Өрөспүүбүлүкэҕэ маҥнайгы ньиэп уонна гаас форума

Ил Түмэн депутаттара Юрий Николаев, Владимир Прокопьев уонна Родион Зорин Мирнэйгэ буола турар Өрөспүүбүлүкэ маҥнайгы ньиэп уонна гаас форумугар кытталлар.

Форум ниэп уонна гаас салаатыгар социальнай-экономическай хайысханан бииргэ үлэлээһиҥҥэ көдьүүстээх көрдөрүүлээх уонна ситиһиилээх эбийиэктэри киэҥ эйгэҕэ көрдөрөр сыаллаах ыытыллар. Манна өрөспүүбүлүкэҕэ ниэп уонна гаас бырамыыссыланнаһа сайдыытыгар баар кыһалҕалар уонна инники үлэ саҕахтарын туһунан бизнес, уопсастыбаннас уонна былаас бэрэстэбиитэллэрэ кэпсэтэллэр, дьүүллэһэллэр.

Форум кыттааччылара ньиэп-гаас тэрилтэлэригэр олохтоох нэһилиэнньэ дьарыктаах буолуутун боппуруоһун, экологическай хонтуруол, бу салааны кытары сэргэ атын салаалары сайыннарыы туһунан боппуруостары таарыйыахтара.

Форум иһинэн “бизнес уонна бизнес”, “бизнес уонна былаас” форматынан көрсүһүүлэр ыытыллаллар, пленарнай мунньах, блоктарынан арахсан кэпсэтиилэр, семинардар, бизнес уонна инвестиция бырайыактарын сүрэхтээһин ыытыллар.

Ньиэп уонна гаас маҥнайгы форумугар федераль­найдааҕы, регионнааҕы, олохтоох былаас уорганнарын бэрэстэбиитэллэрэ, ниэби, гааһы хостуур хампаанньалар, үөрэх кыһалара, уопсастыбаннай түмсүүлэр кытыннылар.

Атырдьах ыйын 29 күнүгэр форум кыттааччылара “РНГ” АУо уонна “ТЮНГД” ХЭУо лицензиялаах учаастактарыгар сырыттылар. “РНГ” АУО НГКМ Орто Ботуобуйатааҕы лицензиялаах учаастагын үөрүүлээхтик бэлиэтээн үлэлэттилэр. “ТЮНГД” ХЭУо  НГКМ Орто Ботуобуйатааҕы лицензиялаах учаастагар вахтанан үлэлиир дьон олорор комплекстарын арыйдылар.

“Саха өрөспүүбүлүкэтин ньиэп уонна гаас хостооһунун салаатыгар ыытыллар үлэлэр түмүктэрэ, былааннар уонна кэскилэ” диэн тиэмэҕэ төгүрүк остуол буолла. Тэрээһиҥҥэ көдьүүстээх үлэлээх эбийиэктэр, оҥорон таһаарыы көрдөрүүлэрин, геологическай чинчийии үлэлэрин, салаа инфраструктуратын сайыннарыы туһунан кэпсэттилэр.

“Ньиэп-гаас хостуур тэрилтэлэри кытары үп уонна экономика хайысхатынан үлэлэһии” диэн төгүрүк остуолга СӨ үбүн миниистирэ Валерий Жондоров модераторынан буолла. Манна нолуоктары, кредиттэры, дохуоттары уонна ороскуоттары, кредит биэрэр тэрилтэлэр, аччыгый уонна орто бизнеһы кытары бииргэ үлэлэһиини кытта сибээстээх боппуруостар тула кэпсэтии барда.

“Ньиэп уонна гаас хампаанньаларын кытары социальнай боппуруостарынан бииргэ үлэлэһии” диэн тиэмэлээх төгүрүк остуолу Саха өрөспүүбүлүкэтин бырабыыталыстыбатын бэрэссэдээтэлин солбуйааччы Ольга Балабкина салайан ыытта. Бу кэпсэтиигэ олохтоох дьону үлэҕэ ылыы, үөрэтии, практикалааһын, уопут атастаһыы туһунан боппуруостар таарылыннылар.

Оттон “Ньиэптэн уонна гаастан оҥорон таһаарыы уонна гаастааһын” диэн төгүрүк остуолга гааһынан уматык ырыынагын сайыннарыы, нэһилиэнньэлээх пууннары гаастааһын, инвестиция бырайыактарын туһунан кэпсэттилэр.

Экология, айылҕа уонна ойуур хаһаайыстыбатын миниистирэ Сахамин Афанасьев “Экологияҕа куттал суох буолуута” диэн төгүрүк остуолу ыытарыгар уу ресурсаларын экологиятын, айылҕа харыстанар територияларын, үгэс дьарыктарынан үлэлииргэ анаммыт айылҕа територияларын туһунан кэпсэттилэр.

Атырдьах ыйын 29 күнүгэр форум пленарнай мунньаҕа буолла. Саха өрөспүүбүлүкэтин уонна “Газпром” ПАУо кытары бииргэ үлэлэһиигэ сөбүлэһии түһэрсии туһунан оробуочай бөлөх мунньаҕа ыытыл­лыаҕа.

Бүгүн, атырдьах ыйын 30 күнүгэр Мирнэй оройуонун аччыгый уонна орто предпринимательствотын бэрэстэбиитэллэригэр ньиэп, гаас салаатын хампаанньаларын закупкатын үлэтигэр хайдах кыттыһыахха сөбүн быһаарар семинар ыытыллыаҕа.