Эми – Интернет нөҥүө

Туһанааччыларга табыгастаах буоллун диэн

«Сокуон барылын сыала-соруга – эмтиир препараттар нэһилиэнньэҕэ тииһимньилээх буолууларын үрдэтии, – диэн Россия монополияны утары федеральнай сулууспатын (ФАС) социальнай эйгэни уонна эргиэни хонтуруоллааһыҥҥа управлениетын начальнига Тимофей Нижегородцев ыйда. – Докумуон ылылыннаҕына, үгүс дьон эмп препараттарыгар тииһиниилэрэ судургутуйуоҕа».
Билигин үлэлиир сокуонунан, гражданнар сорох категорияларыгар, ол иһигэр ССРС дьоруойдарыгар уонна ветераннарга эрэ эмп тиэрдиллэр, бу түгэҥҥэ рецебинэн уонна рецебэ суох бэриллэр диэн араарыллыбат. «Сокуон барыла үгүс туһанааччылар олохторун чэпчэтиэҕэ, – диэтэ Тимофей Нижегородцев. –Дьон араас аптекаларга эмп сыанатын көрөн, сөптөөҕү талар кыахтаныахтара. Ити фармацевтическай ырыынакка күрэстэһиини күүһүрдүөҕэ».

Маныаха ФАС бэрэстэбиитэлэ бэлиэтээбитинэн, эми Интернет нөҥүө ким баҕарар ыраахтан атыылыырын туһунан этиллибэт. «Сокуон барылыгар сурулларынан, Интернеккэ туһааннаах аптека эрэ регистрацияланар, – диэн быһаарда Тимофей Нижегородцев. – Аптека киниэхэ баар эрэ эмтэри атыылыаҕа итиэннэ муниципальнай оройуон эбэтэр куорат уокуругун эрэ чэрчитинэн препараттары атыылыырыгар быраап бэриллиэҕэ. Онтон атын сайтары Росздравнадзор билиһиннэриитинэн Роскомнадзор тохтотуоҕа».

«Куттал суох буолуутун быраабылалара» тутуһуллуохтара

Госдума доруобуйа харыстабылыгар кэмитиэтин бэрэссэдээтэлин бастакы солбуйааччы Федот Тумусов маннык көҕүлээһин булгуччу тахсыахтааҕа кэтэһиллибитин ыйда. «Ырыынак сөптөөхтүк сайдарын туһугар бу сокуон барылын ылынар сөптөөх, – диэн ааҕар депутат. – Билигин эми Интернет нөҥүө атыылааһын номнуо бара турар, итиэннэ Росздравнадзор дааннайдарынан, соччо чиэһинэйэ суох. Бу атыы сөптөөхтүк сүрүннэммэтиттэн сылтаан ырыынакка элбэх контрафакт «күүлэйдиир». Онон үөһэ этиллибити таһынан, бу сокуон Интернет нөҥүө атыыланар эмтэр хаачыстыбаларын хонтуруоллуур дьайыылаах ньыманан буолуоҕа».

Федот Тумусов этэринэн, рецебэ суох эрэ эмтэри ыраахтан атыылыыры көҥүллүөххэ сөп дуу эбэтэр аптекалар пациеннарга рецебинэн бэриллэр препараттары аҕалаллара эмиэ туох да куһаҕана суох дуу диэн боппуруостар мөккүөрдээхтэр. «Эмп бары көрүҥүн ыраахтан атыылыыры көҥүллүүр санааны тутуһабын», – диэтэ парламентарий.
Госдума доруобуйа харыстабылыгар кэмитиэтин чилиэнэ Александр Петров сокуон барыла бастакы ааҕыыга ылылларыгар мэһэй суох буолуоҕун саарбахтаабат. «Концепция быһыытынан кини ааһыаҕа, – диэн быһаарда парламентарий. – Ол эрээри иккис ааҕыыга улахан дьүүллэһии буолуон сөп». Ол иһигэр Интернет нөҥүө рецептээх эмтэри атыылааһыҥҥа сыһыаннаах санаа атастаһыыта буолуон сөп. «Маннык ньыманан рецептээх эмтэри да атыылааһыны көҥүллээһиҥҥэ туох да куһаҕан суох, – диэн сөбүлэһэр Александр Петров. – Санатар буоллахха, билигин эмтэри маркировкалааһын систематын киллэрии бара турар, ити хас биирдии препарат оҥорон таһаарааччыттан туһанааччыга айанын кэтээн көрөр кыаҕы биэриэҕэ. Ол эбэтэр ханнык баҕарар пациент киниэхэ дьиҥнээх эбэтэр албын эми аҕалбыттарын учуот систематыгар көрөр кыахтанар. Ону сэргэ хонтуруоллуур уорганнар аптекаҕа киирбэккэ да эрэ төһө рецептээх препараттар аҕалыллыбыттарын, аптекаҕа төһө рецепт баарын көрөр кыахтаныахтара».
Парламентарий санаппытынан, бу система операторынан федеральнай Нолуок сулууспата буолуохтаах. «Ити ирдэбил олус кытаанах буолуоҕун туһунан этэр, – диэтэ Александр Петров. – Билигин эмтэри маркировкалааһыҥҥа боруобалааһын бырайыак олоххо киирэр, номнуо икки холуобунай дьыала тэрилиннэ. Олор туохха олоҕуралларый? Биир холобур. Судаарыстыба атыылаһыытынан балыыһаҕа ыарахан сыаналаах эмтэр аҕалыллыбыттара, быраастар ону списаниеҕа ыытан баран, Интернет нөҥүө «күлүк ырыынакка» атыылыы сатаабыттар. Ити кэмҥэ биллэн тахсыбыт».

Интернет нөҥүө эми атыылааһыны көҥүллүөх­тээхтэринэн сибээстээн уопсас­тыбаҕа сэрэхэдийиини Бырабыыталыстыба таһымыгар эмиэ уҕарытар санаалаахтар. Вице-премьер Ольга Голодец Госдумаҕа сокуон барылын ситэрэр кэмҥэ бары өрүттэри кытта өссө төгүл дьүүллэһэргэ сорудахтаата. Аптека ситимнэрин Россиятааҕы ассоциациятын (РААС) толорор директора Нелли Игнатьева туһанааччыларга эмп препараттара хайдах тиэрдиллиэҕин туһунан толкуйдуурга этии оҥордо. «Лицензиялаах аптека тэрилтэлэрэ эрэ тиэрдэллэригэр көҥүллүөххэ наада, – диэтэ кини. – Туһанааччыга эми фармацевт эрэ биэриэхтээх. Ону таһынан, ити көһө сылдьар аптека буоларын курдук логистиканы тэрийиэххэ наада, бу эми харайыы быраабылаларын тутуһууга суолталаах».

Хаартыскаҕа Михаил Нилов түһэриилэрэ
(«Парламент хаһыата»).