18 декабря 2015 в 12:07

“Сунтаар-Автодор” айанньыттар сырыыларын чэпчэтэр түбүктэрэ

Хайа баҕарар сиргэ тиийдэххэ суол-иис туруга улуус сайдыытын таһымын көрдөрөр. Тыа хаhаайыстыбатын уонна олохтоох бырамыысыланнаһы сайыннарарга айан суола эмиэ үчүгэй туруктаах, ирдэбилгэ толору эппиэттэһэр буолуохтаах. «Сунтаар-Автодор» ХЭТ улуус социальнай-экономическай сайдыытыгар үгүс кылаатын киллэрэр биир бастыҥ үлэлээх тэрилтэ буолар.

“Сунтаар-Автодор” ХЭТ 195 км уһуннаах суолу-ииһи оҥорууга, өрөмүөннээһиҥҥэ ылсан үлэлиир. Ити – Сунтаартан саҕалаан Мииринэйгэ киириигэ диэри суол. Тэрилтэ генеральнай дириэктэрэ, улуус Сэбиэтин депутата Феликс Эрикович Павлов идэтинэн суолу тутааччы. Дириэктэри бастакы солбуйааччы Дмитрий Дмитриевич Тен тэрилтэ үлэтин-хамнаһын туһунан сиһилии кэпсээтэ:
— Биһиги 2008 сыллаахха биэс буолан суолу тутар-өрөмүөннүүр республикатааҕы тэрилтэни аукционунан атыылаһан ылбыппыт. Сүрүн хантыраакпытынан 2018 сылга диэри федеральнай суолталаах массыына суолун үлэлэтэн олоробут. Сунтаартан Мииринэй учаастагар Аччыгый Ботуобуйа диэн үрэххэ диэри уопсайа 195 км уһуннаах федеральнай суолу көрөбүт-истэбит. Бу суол икки ардыгар үс нэһилиэк баар. Ол курдук, федеральнай суол Аллаҥа, Тойбохой, Кириэстээх нэһилиэктэрин иһинэн ааһар. Оттон кыһыҥҥы өттүгэр икки муус туорааһыннаах: 650 м уһуннаах Сунтаар–Устье уонна 700 м уһуннаах Кириэстээх.

“Сунтаар-Автодор” тэрилтэ уопсайа 57 үлэһиттээх. Сайыҥҥы өттүгэр, үлэ элбээн, вахтовиктар кэлэн эбии күүс-көмө буолан үлэлииллэр эбит. Ол курдук, быйыл сайын муҥутаабыта 123 үлэһит буола сылдьыбыт. Бу тэрилтэ эппиэтинэһигэр хас да карьер киирсэр буолан, өрөмүөн үлэтэ төгүрүк сыл устата тохтообокко ыытыллар.
“Бүлүү” федеральнай таһымнаах суол буолуоҕуттан ыла үгүс суолталаах тутуу барда. Ол курдук, 2013 сыллаахха Бүлүүчээн үрэҕи туоруур улахан муоста тутуллубута. Бетонтан кутуллубут муоста 3 км уһуннаах, 105 тонна уйуктаах. Тыа хаһаайыстыбатынан дьарыктанар өрөспүүбүлүкэ биир улахан оройуона – Сунтаар алмаас промышленноһын киинин кытары быстыспат сибээһэ бу суолунан олохтоммутун бэлиэтиир наадалаах. Ону таһынан, бу кэм устата алта улахан өрөмүөн үлэтэ ыытыллыбыт. Онон билиҥҥитэ суол туруга биллэ тупсан турар. Бу учаастакка икки улахан дабайыы баар. Онно урут элбэх массыына саахалланар этэ. “Сунтаар-Автодор” үлэһиттэрэ суол кытыытыгар элбэх мэһэйдэри туруорбуттар, онон инникитин саахалланыы тахсыа суоҕа диэн эрэнэллэр. Айан суола тупсарын туһугар анаан-минээн баһаам аныгы тиэхиньикэ үлэлиир.
Айанньыттар сырыыларын чэпчэтэр, уйгу-быйаҥ олох сайдарыгар күүс-көмө буолар “Сунтаар-Автодор” тэрилтэҕэ ситиһиилээх үлэни баҕарабыт!

Мария ПАВЛОВА