Ипотека бырыһыана өтөрүнэн түспэт

Ипотека бырыһыана өтөрүнэн түспэт

Сокуону оҥорооччулар уонна экспертэр дьиэ кредитин ставката кэлэр үс сыл иһигэр 8% диэри түһүөн сөбүн туһунан сабаҕалаабыттар.

Билигин ипотека орто ставката 10,4% тэҥ, өскөтүн ханнык да уустук кириисис буолбатаҕына, ипотеканан кредит ставката 8% диэри түһэрэ күүтүллэр диэн киин хаһыакка суруйбуттара. Президент Владимир Путин Федеральнай мунньахха анал этиитигэр ипотека ставкатын кыччатар туһунан этэн турар.
Ол эрээри, бу сонун бигэргэммэтэ. “Парламентская газета” хаһыат суруйарынан, ыам ыйын 23 күнүгэр Госдумаҕа буолбут мунньахха Арассыыйа Баанын дириэктэрэ Эльвира Набиулина кэлэр сылларга ипотека ставката 8% диэри түһэрэ кэтэһиллибэтин туһунан эппит. “Ипотека ставкатын түһэрэр туһунан сорук турар, ол гынан баран, 2021 сылга бу көрдөрүүнү ситиһиллиэн сөп диэн сабаҕалааһыннара туолбат туруктаах”, — диэн кини этэр. Ипотека ставката дойдуга инфляция көрдөрүүтэ кыччыырыттан уонна экономика бигэ туруктанарыттан түһүөн сөп диэн билгэлээбиттэрэ. Ол эрээри Киин банк баһылыга этэринэн, ипотека ставката ол фактордартан эрэ тутулуктаммат, үп ырыынагар баар үгүс өрүттэртэн тутулуктанарын, ол иһин үс сыл иһигэр ипотека ставкатын бу маннык намыһах бырыһыаҥҥа диэри түһэрэр кыаллыбатын туһунан иһитиннэрбит.

Бу интэриэһинэй

Госдумаҕа ыам ыйын 22 күнүгэр бастакы ааҕыыга ипотека төлөбүрүгэр каникул туһунан сокуон барылын ылыммытар. Бу сокуон барылыгар уустук балаһыанньаҕа түбэспит киһи сыл аҥарыгар ипотеканан ылбыт кредитин төлөбүрүн сыл аҥара болдьоххо “тоҥоруон” сөбүн туһунан этиллэр. Ол курдук, уустук балаһыанньаҕа түбэспит киһи кредит ылбыт бааныгар алта ыйга сынньалаҥ биэрэригэр эбэтэр төлөбүрүн кээмэйин кыччатарыгар сайабылыанньалаах тахсыахтаах. Маннык ис хоһоонноох соругу Владим

Маҕаһыын аһар уустук буолуоҕа

Элбэх кыбартыыралаах дьиэҕэ маҕаһыын аһар уустук буолуоҕа. Ыам ыйын 21 күнүгэр ылыныллыбыт сокуонунан, кыбартыыраны маҕаһыын эбэтэр атын офис статуһугар көһөрүүгэ үгүс ыспыраапка ирдэнэрин таһынан, тула олорор дьонтон көҥүл эмиэ ирдэнэр буолла.

Ол туһунан “Парламентская газета” хаһыакка Госдума ОДЬКХ уонна дьиэ боппуруостарыгар кэмитиэт чилиэнэ Илья Осипов кэпсээбит. Өскөтүн элбэх кыбартыыралаах дьиэҕэ маҕаһыын аһар буоллахха, дьиэ олохтоохторуттан көҥүл булгуччу ирдэнэр. Уопсай мунньаҕынан ону быһаарыахтаахтар, дьиэ олохтоохторун улахан аҥардара ол мунньахха кыттыбыт эрэ буоллахтарына, мунньах ыытыллыбытынан аахсыллар. Ону таһынан маҕаһыын буолуохтаах кыбартыыраҕа сыста турар уонна үөһээҥҥи, алларааҥҥы кыбартыыралар олохтоохторуттан сөбүлэҥ ылар булгуччулаах. Бу суруктары кыбартыыраттан маҕаһыын статуһугар көһөрөр олохтоох салайыныы уорганыгар тиийэллэр.

Кредиттэрин төлүүргэ судаарыстыбаттан көмө

“Парламенсткая газета” хаһыат суруйарынан, 2019 сылга үһүс эбэтэр онтон үөһээ төрөөбүт оҕолоох дьиэ кэргэн дьиэ ылбыт кредитин төлүүрүгэр федеральнай бюджеттан 450 тыһ. солк. ылар буолла.

