14 декабря 2018 в 09:26

Петр Гоголев кэккэ сытыы боппуруостары бэлиэтээтэ

Россия Федерациятын сокуону таһаарааччыларын Сэбиэтин тэрээһиннэрин чэрчитинэн Россия Наукаларын академиятын дьиэтигэр Россия Федерациятын субъектарын судаарыстыбаннай былааһын сокуону таһаарар (бэрэстэбиитэллээх) уорганнарын салайааччыларыгар – РФ Федеральнай Мунньаҕын иһинэн Россия сокуону таһаарааччыларын Сэбиэтин чилиэннэригэр семинар ыытыллар.

Регионнар парламеннарын спикердэрин иннигэр үп миниистирэ Антон Силуанов уонна РФ Ааҕар-суоттуур палаататын бэрэссэдээтэлэ Алексей Кудрин тыл эттилэр.
СӨ Судаарыстыбаннай Мунньаҕын (Ил Түмэн) Бэрэссэдээтэлэ Петр Гоголев кэккэ ыйытыылары биэрдэ. Чуолаан, кини тыа сирдэрин сайдыытыгар тус сыаллаах федеральнай бырагыраама, онно хотугу регионнар кыттыыларын, сиринэн сибээстэһии уратыларын, Саха сирин киэҥ иэнигэр ол туруга суоҕун, аччыгый авиация сайдыытын кэскилин уонна цифровой тэҥэ суох буолуу проблемаларын быһаарыы туһунан ыйытта.
«Антон Германович хоруйдаабытынан, Уһук Илиҥҥэ бүтүннүүтүгэр авиацияҕа соруктар инники күөҥҥэ тураллар, ол иһигэр федерация субъектарын кииннэрин икки ардыларыгар маршруттары оҥорууга. Хомойуох иһин, өрөспүүбүлүкэ иһинээҕи линияларга аэропорт инфраструктуратын өйөөһүн туһунан эрэ этиллиэн сөп. Бу бэлиэтэммит уонна да атын проблемаларга федеральнай былаастары кытта үлэлиэхпит», — диэн иһитиннэрдэ Петр Гоголев.