайыактарга илии баттанна», — диэн иһитиннэрдэ.

Алексей Стручков Форум иһинэн үлэлээбит Евразийскай алмаас киинигэр Саха сирэ 18 мөл. дуоллар суумалаах алмааһы атыылабыттарын туһунан эттэ. Япония, Индия инвестордара Саха сирин алмааһыгар интэриэстээхтэрин биллэрбиттэр.
Маны таһынан, тастан киирии уонна олохтоох бородууксуйаны өрөспүүбүлкэ таһыгар батарыы хайысхатынан сөбүлэһии түһэрсиллибит. Тыа хаһаайыстыбатын салаатынан үс сөбүлэһиигэ илии баттаммыт: Покровскай куоракка уонна Дьокуускай таһынааҕы Тулагы бөһүөлэгэр сылы эргиччи үлэлиир тэпэлииссэни тутуу бырайыагар, олохтоох бородууксуйаны атыылыыр Сайсары ырыынагын саҥардыы бырайыагар. Жатайга үрдүк технологиянан суудуна оӨорор собуоту тутуу бырайыагын Корея хампаанньата интэриэһиргээбит.
Өлүөнэ өрүһү туоруур муоста тутуутун оробуочай бырайыагын ИЭФ-кэ көрдөрбүттэр. Бырайыак олоххо киириитигэр Кытай инвестордарын кытары үлэ ыытылларын туһунан Алексей Стручков иһитиннэрдэ.