752
07 августа 2015 в 13:27
Таһаҕас күргүөмнээн тиэрдиллэ турар
Бу күннэрдээҕи туругунан, Дьааҥы өрүскэ таһаҕастаах 7 суудуна айан кууруһун тутуһар. Бу суудуналартан түөрдэ «Сибиирискэй» тииптээх уу ааллара, үһэ – сухогруз. «Богатырев» суудунаттан М-27 баарсаҕа чоҕу көһөрөн тиэйии үлэтэ ыытылынна.
Дьааҥы өрүс барын нөҥүө ньиэби тиэммит «Ленанефть-2055» уонна «Ленанефть-2041» танкердар, «Хитров» теплоход уонна чоҕу тиэммит 2 баарса Нижнеянскай бөһүөлэгэр аастылар. Суудуна өрүс харгыһын нөҥүө ааһарын инниттэн, тас барга 220 см мэктиэлэммит дириҥнээх суудуна сылдьарыгар аналлаах хаһыы оҥоһуллар.
1,2 тыһ. туонна ньиэби тиэммит «Ленанефть» танкер Нижнеянскайга сүөкээһини күүтэр. Чоҕу тиэммит «Хитров» суудуна эмиэ көһүтэр. ДьУоХХ наадаларыгар аналлаах чоҕу уонна ньиэби тиэммит 2 суудуна Нижнеянскайтан Уус-Куйга бөһүөлэгэр аттаннылар.
От ыйын 24 күнүттэн «Олег Стрельченя» буору хаһар тиэхиньикэ Дьааҥы өрүс барыгар 830 миэтирэни барда, 50,8 тыһ. куб. м түгэх буор таһаарылынна. Хотугулуу-илинтэн сүрдээх күүстээх тыал үрэрин үрдүнэн, өрүс буорун дириҥэтии үлэтин кээмэйэ 199 тыһ. куб. м тэҥнэстэ. Өссө 296,4 тыһ. куб.м түгэх буору хаһыы соруга турар. Суудуна мэктиэлээхтик устарыгар ирдэнэр 220 см дириҥ баар буолла.
Индигиир барыгар 4,3 тыһ туонна дизельнэй оттугу тиэммит 2 суудуна, 2,2 тыһ. туонна ньиэптээх биир суудуна уонна бункернай оттуктаах эмиэ биир суудуна көһөрөн тиэйиини көһүтэн тураллар.
Ааспыт сылга депонацияҕа хараллыбыт 1,889 туонна ньиэп, 1,784 туонна ньиэп бородуукталара, атырдьах ыйын 4 күнүнээҕи туругунан, Хонууга тиэрдилиннилэр. Кэбэргэнэ нэһилиэгэ ньиэп бородуукталарыгар наадыйыыта 100 быр.туолла.
Муома, Анаабыр уонна Булуҥ улуустарыгар 13,200 туонна гаас конденсата тиэрдилиннэ. Ити былааннаммыт кээмэйтэн 109,3%-гар тэҥнэһэр. Гаас конденсатын Кэбээйи улууһугар тиэрдии былаана 101% туолла. Дьааҥы, Индигиир, Халыма уонна Анаабыр өрүстэринэн депонацияламмыт таһаҕас 80-тан тахса бырыһыана тиэрдилиннэ.
СИА.