13 октября 2017 в 10:46

Баай нэһилиэстибэҕэ — саҥа нолуок?

Сытыйа байбыт Россия дьонун нэһилиэстибэтигэр саҥа нолуогу киллэрэргэ соруналлар. Госдумаҕа туһааннаах сокуон барылын Үлэҕэ, социальнай политикаҕа уонна ветераннар дьыалаларыгар кэмитиэт чилиэнэ Олег Шеин алтынньыга киллэрэр санаалаах. Сокуону оҥорооччу этэринэн, бу көҕүлээһин сыала-соруга – уопсастыбаҕа баайынан-дуолунан араастаһыы салгыы дириҥиирин тохтотуу. Ити туһунан Россия “Парламенын хаһыата” алтынньы 5 к. нүөмэригэр иһитиннэрдэ.

«Олус баай аҕатыттан тиксибит иирбит баайдаах-дуоллаах, кыахтаах, саҥа “нэһилиэстибэнэн аристократтар” уопсастыбалара үөскүүрүн баҕарбат буоллахпытына, маннык сокуон тыын суолталаах», — диир парламентарий Олег Шеин.

Шеин маннык “супернэһилиэстибэ” өйдөбүлүгэр 24 мөл. солк. сууманы аһарар үптээхтэри эбэтэр эмиэ итинник сыаналаах хамсаабат баайдаах дьону киллэрэрин чопчулаата. Сабаҕаланар саҥа нолуок кээмэйэ төһө буолуоҕун эппэтэ, ол эрээри маннык нолуок көрүҥэ номнуо АХШ-гар уонна Францияҕа үлэлиирин санатта.
“Супернэһилиэстибэ” холобурунан кини ааспыт үйэ 90-с сылларыгар сырьену оҥорон таһаарыыттан остуоруйаҕа курдук байбыт уонна нэһилиэнньиктэрин төрөппүт олигархтары ааттаата. Холобур, 2017 сылга баайа-дуола 9,8 млрд долларга тэҥнэспит Роман Абрамович сэттэ оҕотуттан хас биирдиилэрэ 1,38 млрд доллар өлүүлээх нэһилиэстибэҕэ суоттаныан сөп. Оттон «Лукойл» баһылыгын, ньиэп магнатын Вагит Алекперов соҕотох уола 14,5 миллиард доллар кээмэйинэн нэһилиэстибэни ылар бырааптаах. Forbes сурунаал оҥорбут баай бизнесменнэр нэһилиэнньиктэрин испииһэгин быһыытынан, Россия 20 саамай баай дьиэ кэргэттэрин 47 оҕотугар ортотунан 2,3 млрд доллартан итэҕэһэ суох тиксэр.
2016 сылга РЛДП-тан депутаттар бөлөхтөрө Нолуок кодексыгар көннөрүүлэри Госдумаҕа киллэрбитэ. Ол быһыытынан, физическэй сирэйдэр дохуоттарыгар билигин баар плоскай дэнэр нолуок көрүҥүн прогрессивнайга уларытарга эппиттэрэ.
Бу сокуон барылыгар 15 тыһ. солк. үрдүгэ суох хамнастаах дьону НДФЛ төлүүртэн босхолуурга, төттөрүтүн үрдүк дохуоттаахтарга үрдэтиллибит нолуогу түһэрэргэ этиллэр. Ол курдук, 2,4 мөлүйүөнтэн 100 мөл. солк. диэри дохуоттаах дьоҥҥо 289 тыһ. солк., онуоха 2,4 мөл. солк. аһарар суумаҕа 30 бырыһыаны эбэн туран, нолуогу олохтуурга этиллэр. Сыллааҕы дохуота 100 мөл. солк. аһарар буоллаҕына, маннык баайдаах киһи хааһынаҕа 29,6 мөл. солк. таһынан, ити суумаҕа эбии дохуотун 70 бырыһыанын нолуок быһыытынан төлүөхтээх.