14 августа 2015 в 12:44

Танкердар Үрүҥ Хайаҕа тиийдилэр

Бу күннэрдээҕи туругунан, «Лена өрүс холбоһуктаах пароходствота» (ЛӨХП) ААУо 233 тыһ. туонна сырдык ньиэп бородууктатын, 55.9 тыһ. туонна хочуолунай оттугун, барыта 288,9 тыһ. туонна ньиэп бородууктатын таһыынан дьарыктанар. Осетрово пордуттан 180 тыһ. туонна сырдык ньиэп бородууктата тиэллэн, араас хайысхаларынан аттанна.

Аартыкатааҕы уонна хотугу улуустар пууннарыгар ньиэп бородууктатын тиэрдии үлэтэ салҕанар. Бу күннэрдээҕи туругунан, 56,1 тыһ. туонна ньиэп бородууктата, мантан 31,4 тыһ. туонната сырдык ньиэп уонна 24,7 тыһ. туонна ньиэп хочуолунай оттуга тиэлиннэ.
Үрүҥ Хайаҕа 2.2 тыһ. туонна диисэл оттугун тиэммит «Ленанефть-2032» бастакы танкер сүөкэннэ. 2,3 тыһ. туонна хочуолунай оттугун тиэммит «Ленанефть-2003» танкер Үрүҥ Хайаҕа олох чугаһаан турар.

Индигиир өрүскэ Үрүҥ Хайатааҕы флот күүһүнэн, Хонууга 2,2 тыһ. туонна ньиэп хочуолунай оттуга уонна 0,6 тыһ. туонна гаас конденсата тиэрдилиннэ.