Спикер Госдумаҕа уонна Федерация Сэбиэтигэр көрсүһүүлэри ыытта

Ол курдук, Саха сирин парламенын спикерэ Петр Гоголев РФ Федеральнай Мунньаҕар Госдумаҕа уонна Федерация Сэбиэтигэр Саха сириттэн Госдума депутаттара Галина Данчикованы уонна Федот Тумусовы, Госдума аграрнай боппуруостарга кэмитиэтин бэрэссэдээтэлэ Владимир Кашины, Госдума регион политикатыгар уонна Хоту сир проблемаларыгар кэмитиэтин бэрэссэдээтэлэ Николай Харитоновы, айылҕа ресурсаларыгар, бас билиигэ уонна сир сыһыаннаһыыларыгар кэмитиэт бэрэссэдээтэлэ Николай Николаевы, ГД доруобуйа харыстабылыгар кэмитиэтин бэрэссэдээтэлэ Дмитрий Морозовы, Федерация Сэбиэтигэр бэрэссэдээтэл секретариатын салайааччыта Наталья Удалованы уонна кини солбуйааччыта Александр Краскону, Федерация Сэбиэтин чилиэнэ Александр Акимовы кытта көрүстэ.

Ити түмүгэр 2019 сыл бэс ыйын бүтүүтэ Дьокуускайга Национальнай Ойуур форумун, балаҕан ыйыгар Госдума доруобуйа харыстабылыгар кэмитиэтин көһө сылдьар мунньаҕын тэрийии уонна ыытыы, ону сэргэ Ил Түмэн көҕүлээбит федеральнай сокуоннарын барылларын, парламент спикерэ эксперт быһыытынан кыттыытын боппуруостарыгар кэккэ сөбүлэһиилэр ситиһилиннилэр.

Петр Гоголев ахсынньы 12 күнүгэр  омук дойдуларыттан бэрэстэбиитэллэри түмпүт «XXV лет Конституции Российской Федерации: трансформация парадигмы права в цивилизационном развитии человечества» Бүтүн Россиятааҕы научнай конференция пленарнай мунньаҕар кыттыыны ылла. Бу тэрээһини фундаментальнай чинчийиилэр Россиятааҕы фондаларын өйөбүлүнэн РНА судаарыстыба уонна быраап Института, Россия юристарын Ассоциацията тэрийэн ыыттылар.

Ил Түмэн бэрэссэдээтэлэ федерация субъектарын сокуоннарын кодификациялааһын кэскиллэрин туһунан дакылаат оҥордо. Мунньах кыттыылаахтара экологияҕа сокуоннары системалааһын, өрөспүүбүлүкэ сокуоннарын кодификациялааһын чэрчитинэн юридическай эппиэтинэс правовой конструкцияларын туһунан чопчулуур ыйытыылары биэрдилэр. Кинилэр Саха сирин парламенын экспердиир үлэтигэр кыттарга бэлэмнэрин биллэрдилэр.

Бу күн “Номоххо киирбит Максим кыргыттара” диэн кинигэ сүрэхтэниитэ буолла. Кинигэ Максим Кирович кыра кыыһа Лена Максимовна Аммосова баҕатынан хомуллан, “Бичик” кинигэ кыһатыгар сахалыы уонна нууччалыы тылларынан 1600 экземплярынан тахсыбыта.

Аэлита, Яна уонна Лена дьылҕаларыгар 1930-с сыллар иэдээннээх түгэннэрэ дьайыылаах буолбуттара. Ыарахаттары аахсыбакка, дьиэ кэргэн аҕаларын кэриэстээн,  историяны дьиҥнээҕинэн көрдөрүүгэ, Максим Аммосов үтүө аатын үйэтитиигэ кыаллары барытын оҥорбута. Кинигэни таһаарыыга эппиэттээх редакторынан СӨ Судаарыстыбаннай Мунньаҕын (Ил Түмэн) бэрэссэдээтэлин бастакы солбуйааччы Александр Жирков буолар. Бу тэрээһиҥҥэ Саха сирин парламенын спикерэ Петр Гоголев кыттыыны ылла.

Россия Наукаларын академиятын дьиэтигэр РФ субъектарын судаарыстыбаннай былааһын сокуону таһаарар (бэрэстэбиитэллээх) уорганнарын салайааччыларыгар – РФ сокуону таһаарааччыларын Сэбиэтин чилиэннэригэр семинар-сүбэ мунньах буолан ааста. Манна үп миниистирэ Антон Силуанов, РФ Ааҕар-суоттуур палаататын бэрэссэдээтэлэ Алексей Кудрин тыл эттилэр.

Бэлиэтиир буоллахха, семинар-сүбэ мунньах кэмигэр Федерация Сэбиэтин бэрэссэдээтэлин бастакы солбуйааччыта Николай Федоров Ил Түмэн спикерэ Петр Гоголевка Россия Федерациятын сокуону таһаарааччыларын Сэбиэтин чилиэнин дастабырыанньатын туттарда.

Ил Түмэн бэрэссэдээтэлэ ахсынньы 12 к. РФ Конституциятын 25 сылыгар анаммыт өрөгөйдөөх тэрээһиннэргэ кыттыыны ылла.

Ахсынньы 13 к. сокуону таһаарар уорганнар салайааччыларыгар семинар-сүбэ мунньах салҕанна. Ону сэргэ хамыыһыйалар, РФ сокуону таһаарааччыларын Сэбиэтин Президиумун мунньахтара, ол кэннэ Россия сокуону таһаарааччыларын Сэбиэтин мунньаҕа, РФ Федеральнай Мунньаҕын Федерация Сэбиэтин Бэрэссэдээтэлэ Валентина Матвиенконы кытта көрсүһүү тэрилиннилэр.

Бээтинсэҕэ семинар-сүбэ мунньах кыттыылаахтарыгар үөрэх түмүгүнэн сибидиэтэлистибэлэр туттарыллыахтара. РФ Президенин иһинэн Саха Өрөспүүбүлүкэтин бастайааннай бэрэстэбиитэлистибэтигэр спикер көрсүһүүлэрэ былааннанар.

Петр Гоголев Москваҕа сырыытын бүтэһик пуунунан прессаны кытта алтыһыыта буолуоҕа – Ил Түмэн спикерэ норуоттар икки ардыларынааҕы иһитиннэриигэ Россиятааҕы “РИА Новости” агентствоҕа интервью биэрэрэ былааннанар.