Ил Түмэн спикерэ Уһук Илин уонна Байкал регионун сайдыытыгар Сэбиэт састаабыгар киирдэ

Бу саҥа Сэбиэт Федерация Сэбиэтин 2018 сыл тохсунньу 31 күнүгэр тахсыбыт 23 №-дээх уурааҕынан тэриллибитэ. Бэрэссэдээтэлинэн Федерация Сэбиэтин оборонаҕа уонна куттал суох буолуутугар кэмитиэтин чилиэнэ Вячеслав Штыров анаммыта. Туһааннах Сэбиэт Уһук Илин уонна Байкал регионун кэлимник сайдыытын сокуон өттүттэн хааччыйыыны тупсарар, ол иһигэр сокуоннары бэлэмниир, көҕүлүүр соруктаах.

Маннык Сэбиэти тэрийэр ту­һунан этиини Вячеслав Шты­ров 2017 сыл алтынньыга Федерация Сэбиэтин күһүҥҥү сессиятын бастакы мунньаҕар көтөхпүтэ. Саха Өрөспүүбүлүкэтин Ил Түмэнин Бэрэссэдээтэлэ Александр Жирков 2017 сыл ахсынньы 15 күнүгэр Федерация Сэбиэтин пленарнай мунньаҕар «Субъект чааһыгар» Уһук Илин уонна Байкал регионун парламентарийдарын ааттарыттан туһааннаах Сэбиэти тэрийэр туһунан  Федерация Сэбиэтин Бэрэссэдээтэлэ Валентина Матвиенкоҕа этии киллэрбитэ.

Сэбиэт бастакы мунньаҕар сүрүн дакылааты Уһук Илин сайдыытын миниистирин солбуйааччы Павел Волков оҥордо.

Федерация Сэбиэтин иһинэн Уһук Илин уонна Байкал регионун сайдыытын боппуруостарыгар Сэбиэт бэрэссэдээтэлэ Вячеслав Штыров Уһук Илин сайдыытын туһунан уопсай сокуону оҥоруу наадалааҕын туһунан эттэ. Онно бу иннинэ ылыллыбыт сокуону көҕүлээһиннэр киирэн биэриэхтээхтэр. Сенатор санаппытынан, кэнники түөрт сылга Уһук Илин сайдыытыгар барыта 30-тан тахса сокуон суолталаах аакта ылыллыбыт.

Сэбиэт састааба РФ Федеральнай Мунньаҕын Федерация Сэбиэтин Бэрэссэдээтэлэ Валентина Матвиенко 2018 с. кулун тутар 20 к. 38рп-СФ №-дээх дьаһалынан бигэргэннэ.  Ил Түмэн спикерэ Александр Жирков Сэбиэт састаабыгар киирдэ. Сэбиэт үлэтэ туһааннаах хайысхаларынан 8 секцияҕа араарыллыаҕа.

Бастакы мунньах кыттыылаахтара Федерация Сэбиэтин иһинэн Уһук Илин уонна Байкал регионун сайдыытын боппуруостарыгар Сэбиэт 2018 сыллааҕы үлэтин былаанын көрдүлэр. Саха Өрөспүүбүлүкэтин этиилэрэ бу былааҥҥа киллэриллиэхтэрэ.

Ил Түмэн спикерэ Александр Жирков, Сэбиэт бастакы мунньаҕын түмүктэринэн манныгы бэлиэтээтэ:

«Федерация Сэбиэтин чэр­ч­итинэн маннык тэриллии­ни үөскэтэр туһунан биһиги өрөспүүбүлүкэбит итиэннэ Уһук Илин атын бары регионнара балайда өрдөөҕүттэн туруорса сатаабыппыт. Бу олохтоохтор Уһук Илин уонна Байкал регионун бүтүннүүтүн кэлим сайдыытын стратегиятын үөскэтиини туруорсар кэмнэригэр тутуһар санааларын кытта эмиэ сибээстээх. Ол эрээри Уһук Илиҥҥэ кэлим быһаарыыны толору ылынар өссө да кыалла илик. Уһук Илин сайдыытыгар биир кэмнээх уонна ханнык эрэ чопчу сиргэ-уокка туһаайыллар боппуруостар кэлимник быһаарыллалларыгар Вячеслав Штыров салайааччылаах саҥа тэриллибит Сэбиэт түмэр структуранан буолуоҕа. Бу улахан суолталаах.

Сэбиэт мунньаҕар май­гын­наһар социальнай-экономическай балаһыанньалаах, проблемалардаах Уһук Илин регионун да, Байкал регионун да биир кэлим бырагыраамаҕа, биир кэлим сиргэ-уокка киллэрии наадатын туһунан боппуруостар көтөҕүлүннүлэр, чуолаан бу сир-уот сайдыытыгар Россия Федерациятын стратегията эрдэттэн туһаайыллыбыта. Ити сөптөөх быһаарыы буолуоҕа».

Хаартыскаҕа: (хаҥастан уҥа) Уһук Илин уонна Байкал регионун сайдыытыгар Сэбиэт чилиэннэрэ – Ил Түмэн спикерэ А.Жирков, Хабаровскай кыраайтан сенатор В.Озеров, Магадан Думатын спикерэ С. Макаров, Иркутскай уобалас парламенын спикерэ С.Брилка.