Ахсынньыттан ханнык быраабыланан олоробут?

Ветеринардарга аналлаах эмтэри хонтуруоллуохтара

Россельхознадзор уонна кини сирдээҕи-уоттааҕы уорганнара ветеринарияҕа аналлаах эмтэри кууһунан уонна бытархай атыылааһын быраабылаларын кэһии туһунан административнай дьыалалары көрүүгэ боломуочуйалары ылаллар.

Онон биэдэмистибэ үлэ­һиттэрэ албын, контрафактнай, хаачыстыбата суох уонна регистрацияламматах ветеринарнай эмтэринэн эргинии эйгэтигэр административнай кэһиилэр тустарынан боротокуоллары оҥоруохтара.

Чунуобунньуктар тас дойдулартан миэбэли атыылаһыылара бобуллар

Ахсынньы 1 күнүттэн Россияҕа тас омук дойдуларыгар оҥоһуллубут миэбэл уонна маһы таҥастааһын бырамыысыланнаһын табаардарын сорох көрүҥнэрин судаарыстыбаннай уонна муниципальнай атыылаһыыга киллэрии бобуллар.
Туһааннаах уурааҕы Россия Бырабыыталыстыбата балаҕан ыйын 5 к. ылыммыта. Докумуоҥҥа бэлиэтэнэринэн, ЕАЭС (Евразия экономическай сойууһа) дойдуларыттан киирэр бородууксуйаҕа ити бобуу тарҕаммат.
Итини таһынан, бу уураах атыы кыттыылаахтарыгар эбии ирдэбили олохтуур. Ахсынньы 1 к. саҕалаан бородууксуйаны оҥорон таһаарыыларыгар Россияттан уонна ЕАЭС судаарыстыбаларыттан полуфабрикаттары туһанар хампаанньалар эрэ ити атыыга кыттыахтарын сөп.
Бобуу 2019 с. ахсынньы 1 к. диэри олохтонор. Ити дьаһал гражданнар интэриэстэрин быһаччы таарыйбат эрээри, кэнэҕэс Аҕа дойдуга оҥоһуллар миэбэл ырыынага үүнүүтүгэр, туһааннааҕынан, бородууксуйа сыаната нам­тааһыныгар тиэрдиэн сөп, диэн Бырабыыталыстыбаҕа ааҕаллар.

Ийэ хапытаалыгар докумуоннары биэрии быраабылата уларыйар

Ахсынньы 4 күнүттэн ийэ хапытаалыгар сайабылыанньаны биэрии быраабылалара уларыйар. Чуолаан, билигин сайабылыанньа биэрэргэ СНИЛС наадата суох буолуоҕа.

Почтанан ыытыллыбыт сайабылыанньалар ылыллаат, тута бастакы күҥҥэ регистрацияланыахтара. Урут бэриллибит сайабылыанньаны 10 күн устатыгар суох оҥоруохха сөп.

Гражданнар туруорсууларыгар хоруйдааһын

Судаарыстыбаннай уорганнарга суругунан сайабылыан­ньаларга, этиилэргэ хоруйу суругунан эрэ биэриэхтэрэ, оттон электроннай суруктарга — электроннай көрүҥүнэн. Итини сэргэ сокуон чопчулуурунан, судаарыстыбаннай уорганнарга туһаайыллар электроннай суруктарга докумуоннар электроннай эрэ көрүҥнээх буолуохтара. Бу иннинэ ону кумааҕы көрүҥүнэн ыытар көҥүллэнэрэ. Ол эрээри киһи Интернеккэ кыайан тахсыбат буоллаҕына, туһааннаах уоргантан сурук көрүҥүнэн хоруйу ылар бырааба докумуоҥҥа бигэргэтиллэр.

