Владимир Путин үгэс буолбут этиитэ

Кириэмил сайтыгар иһи­тиннэриигэ этиллэринэн, бу тэрээһин “Манеж” Киин быыс­тапкалыыр саалаҕа Москва бириэмэтинэн 12:00 чааска саҕаланыахтааҕа.
Россия Президенэ анал этиитин иһи­тин­нэриигэ Саха Өрөс­пүүбүлүкэтин Ил Түмэнин Бэрэссэдээтэлэ Александр Жирков кыттыыны ылар.
Сыл аайы судаарыстыба баһылыга Федеральнай Мунньахха дойду балаһыанньатын итиэннэ ис уонна тас политика сүрүн хайысхаларын туһунан анал этиитин оҥорор. Бу Россия чугастааҕы кэмҥэ сайдыытын стратегическай туһаайыыларын быһаарар политическай-правовой докумуон буолар. Онон бу туһаайан этиигэ политическай, экономическай, идеологическай балаһыанньалары таһынан, парламент икки палаататын сокуону оҥорууга үлэтигэр чопчу этиилэр киирэллэр.
Быйыл парламентарийдар РФ Президенин туһаайан этиититтэн экономическай реформалар былааннарын, дьадайыыны утары охсуһууга уонна социальнай боппуруостары быһаарыыга дьаһаллары, ону кытта норуоттар икки ардыларынааҕы балаһыанньаны сыана­лааһыны күүтэллэр.
Россия судаарыстыбатын баһылыктара парламеҥҥа барыта 22 төгүл этии оҥорбуттара, ол иһигэр Путин тус бэйэтэ — 12 төгүл. Бу иннинэ маннык этиилэр сыл аайы буолаллара, арай 2017 сылга эрэ Президент туһаайан этиитэ суоҕа. Ааспыт сыл ахсынньы бүтүүтүгэр Россия Президенин администрациятын баһылыгын бастакы солбуйааччы Сергей Кириенко санаппытынан, бу – судаарыстыба баһылыгын бырааба, кини ону “хаһан наадалааҕынан аахтаҕына” олоххо киллэриэн сөп.