14 сентября 2018 в 09:43

Бородуукта хаачыстыбатын бэрэбиэркэлээһин күүһүрүөҕэ

С удаарыстыба өттүттэн суобаһа суох оҥорон таһаарааччыларга уонна ас-үөл бородуукталарын атыылааччыларга хонтуруол күүһүрүөн сөп. Хонтуруоллуур уорганнар ас-үөл бородуукталарын хаачыстыбатын уонна куттала суоҕун былааны таһынан бэрэбиэркэлээһини ыытар быраабы ылыахтарын сөп. Сокуоҥҥа маннык көннөрүүлэри депутаттар Аграрнай боппуруостарга кэмитиэт балаҕан ыйын 12 к. мунньаҕар дьүүллэстилэр.

Бу көҕүлээһини Удмуртия Өрөспүүбүлүкэтин сокуону оҥорор мунньаҕа бэлэмнээбитэ. Ааптардар бэлиэтииллэринэн, Россиятааҕы ас-үөл ырыынагар албыннааһын проблемата саамай сытыылартан биирдэстэрэ буолар.

Россельхознадзор дааннайдарынан, 2017 сылга Россиятааҕы эт ырыынагар албын бородууксуйа ылар өлүүтэ 21,9% тэҥнэспитэ, үүт ырыынагар — 19,4%. Сүрүн кэһиилэр — сырьену атынынан солбуйуу, үүт уонна сүөһү сыатын үүнээйиттэн ылыллыбытынан солбуйуу. Докумуоҥҥа быһаарыы сурукка этиллэринэн, туһанааччылар хаачыстыбалаах уонна куттала суох табаардарга бырааптаахтар, онон хаачыстыбата суох, кутталлаах, ол иһигэр албын ас-үөл бородууксуйатын оҥорон таһаарыыга уонна онон эргиниигэ сокуоннайа суох үлэни тохтотор туһугар судаарыстыба өттүттэн хонтуруол күүһүрэрэ ирдэнэр.

Сокуону оҥорооччулар “Судаарыстыбаннай хонтуруолу уонна муниципальнай хонтуруолу олоххо киллэриигэ юридическай сирэйдэр уонна биирдиилээн предпринимателлэр бырааптарын көмүскээһин туһунан” ФС 1-кы ыстатыйатын 3-с чааһыгар эбии пууну эбэргэ этэллэр, ол быһыытынан бэрэбиэркэлэри тэрийии уонна ыытыы бэрээдэгин олохтуур ити сокуон балаһыанньалара албын ас-үөл бородуукталарын (ол иһигэр биологическай активнай эбиискэлэри), болдьохторо ааспыт аһылык бородуукталарын оҥорууга уонна онон эргиниигэ утарсар дьайыылаах хонтуруоллуур тэрээһиннэргэ туһаныллыбат буолуохтара.