Приставтар пенсия харчытын тутуохтара суоҕа

Суут толорор үлэтин чэрчитинэн гражданнар социальнай счеттарыттан пристав харчыны ирдиир кыаҕа суох буолуоҕа. Госдума чугастааҕы пленарнай мунньаҕар бастакы ааҕыыга көрүөхтээх сокуонун барыла ылылыннаҕына, итинник счеттар баар буолуохтара.

Тутан ылартан иммунитет

«Толорор производство туһунан» сокуоҥҥа ирдэбил оҥоһуллубат дохуоттар көрүҥнэрэ быһаарыллаллар. Онно пенсия, алименнар, доруобуйаҕа буортулаах дьайыы иһин толуйуу, социальнай төлөбүрдэр, көмө харчы, ийэ хапытаалын үбэ, командировкаҕа бэриллэр харчы киирэллэр. Ол эрэн билигин ити харчы баан көннөрү счетугар түһэриллэр буолан, суут быһаарыытынан иэстээх дьонтон тутуохтарын сөп. Олор социальнай дохуот буолаллара кэнники эрэ чуолкайданар.
2015 сылга толорор производство туһунан сокуоҥҥа киллэриллибит нуорма быһыытынан, иэстээх киһи киниттэн ирдэммэт дохуоттар баалларын бигэргэтэр докумуоннары суут приставыгар биэриэхтээх. Ол эрээри иэстээх киһиэхэ толорор производство тэриллибитин туһунан иһитиннэрбит эрэ түгэҥҥэ ити механизм үлэлиир.
Госдума судаарыстыбаннай тутууга уонна сокуону оҥорууга кэмитиэтин чилиэнэ Зариф Байгускаров («Биир ньыгыл Россия») этэринэн, гражданнар тутуллубут социальнай төлөбүрдэри суут нөҥүө эрэ төннөрөргө күһэллэллэр. Суут приставтарын Федеральнай сулууспатын сирдээҕи-уоттааҕы уорганнарын дааннайдарынан, 2016 сылга социальнай төлөбүрдэри уһулбут дьайыыларга сыһыаннаан 269 сайабылыанньа бэриллибит. Ол түмүгэр ааспыт сылга дьонтон алҕас тутуллубут 4,1 миллиард солк. төннөрүллүбүт.
Сокуон барылын ааптардара социальнай төлөбүрдэргэ аналлаах баан анал счеттарын арыйарга этии оҥороллор. Оччоҕуна онтон харчыны уһулар табыллыбатын туһунан приставтар билэр буолуохтара. «Социальнай төлөбүрдэр тутууттан иммунитеттаах буолуохтара», — диэн бэлиэтээтэ Зариф Байгускаров.
Ити счеттартан харчыны бас билээччи эбэтэр төлөбүрү ыытааччы дьаһалынан сокуоҥҥа этиллибит түгэннэргэ эрэ биэриэхтэрэ. Депутат Сергей Иванов (ЛДПР) кэмитиэт мунньаҕар ханнык бааннарга итинник счеттар аһыллыахтарын ыйытта. «Биир ньыгыл Россия» чилиэннэрэ ааҕалларынан, ити Сбербаан буолуон сөп.

Биир мөлүйүөҥҥэ диэри ыстараап

Баан анал социальнай счетугар баар харчыны тутуу эбэтэр уһулуу көҥүллэммэт. Толоруулаах уорганнар социальнай төлөбүрдэри баан анал счетугар түһэрбэт түгэннэригэр, туспа сокуон барылынан эппиэтинэһи олохтуур көннөрүүлэри Административнай буруйу оҥоруулар тустарынан Кодекска киллэрэр туһунан этии баар. Ити кэһии иһин 30-50 тыһ. солк. диэри ыстараап суоһуоҕа. Бааннар анал счеттарга сокуонунан бобуллубут операциялары оҥордохторуна, 100 тыһыынчаттан 1 мөл. солк. диэри ыстараабы төлүөхтэрэ. Аллараа палаата судаарыстыбаннай тутууга кэмитиэтин мунньаҕар этиллибитинэн, холобур, баан 5 тыһ. солк. суумаҕа кэһиини оҥорбут түгэнигэр ити олус улахан ыстараап буолар. Онон иккис ааҕыыга сокуон барылыгар туһааннаах уларытыылар киириэхтэрин сөп.

Докумуон Госдума судаарыстыбаннай тутууга, куттал суох буолуутугар уонна коррупцияны утары үлэҕэ кэмитиэттэрин мунньахтарыгар биһирэннэ.
«Судаарыстыба социальнай өйөбүлгэ харчы анааһына, онтон ону уһулан ылыы – балайда тэнийбит балаһыанньа. Биир илиибитинэн биэрэбит, атынынан былдьаан ылабыт», – диэн үп ырыынагар кэмитиэт баһылыга Анатолий Аксаков эттэ.
Госдума куттал суох буолуутугар кэмитиэтин салайааччы Василий Пискарёв бэлиэтээбитинэн, үөһэ этиллэр көҕүлээһин судаарыстыба дьоҥҥо биэрэр көмөтө тыытыллыбат буолуутун хааччыйыаҕа. «Гражданнар сорох категориялара тыыннаах буолууларыгар маннык социальнай төлөбүрдэр үгүстүк сүрүн тирэҕинэн буолаллар», – диэтэ парламентарий.
Сокуон барылын Бырабыыталыстыба уонна Киин Баан өйөөбүттэр. Федерация Сэбиэтигэр сокуону көҕүлээһини эмиэ биһирииллэр.