Балыктааһын уонна уу биологическай баайын харыстааһын

Госдума туһааннаах кэмтиэтин бэрэссэдээтэлэ Николай Николаев истиилэри аһарыгар бэлиэтээбитинэн, балыктааһын салаатыгар сыһыаннаһыылары сүрүннүүр сокуоннар мэлдьи элбэх мөккүөрү тардаллар.
Мунньах кыттыылаахтара балык салаатыгар айылҕаны туһаныы көдьүүһүн үрдэтии, балыгы бултааһыҥҥа квоталары тыырыы, ол иһигэр балыгы бултуур флот, аквакультура, Кыһыл кинигэҕэ киирбит балыктары ууһатыы итиэннэ хапытаалынай ороскуоттары субсидиялааһын боппуруостарын дьүүллэстилэр.

Манна бэйэлэрин санааларын, этиилэрин Балыктааһыҥҥа федеральнай агентство салайааччытын солбуйааччы Петр Савчук, Россельхознадзор салайааччытын солбуйааччы Николай Власов, Госдума депутаттара Владимир Блоцкай уонна Борис Гладких иһитиннэрдилэр.

Ил Түмэн сис кэмитиэтин бэрэссэдээтэлэ Владимир Прокопьев тыл этиитигэр Россия балык хаһаайыстыбатыгар ыытар политиката сүнньүнэн муораҕа балыктааһыны сайыннарыыга уонна сүрүннээһиҥҥэ туһу­ланарын, маныаха федеральнай сокуоннар үгүс балаһыанньалара дойду тууһа суох уулаах ис объектарыгар балыктааһыны сүрүннээһиҥҥэ табыгаһа суохтарын бэлиэтээтэ. «Саха Өрөспүүбүлүкэтигэр, Россия Феде­рациятын атын субъектарыгар курдук, балыктааһын тууһа суох уулаах объектарга эрэ ыытыллар”, — диэтэ кини.

Итини сэргэ Владимир Прокопьев  тууһа суох уулаах объектарга сыһыаннаан квоталары өлүүлээн бигэргэтии туһунан 10 сыл болдьоххо түһэрсиллибит дуогабардар мөлтөх өрүттэрин, квоталары суһаллык хаттаан тыырар кыах суоҕун, балыктааһын салаатыгар күрэстэһиини суох оҥорууну, балыктааһын кээмэйин улаатыннарар итиэннэ саҥа тэриллибит балыктыыр хаһаайыстыбалар сайдар кыахтара суоҕун бэлиэтээтэ.
Кини хас биирдии региоҥҥа балык­тааһын быраабылаларын бигэргэтиини регионнааҕы таһымҥа биэрии боппуруоһун көтөхтө. Ол курдук, Владимир Прокопьев этэринэн, балык хаһаайыстыбатын бассейннарынан быраабылалары бигэргэтии регионнааҕы уратылары учуоттаабат.
Норуот депутата Илиҥҥи Сибиирдээҕи балык хаһаайыстыбатын бассейныгар аналлаах балыктааһын быраабылаларынан олохтоммут уу баайын бултааһыны бобуу болдьохторо Саха сирин климатын усулуобуйаларыттан тутулуктанан суһаллык көннөрүллэр кыахтара суоҕар, ол балыктааһыҥҥа мөлтөх сабыдыаллааҕар истии кыттыылаахтарын болҕомтотун тарта.

Салгыы Владимир Прокопьев кэккэ этии­лэри киллэрдэ. Бастакытынан, “Илиҥҥи Сибиир­дээҕи балык хаһаайыстыбатын бассейныгар балыктааһын быраабылаларын бигэргэтэр туһунан” РФ Тыа хаһаайыстыбатыгар министиэристибэтин бирикээһигэр уу биологическай баайын бултааһыны бобуу болдьохторун көһөрүү чааһыгар уларытыылары киллэрэргэ; иккиһинэн, балыктааһын быраабылаларын бигэргэтиигэ, уу объектарын мелиорациятын ыытыы бэрээдэгин олохтооһуҥҥа, уу биологическай ресурсаларын искусственнайдык үөскэтиини тэрийиигэ боломуочуйалары РФ субъектарын толоруулаах былааһын уорганнарыгар биэрэргэ; үсүһүнэн, “тууһа суох уулаах объектарга промышленнай балыктааһын” диэн өйдөбүлү «муоратааҕы уу объектарыгар промышленнай балыктааһын” диэн өйдөбүлтэн араарыы боппуруоһун көрөргө, онуоха тууһа суох уу объектарыгар промышленнай бултааһыны ыытыыга уу биологическай баайын бултааһын квоталарын өлүүлээһини бигэргэтии туһунан дуогабары булгуччу түһэрсэр туһунан балаһыанньалары сотуу суолунан барарга эттэ.
Владимир Прокопьев “Ойоҕос балыктаа­­һынынан дьарыктаныы туһу­нан” федеральнай сокуону ылыныыны түргэтэтэр наадалааҕын бэлиэтээтэ. «Хоту сиргэ, Сибииргэ уонна Уһук Илиҥҥэ балыктааһын сүнньүнэн илиминэн ыытыллар, ол курдук балык үгүс көрүҥүн күрүчүөгүнэн хаптарар кыаллыбат. Уһук Хоту сиргэ олорор нэһилиэнньэҕэ балыктааһын олохторун үгэскэ киирбит укулаатын харыстыыр дьарыктарынан буолар, – диэтэ парламентарий. – Сокуон барылынан тустаах балыксыкка көҥүллүүр докумуону гражданнарга биэриини толорор былаас федеральнай уорганнарын боломуочуйатыгар сыһыарар туһунан этиллэр. Саха сиригэр Уһук Хоту сиргэ-уокка олохсуйбут 13 оройуонтан 3-гэр Росрыболовство сирдээҕи-уоттааҕы управлениетын отделлара бааллар, оттон авиабилиэт сыаната 40 тыһ. солк. тэҥ, онон көннөрү ойоҕос дьарыктаах киһи Росрыболовство управлениетыгар көҥүлү ылаары кэлэрэ кыаллыбат”.

Кини ыйбытынан, өрөспүүбүлүкэ сиригэр-уотугар уу биологическай ресурсаларыгар сылы эргиччи судаарыстыбаннай мониторины киллэрии боппуруоһа сытыытык турар. Ити мониторинг федеральнай бюджеттан үбүлээһин тиийбэтиттэн ыытыллыбат. Владимир Прокопьев научнай чинчийиилэри ыытыыга судаарыстыба сорудаҕын үбүлээһини улаатыннарарга этии оҥордо.

Хаартыскалар Госдума официальнай
сайтыттан туһанылынна.