Уоппуска кылгыа дуо?

Уһук Хоту сир оройуоннарыгар уонна онно тэҥнэниллибит сирдэргэ үлэлиир дьоҥҥо эбии төлөнөр уоппускаларын уһуна РФ Үлэҕэ кодексын 321-с ыстатыйатынан олохтоммута. Бу ыстатыйа быһыытынан, Уһук Хоту сир оройуоннарыгар үлэлиир доҥҥо 24 халандаар күнэ уһуннаах эбии төлөнөр уоппуска бэриллэр, оттон Уһук Хоту сир оройуоннарыгар тэҥнэниллибит сирдэргэ үлэлээччилэргэ – 16 күн. Итинник нуорма «Уһук Хоту сир оройуоннарыгар уонна онно тэҥнэниллибит сирдэргэ үлэлиир уонна олорор дьоҥҥо судаарыстыба мэктиэлэрин уонна толуйууларын туһунан» 1993 с. олунньу 19 к. 4520-1 №-дээх РФ Сокуонун 14-с ыстатыйатынан олохтоммута.

РФ Бырабыыталыстыбата ыйыллыбыт уоппускалары аччатары былааннаабат.
Оттон РФ үлэҕэ уонна социальнай сайдыыга министиэристибэтэ үгэскэ киирбит салааларынан дьарыктанар Хоту сир аҕыйах ахсааннаах төрүт норуоттарын общиналарыгар бастайааннай төрүккэ страховой усунуостары намтатыллыбыт тарифтарынан төлүүр быраабы биэриини көрөр дуо?

РФ страховой усунуостар тустарынан сокуоннарын балаһыанньаларыгар сөп түбэһиннэрэн, 2018 сылга диэри кэмҥэ страховой усунуостары төлөөччүлэр сүрүн категорияларыгар, ол иһигэр Хоту сир аҕыйах ахсааннаах төрүт норуоттарын общиналарыгар судаарыстыбаннай бюджеты таһынан фондаларга төлүүр страховой усунуостарын тарифтара 30,0% тэҥ (22,0% – РПФ; 2,9% – ФСС; 5,1% – ФФОМС).

Хоту сир аҕыйах ахсааннаах төрүт норуоттарын общиналарыгар намтатыллыбыт тарифтар 2011-2014 сс. кэмҥэ эрэ олохтоммуттара.

Бу судаарыстыба өйөбүлэ быстах кэмнээх этэ, кинилэр 2015 сылтан страховой усунуостар уопсай олохтоммут тарифтарыгар көһүөхтээхтэр.

Итинник намтатыллыбыт тарифтары олохтооһуну министиэристибэ өйөөбөт. Ол курдук, булгуччулаах социальнай страхование үбүн системата туруктаах буолуута судаарыстыбаннай бюджеты таһынан фондалар бюджеттарыгар страховой усунуостар киириилэриттэн быһаччы тутулуктаах. Бу система туруктаах буолуутун ситиһэр сыалтан бары категориялаах төлөөччүлэргэ-үлэ биэрээччилэргэ сыһыаннаан страховой усунуостар биир тарифтарын олохтуур наадалаах. Ити этиллэр сыһыан РФ пенсионнай систематын уһун болдьохтоох сайдыытын Стратегиятыгар көстөр.

Страховой усунуостары төлөөччүлэр сорох категорияларыгар намтатыллыбыт тарифтары олохтооһунунан сибээстээн, судаарыстыбаннай бюджеты таһынан фондалар сүтэрэр дохуоттарын билигин ити ыйыллар фондалар бюджеттарыгар федеральнай бюджеттан бюджеттар икки ардыларынааҕы трансфертары ыытан толуйулларын учуоттуохха наада. Фондаларга страховой усунуостар киириилэрин суотугар страховкаламмыт дьон страховой мэктиэлэрэ хааччылларын болҕомтоҕо ылыллыахтаах. Онон Хоту сир үгэс буолбут салааларынан дьарыктанар аҕыйах ахсааннаах төрүт норуоттар общиналарыгар страховой усунуостар намтатыллыбыт тарифтарын олохтооһунунан сибээстээн федеральнай бюджекка ноҕуруусканы улаатыннарар туһунан этиилэри өйүүр билигин кыаллыбат.