Суруктар, сайабылыанньалар көрүллүбэккэ хаалар итиэннэ “биэдэмистибэлэринэн уорганнарга уонна дуоһунастаах сирэйдэргэ тиэрдиллибэт” түгэннэрин кэрискэтин сокуон сорох балаһыанньалара эбэн биэрэллэр. «Бу испииһэккэ туох ис хоһоонноохторун киһи сатаан өйдөөбөт суруктар киллэриллиэхтэрэ», — диэн Госдума гражданскай уопсастыба сайдыытыгар, уопсастыбаннай уонна итэҕэл түмсүүлэрин боппуруостарыгар кэмитиэтин бэрэссэдээтэлин бастакы солбуйааччы Дмитрий Вяткин чопчулаата. Урукку өттүгэр баара-суоҕа маннык икки түгэн көрүллэр этэ — сурук кыайан ааҕыллыбат эбэтэр уһун суруйсуу ыытыллыбыт, хоруйдар дьыала сүнньүнэн бэриллибит, ол эрээри атын санаалар этиллибэтэх буоллахтарына.

Остеопат лицензиянан үлэлиэҕэ

Ахсынньы 12 күнүттэн хат буолууну искусственнайдык быһыыга уонна остеопатияҕа медицинскэй өҥөлөрү оҥорууга анаан туспа лицензияны ылыы ирдэниэҕэ.
Билигин абортар аку­шер­ствоҕа уонна гинекологияҕа медицинскэй көмө быһыытынан уопсай лицензия чэрчитинэн оҥоһуллаллар.
Бырабыыталыстыбаҕа этэллэринэн, саҥа быраабылалар хат буолууну искусственнайдык быһыы процедуратын бэрээдэктиэхтэрэ, статистика отчуотун, ону сэргэ итинник эпэрээссийэлэр хаачыстыбаларыгар судаарыстыба өттүттэн хонтуруолу тупсарыахтара.

Нолуогу ирдэнэртэн аһара ыллахтарына

Гражданнар ирдэнэртэн элбэх нолуогу төлөөбүт тү­гэннэригэр, ону төннөрөр туһу­нан миэстэтигэр баар нолуок сулууспатын уорганнарыгар сайабылыанньа түһэрэр болдьохторо 1 ыйтан 3 сылга диэри улаатыаҕа.
Итини тэҥэ нолуок итинник сууматын төннөрөр туһунан суукка ирдэбил оҥоһуллуутун үс сыллаах болдьоҕо көрүллэр нуорма билигин үлэлиир Нолуок кодексын редакциятыттан сотуллуоҕа.
Ити уларытыылар түмү­к­тэри­гэр суукка дьыала көҕүрүөҕэ итиэннэ аһара төлөммүт нолуогу төннөрүү судургу буолуоҕа. Бу көннөрүүлэр аһара төлөммүт араас хомуурдарга, страховой усунуостарга, пеняларга уонна ыстарааптарга эмиэ сыһыаннаахтар.
Маннык быраабылалар омук тэрилтэлэрин барыстарыттан тутуллубут нолуок суумаларыгар эмиэ туттуллуохтара. Итиннэ быһаарыыны нолуогу төлөөччү учуоттаммыт сиригэр баар нолуок уоргана ылынар. Омук тэрилтэтэ тутуллубут нолуогу төннөрүү туһунан сайабылыанньаны биэриэҕиттэн ыла 6 ый иһинэн быһаарыы ылыллыахтаах болдьоҕо олохтонно.

Автобустары айан иннинэ бэрэбиэркэлиэхтэрэ

Ахсынньы 25 күнүттэн Тырааныспар министиэристибэтинэн олохтоммут уопсай тырааныспарга барытыгар булгуччулаах рейс иннинээҕи хонтуруолу ыытыы бэрээдэгэ күүһүгэр киириэҕэ. Хас биирдии рейс иннинэ анал хонтуруоллааччылар, холобур, автобус бары системалара, ол иһигэр уруула, туормаһа хайдах үлэлииллэрин бэрэбиэркэлиэхтэрэ. Инспекция түмүктэрин анал сурунаалга бэлиэтиэхтэрэ.