Төрөөбүт түөлбэ амтаннаах аһа үчүгэйиэн!

Дьокуускай куорат “Кыайыы 50 сыла” спорт дыбарыаһыгар ахсынньы 9 күнүгэр күөх Ньурба туонатыгар оҥоһуллубут бэйэ бородууксуйатын аһа хото атыыланна.

Ас-үөл дьаарбаҥката Ньурбаттан төрүттээх уһулуччулаах судаарыстыбаннай, уопсастыбаннай, политическай деятель Александр Гаврилович Габышев төрөөбүтэ 120 сылын чэрчитинэн ыытылынна. Манна Ньурба улууһугар таһаарыылаахтык үлэлии-хамсыы сылдьар Степан Васильев аатынан сылгы собуота, “Байар”, “Влада”, “МТС-Агро” тыа хаһаайыстыбатын оҥорон таһаарар кооперативтара кытыннылар.
Атыы-тутуу саҕаланыан иннинэ дьаарбаҥканы үөрүүлээхтик арыйдылар. Биир дойдулаахтарын, амтаннаах төрүт бородууксуйанан күндүлүү сылдьар тыа хаһаайыстыбатын тэрилтэтин үлэһиттэрин уонна атыылаһа кэлбит дьону-сэргэни Саха Өрөспүүбүлүкэтин Ил Түмэнин бэрэссэдээтэлин солбуйааччы Антонина Григорьева эҕэрдэлээтэ: «Бастатан туран, өҥ сирдээх-уоттаах, урукку сылларга тыа хаһаайыстыбатыгар өрөспүүбүлүкэҕэ бастыҥ көрдөрүүлээх, аатырбыт Күөх Ньурба улууһуттан быыстапкаҕа кытта кэлбит дьоҥҥо-сэргэҕэ итии-истиҥ эҕэрдэ. Улуус тыа хаһаайыстыбатын сайыннарыытыгар, бэйэ оҥорон таһаарар бородууксуйатын элбэтиигэ үлэлэһэ сылдьар бар дьоҥҥо, биир дойдулаахтарбытыгар Ил Түмэн аатыттан махталбытын тиэрдэбит», — диэтэ уонна үлэ ситиһиилээхтик баран иһэрин бэлиэтээтэ. Ол курдук, ньурбалар окко былааннарын 102,4% толорбуттар, манна Акана, Үөдэй, Дьаархан, Хаҥалас, Күндээдэ, Малдьаҕар, Мэгэдьэк, Ньурбачаан, Таркаайы, Маар, Чуукаар нэһилиэктэрэ үрдүк көрдөрүүлэри ситиспиттэр. Үүт туттарыытыгар былааны 98% толорон, эмиэ куһаҕана суох көрдөрүүлээхтэр. “Онон баһылык Алексей Иннокентьев, баһылыгы солбуйааччы Артур Яковлев уонна Ньурба улууһун оройуоннааҕы Сэбиэтин дьокутааттарын бэрэссэдээтэлэ Сергей Евсеев сатабыллаах салайыыларынан кэнники сылларга тыа хаһаайыстыбатыгар улахан хардыылар оҥоһулуннулар. Хас биирдии нэһилиэк баһылыга, улахан аҥаара эдэр дьон, сүрүн болҕомтотун тыа хаһаайыстыбатыгар ууран, тыа дьонун үлэтин-хамнаһын өйүүргэ үлэлээтилэр», — диэтэ Антонина Григорьева.
Ньурба улууһун баһылыга Алексей Иннокентьев улууска тыа хаһаайыстыбатын салаатыгар ситиһиллибит кыайыылар-хотуулар тустарынан иһитиннэрдэ. Ньурба улууһа тыа хаһаайыстыбатыгар бастыҥ көрдөрүүлээх үс улуус иһигэр киирбитин кэрэхсии иһиттилэр.

Маны таһынан тыа хаһаайыстыбатын аһын-үөлүн дьаарба­ҥкатыгар кэлбит дьону Ил Түмэн тыа сиригэр уонна аграрнай бэлиитикэҕэ сис кэмитиэтин бэрэссэдээтэлэ Андрей Находкин, Ил Түмэн сир сыһыаннаһыыларыгар, айылҕа баайыгар уонна экологияҕа сис кэмитиэтин бэрэссэдээтэлэ Владимир Прокопьев, Саха Өрөспүүбүлүкэтин тыа хаһаайыстыбатыгар миниистирин солбуйааччы Николай Афанасьев эҕэрдэлээтилэр.
Тэрээһини үөрүүлээхтик арыйыы кэнниттэн дьон үөрэ-көтө бородууксуйаны атыыластылар. Манна Күндээдэ үрүҥ аһа, маалыкайдар сылгыларын, убаһаларын этэ, антоновкалар эттэрэ, үрүҥ астара тэлгэннэ уонна да атын амтаннаах ас-үөл атыыланна. Мин атыылаһан тахсан иһэр дьону кытта кэпсэттим.

Валентина Иванова, биэнсийэлээх:
— Мин чохоон атыыластым. Күндээдэлэр киэннэрин олус сөбүлээн ылабын. Амтана ордук курдук, сыаната да удамыр. Бүгүн анаан-минээн Күндээдэ үрүҥ аһын атыылаһа кэллим, бэйэм Тулагыга олоробун. Ньурба Маарыттан төрүттээхпин, 1975 сыллаахха Тулагыга олохсуйбутум, сопхуоска үлэлээбитим. Дьаарбаҥкаҕа үрүҥ ас арааһа баар, көбүөр, сүөгэй, суорат, йогурт, арай, арыыларын аҕалбатахтара хомолтолоох.

Раиса Николаевна, биэнсийэлээх:
— Мин Бүлүүттэн төрүттээхпин, Хатыыга кийииттээбитим. Онно олоро сылдьан “Степан Васильев” сопхуос эмис убаһатын этин олус сөбүлээн сиирим. Бэйэм куоракка олохсуйбутум балачча өр буолла. Дьаарбаҥкаҕа анаан-минээн убаһа этин ыла кэллим. Киилэтин 400 солкуобайга ыллым. Тоҥнуу да сиэхпит, соккуойдуохпут даҕаны. Дойдум салгынын билэн, үөрэн-көтөн баран эрэбин.

Николай Тимофеев, биэнсийэлээх:
— Мин суорат, чохоон, сүөгэй ыллым. Бэйэм быйыл сайын дойдубар Чуукаарга баран сайылаабытым. Оттоон, сир астаан кэлбитим. Идэһэлээхпин. Онон бүгүн эти ылбатым. Ньурбалар кэлин бэйэ оҥорон таһаарыытын салаатыгар улахан таһаарыылаахтык үлэлии сылдьалларын кэрэхсии көрөбүн. Дьиҥэ, киин куораттан ыраах сытар улуус буолан, бу диэки астара кэлэрэ уустук. Онон дьаарбаҥка буоларын истэн, сарсыардаттан хомунан кэллим.

Сардаана КУЗЬМИНА