Владимир Путин элбэх оҕолоох дьиэ кэргэн ипотеканан ылбыт кредитин төлүүргэ судаарыстыба көмөлөһөр соруктааҕын туһунан олунньуга оҥорбут анал этиитигэр иһитиннэрбитэ. Сокуон барылын бэлэмнээн, ыам ыйын 28 күнүгэр бастакы ааҕыыга ылыннылар. Ол курдук, сокуон 2019 сыл тохсунньу 1 күнүттэн үлэлиир, ол эбэтэр тохсунньу 1 күнүттэн бэттэх төрөөбүт оҕолордоох элбэх оҕолоох дьиэ кэргэн бу көмөнү ылар бырааптанар. “Бу социальнай көмө миэрэтигэр үп көстүөҕэ, бу сорукка билиҥҥитэ 15 млрд солк. көрүллүөҕүн туһунан этии киирдэ”, — диэн сокуон барылын автордарыттан биирдэстэрэ Госдума спикера Вячеслав Володин эппит.
Бу социальнай көмө туһунан сокуон 2022 сылга диэри үлэлиирэ сабаҕаланар. РФ бырабыыталыстыбатын иһинэн бу үбү биэрээччинэн Дьиэ тутуутугар биир кэлим институт (Единый институт в сфере жилищного строительства) буолар. Госдума үп ырыынагар кэмитиэтин бэрэссэдээтэлэ Анатолий Аксаков үбү биэрии бэрээдэгин туһунан бу курдук кэпсээбит: “ Дьиэ кэргэн ипотеканан кредит ылбыт бааныгар тиийэн сайаапка биэрэр. Оттон баан Дьиэ тутуутун биир кэлим институтугар ирдэбил ыытар. Дьиэ тутуутун биир кэлим института ЗАГС уорганыгар дьиэ кэргэҥҥэ үһүс эбэтэр онтон үөһэ оҕо төрөөбүтүн туһунан информацияны бигэргэтэр ыйытык ыытар. Информация оруннаах буоллаҕына, Дьиэ тутуутун биир кэлим института кредити сабарга диэн анаан бааҥҥа 450 тыһ. солк. ыытар”. Парламентарий эппитинэн, бу төлөбүр ийэ хапытаалын курдук эмиэ подохуодунай нолуогунан (НДФЛ) түһэриллибэт. Ипотекаҕа төлөбүрүгэр көмө миэрэтэ 2022 сылга диэри үлэлиирэ сабаҕаланар, тоҕо диэтэххэ, буоларын курдук бюджет үс сылга ылыллар, онон бу хайысхаҕа үбү көрөргө туруммуттар.
Экспертэр сабаҕалаабыттарынан, ипотекаҕа көмө төлөбүрүн дойду үрдүнэн 20 тыһ. дьиэ кэргэн ылыан сөп.

Санатар буоллахха

Ийэ хапытаалын үбүн эмиэ бу хайысхаҕа туттуллар. Оччотугар судаарыстыбаттан бу икки көмө элбэх оҕолоох ыал дьиэлэнэригэр төһүү күүһүнэн буолуоҕа.

Национальнай тв умнууга хаалбат

Национальнай телевидение умнууга хаалаары гынна дуо? Бу боппуруоһу үрдүк таһымҥа регионнааҕы телевидениелар туруорбуттар. Ол туһунан Госдума официальнай саайта суруйар.

Биллэрин курдук бэс ыйын 3 күнүттэн аналог каналтан цифровой каналга регионнар бары көһөллөр. Ол эрээри биир кыһалҕанан буолар – олохтоох биэриилэри цифровой частотаҕа көһөрүллүбэт. Онон холобур, биһиги өрөспүүбүлүкэбитигэр “Саха” көрдөрөр-иһитиннэрэр хампаанньа биэриилэрин көрүөхпүтүн баҕарар буоллахпытына, төттөрү аналокка көһөн көрөр эрэ кыахтаахпыт. Олус табыгаһа суох.
РФ бырабыыталыстыбатыгар кыһалҕаны быһаарар биир суолунан буолбут – регионнааҕы телевидение ОТР канал нөҥүө эфирга 5 чаас тахсыан сөбө. Ол эрээри, бу быһаарыыны кытары сөбүлэспэт регионнар элбэхтэр эбит. Национальнай тылынан тахсарга уустуктар баалларыттан.
Онон бу боппуруоһу регионнар Сочига буолбут медиафорумҥа көтөхпүттэр. Ол түмүгэр бу кыһалҕа үрдүк таһымҥа тиийбит. Владимир Путин регионнааҕы телевидение цифровой эфиринэн көстөр кыаҕа суоҕун истэн олус соһуйбут уонна сотору кэминэн быһаарарга туруммут.
Санатар буоллахха, тохсунньу 16 күнүгэр буолбут пленарнай мунньахха регионнар палаталара цифровой эфирга көһөр туһунан Федерация Сэбиэтин уурааҕын ылыммыттар. Онно сенатордар дойду регионнара бэйэлэригэр олохтоох каналлары көрдөрөр мультиплекс тутуохтарын сөбүн туһунан докумуон ылыммыттар.
Онон тапталлаах “Саха” көрдөрөр-иһитиннэрэр национальнай хампаанньа биэриилэрин сотору цифровой эфиринэн көрөр буолуохпутугар эрэниэххэ. Цифровой каналга холбонор дьоҥҥо Call-центр уонна “итии линия” үлэлиир. 8 (800)350-14-14 нүөмэринэн босхо эрийэн приставкалар ханна атыыланалларын, приставканы холбооһун уонна настройкалааһын туһунан ыйытыаххытын сөп.