Дьөһөгөй куттаах сахалар буоламмыт

Кулун тутар 21 күнэ — Сылгыһыт күнэ. 2017 сыл атырдьах ыйыгар Ил Дархан Сылгыһыт күнүн бэлиэтиир туһунан Ыйаах таһааран турар. Сылгыһыт идэтин өрө тутарга, күүстээх үлэҕэ көҕүлүүргэ туһаайыллыбыт тэрээһин быйыл иккиһин ыытыллар.

Ол курдук быйыл бу күҥҥэ анаммыт өрөс­пүүбүлүкэтээҕи тэрээһиннэр кулун тутар 21-22 күннэригэр Үөһээ Бүлүүгэ ыытыллаллар. Саха сирин бары муннугуттан кэлбит сылгыһыттар төгүрүк остуол тула олорон, сылгыны иитиигэ племенной үлэ, сылгыны үөрдээн иитии туһунан боппуруоһу дьүүллэстилэр. Ону таһынан тыа хаһаайыстыбатын бородууксуйатын быыстапка-дьаарбаҥкатыгар сылгы тириититтэн, сиэлиттэн оҥоһуктарын быыстапката арылынна.

Ыспыраапка

СӨ тыа хаһаайыстыбатын министиэристибэтин дааннайынан, Саха сиригэр сылгы төрүөҕүн аахпакка туран быйыл тохсунньу 1 күнүгэр 178 тыһ. төбө баара биллибитэ, бу көрдөрүү былырыыҥҥыттан 3,3% аҕыйах. Сылгы төбөтүн ахсаана түһүүтүн сүрүн биричиинэтинэн сылгыһыттар 2018 с. ыарахан кыстык ааспытын бэлиэтииллэр. Сылгы төрүөҕэ өрөспүүбүлүкэ үрдүнэн орто көрдөрүүтэ 53% тэҥнэһэр, ол иһигэр ордук Хоту уонна Бүлүү бөлөх улуустарыгар үрдүк көрдөрүүлээх. Күн бүгүн өрөспүүбүлүкэҕэ 4 сылгы собуота үлэлиир — Хаҥаласка “Бөртө”, Ньурбаҕа “Степан Васильев”, Мэҥэ Хаҥаласка “Герой Попов”, Орто Халымаҕа “Өлөөкө күөл” ааттарынан, ол иһиттэн дойду сокуонугар докумуонунан эппиэттиир 2 эрэ хаһаайыстыба учуоттанар. Манна даҕатан эттэххэ, былырыын Ил Дархан бигэргэппит Ыйааҕынан 2024 с. диэри сылгы собуотун 8 хаһаайыстыбаҕа тиэрдэргэ сорук турар.

Кулун тутар 22 күнүгэр үгэскэ кубулуйбут «Сылгыһыт күрэҕэ», племенной сылгылар атыы-дьаарбаҥкалара, ат сүүрдүүтэ тэриллиэ. Онно «Төҥүргэстээх» ипподромҥа 1600, 2400, 3200 уонна 4800 м сүүрдүүгэ саха, приленскэй уонна мэгэдьэк боруода сылгылары кытыннарыахтара.