719

13 октября 2017 в 10:42

Бырааһынньык күннэрин уларытыахха дииллэр

РФКП депутаттара бырааһынньык халандаарын уларытар туһунан сокуон барылын Госдумаҕа киллэрбиттэрэ.

Геннадий Зюганов баһылыктаах РФКП фракциятын депутаттара Госдума көрүүтүгэр бырааһынньык халандаарыгар уларытыылар тустарынан сокуон барылын киллэрдилэр.


Ол курдук, парламентарийдар билиҥҥи тохсунньу 1-6, 8 күннэригэр диэри уһуур сынньалаҥ күннэрин оннугар ахсынньы 31, тохсунньу 1, 2 уонна 3 күннэрин саҥа дьыллааҕы бырааһынньык, сынньалаҥ күннэринэн биллэрэргэ этиилээхтэр. Кинилэр санааларынан, бу нуорма гражданнар Саҥа дьылы бэлиэтээһиҥҥэ холкутук – бүгүҥҥү курдук ыксаабакка-тиэтэйбэккэ уонна үлэ кэмин ороскуоттаабакка бэлэмнэнэллэригэр кыах биэриэҕэ.
Маны сэргэ хомуньуустар үлэлээбэт күннэр ахсааннарыттан саҥа дьыллааҕы каникуллары, чуолаан тохсунньу 4, 5, 6 уонна 8 күннэрин таһаарар этиилээхтэр, ону кинилэр гражданнартан туһааннаах туруорсуулар элбэхтик киирэллэринэн быһаараллар.
«Билиҥҥи кэмҥэ Россия гражданнара саҥа дьыл иннинэ хамнаһа суох хаалаллар итиэннэ үлэ күннэрин толору көрүҥүнэн төннөрөрү ирдииллэр», – диэн быһаарыы сурукка этиллэр.
Итини таһынан, депутаттар кулун тутар 18 күнүн – Крым Россияны кытта холбоһуутунан күнүн – бырааһынньык күнүнэн биллэрэргэ ыҥыраллар. Бэс ыйын 12 күнүн оннугар от ыйын 28 күнүн Россия Күнүнэн, үлэлээбэт күнүнэн биллэрэри тоҕоостооҕунан ааҕаллар. «Бу дата история суолталаах түгэннэрин кытта, ол курдук Нуучча сиригэр Кириэстээһини кытта сибээстээх, оччотооҕуга кинээс Владимир салалтатынан судаарыстыба түмсүбүтэ. Чуолаан бу кэмҥэ славяннар: улуу нуучча, украинец уонна белорус норуоттарын сомоҕолоһуута баара. Ити бырааһынньык – от ыйын 28 к. чугастыы славянскай норуоттар доҕордоһуулара салгыы сайдарыгар көмөлөһүөҕэ», — диэн ааҕаллар парламентарийдар.


Депутаттар маны сэргэ сэтинньи 4 күнүн – Норуот сомоҕолоһуутун күнүн оннугар сэтинньи 7 күнүгэр – Улуу Октябрьскай Социалистическай өрөбөлүүссүйэ күнүн, үлэлээбэт бырааһынньык күнүн олохтуурга этии киллэрэллэр.
«Сэтинньи 7 күнүн үлэлээбэт бырааһынньык күнүнэн биллэрии – бу дойдуну дьадайыыттан уонна хараҥа олохтон таһаарбыт, норуот модун судаарыстыбатын – ССРС-һы үөскэппит биһиги өбүгэлэрбитигэр ытыктабыл бэлиэтэ”, — диэн сыһыарыыга суруллар.
Бу сокуон ылыллар түгэнигэр үлэлээбэт бырааһынньык күнүн сылга 2 күнүнэн сарбыйарга былаанныыллар.

Поделиться