Намҥа эдэр дьон сугулаана

Атырдьах ыйын 21 күнүгэр Нам улууһугар “Синергия Севера” эдэр ыччат IV форума үлэтин саҕалаата. Форумҥа өрөспүүбүлүкэ кэскиллээх ыччата араас бырагыраамаларынан билиилэрин хаҥаталлар, Өрөспүүбүлүкэ бырабыыталыстыбатын гранын иһин күрэхтэһэллэр. Форум атырдьах ыйын 25 күнүгэр түмүктэнэр.

СИА иһитиннэрбитинэн, быйыл форумҥа 21 улуустан 181 киһи кыттар. Биэс хайысханан үлэ барар: “Мин инженербын”, оробуочай идэлэри киэҥник тарҕатар «Профlife», “Биһиги доброволецтарбыт”, “Арктика ыччата” уонна “Саха сирин лидердара”.

СӨ бырабыыталыстыбатын уонна баһылыгын дьаһалтатын салайааччыта Афанасий Владимиров кыттааччыларга алгыс тылын эттэ, дойдуларын, төрөөбүт өрөспүүбүлүкэлэрин туһугар туһуланан үлэлииллэригэр баҕарда. “Баҕа санааҕыт олоххо киирдин, былааннаабыккыт туоллун”, — диэн эттэ.

СӨ ыччат дьыалатыгар уонна социальнай коммуникацияҕа миниистир, форум дириэктэрэ Степан Саргыдаев “Синергия Севера” форум кэлиҥҥи сылларга ыччаты түмэр уонна сайыннарар биир улахан былаһаакканан буолбутун бэлиэтээтэ. “Эдэр дьон билсэллэр, санаабыттарын ситиһэллэр, араас соруктары быһаараллар. Биир санаалардааххытын, былаас уорганнарын, бизнес, наука бэрэстэбиитэллэрин уонна экспертары кытта кэпсэтиэххитин, сэһэргэһиэххитин сөп. Олоххутугар улахан уопут ыларгытыгар көмөлөһүөҕэ.”, — диэн эттэ.