778
31 июля 2015 в 17:57
Санкциялаах бородуукталары кыраныыссаҕа суох оҥоруохтара
Атырдьах ыйын 6 күнүттэн Россияны утары экономическай санкциялары өйөөбүт дойдулартан тиэйиллэр аһылык бородуукталарын суох оҥорор туһунан Ыйаахха Россия президенэ Владимир Путин илии баттаата. Ити туһунан Кремль пресс-сулууспатыттан иһитиннэрдилэр.
«Российскай Федерация сиригэр-уотугар Россия юридическай уонна (эбэтэр) физическэй сирэйдэригэр сыһыаннаан экономическай санкциялары киллэрэр туһунан быһаарыы ылыммыт уонна бу быһаарыыга кыттыспыт дойдулартан тиэйиллэн киллэриллибит, Российскай Федерация сиригэр-уотугар тиэйиллэрэ бобуллубут тыа хаһаайыстыбатын бородууксуйата, сырье уонна аһылык 2015 сыл атырдьах ыйын 6 күнүттэн суох оҥоһуллуохтаахтарын олохтуурга», – диэн ыйаах тексигэр этиллэр.
Маныаха ыйаах балаһыанньалара тус туһаныыга анаан киллэриллибит эбэтэр таможня транзитын процедуратыгар сылдьар уонна үһүс дойдуларга тиэйиллэр табаардарга туттуллубаттар. Владимир Путин миниистирдэр кабинеттара табаардары суох оҥоруу бэрээдэгин олохтууругар сорудахтаата.
Санатар буоллахха, ааспыт нэдиэлэҕэ тыа хаһаайыстыбатын миниистирэ Александр Ткачев кыраныыссаҕа санкция испииһэгэр киирбит дойдулартан тиэйиллэр бородуукталар партиялара булуллубутун суох оҥорууга судаарыстыба баһылыгыттан көрдөспүтэ.
Бу иннинэ Федеральнай Мунньах аллараа палаататын конституционнай сокуоннары оҥорууга кэмитиэтин бэрэссэдээтэлин солбуйааччы Вадим Соловьев Арҕааҥҥы дойдулар санкцияларыгар хоруйдаан тиэйиллэллэрэ бобуллар бородуукталары атыылааһын иһин холуобунай уонна административнай эппиэтинэһи киллэрэргэ этии оҥорбута.
Кытаанах миэрэлэрэ суох контрабанда аччыа суоҕа, диэн ити күн иннинэ Владимир Жириновскай эппитэ. Парламентарий арҕаа дойдулартан киирэр аһы-үөлү суох оҥоруу туһунан кэпсэтиилэргэ аһыныгас санаа баарын өйдүүр, ол эрээри импорт солбуллуутун уонна коррупцияны утары охсуһууну өйүүр туһугар атын суолу-ииһи көрбөт.
