Кредит рейтинэ туох туһалааҕый?

/Туруорсуу/

Пенсияҕа тахсыы быраабылатын уларытар туһунан

Уһук Хоту сир оройуоннарын уонна олорго тэҥнэниллибит миэстэлэргэ олорооччулар, толору күҥҥэ үлэлээбэт да буоллахтарына, пенсияҕа болдьоҕун иннинэ тахсалларын көҥүллүүр туһунан ыйытыгы Госдума регионнааҕы политикаҕа уонна Хоту сир итиэннэ Уһук Илин проблемаларыгар кэмитиэтэ вице-премьер Татьяна Голиковаҕа туһаайда.

«Бүгүҥҥү күҥҥэ Россияҕа үлэ кэмин ааҕыыга олохтоммут быраабылаларынан, толору үлэ күнүн иһин страховой пенсияны болдьоҕун иннинэ аныыр быраап бэриллэр. Ол эрээри Хоту сиргэ үлэ уратыларыттан, оҥорон таһаарыыга ити наадата суоҕуттан, о.д.а. сылтаан нэһилиэнньэ сорох өттө толору күҥҥэ үлэлиир кыаҕа суох», — диэн быһаарда кэмитиэт бэрэссэдээтэлин солбуйааччы Оксана Бондарь.

Ыйытыкка этиллэринэн, ыраах сытар, тиийэргэ эрэй­дээх хотугу регионнарга уонна тыа сиригэр үгүс нэһилиэнньэлээх пууннарга фельдшеринэн, почтальонунан эбэтэр учууталынан толору күҥҥэ үлэ булар кыаллыбат. Кыра сэлиэнньэлэргэ, социальнай инфраструктура, ол иһигэр оҕо саада суоҕунан, эдэр ийэлэр толору үлэ күнүгэр тахсаллара хааччахтанар.

Ити иһин кэмитиэт “Үлэ пенсиятын болдьоҕун ин­нинэ анааһыҥҥа быраабы биэрэр үлэ кэмнэрин ааҕыы быраа­былаларын бигэргэтэр туһунан” Бырабыыталыстыба уурааҕар уларытыылары киллэрэр наадатын туһунан боппуруоһу көрөрүгэр социальнай политика боппу­руостарыгар Бырабыыталыстыба бэрэссэдээтэлин солбуйааччы Татьяна Голиковаттан көрдөстө.

«Уһук Хоту сиргэ уонна онно тэҥнэниллибит миэстэлэргэ баар кыра уонна тиийэргэ эрэйдээх сэлиэнньэлэргэ, тыа сирин нэһилиэнньэлээх пууннарыгар нэһилиэнньэни олохсутар туһугар, кэмитиэт ааҕарынан, толорута суох үлэ күнүгэр (толорута суох үлэ нэдиэлэтигэр) үлэлээччи дьоҥҥо кырдьаҕаһынан страховой пенсияны болдьоҕун иннинэ анааһыҥҥа анаан наадалаах “хотугу ыстааһы” ааҕыыга арааран сыһыаннаһыы ирдэнэр», — диэн сурукка этиллэр.

Докумуоҥҥа кэмитиэт бэрэссэдээтэлэ Николай Хари­тонов илии баттаабыт.

/Уһук хоту сиргэ/

Депутат төлөбүрдээх суолу тутууга санаатын эттэ

Босхо айанныыр туспа суол суох сиригэр чааһынай суоллары уонна муосталары тутары көрөр РФ Бырабыыталыстыбатын сокуонун барылыгар Госдума депутата Александр Старовойтов көннөрүүлэри киллэрэр санаалаах.

Олунньу 5 күнүгэр Госдума “Россия Федерациятыгар массыына суолларын уонна суол үлэтин туһунан” Федеральнай сокуон 37-с ыстатыйатыгар көннөрүүлэри бастакы ааҕыыга ылыммыта.   Онно Уһук Хоту сиргэ атын босхо айанныыр суол суох сирдэригэр төлөбүрдээх суоллары уонна муосталары тутуу көҥүллэнэрин туһунан этиллэр. Госдума тырааныспарга уонна тутууга кэмитиэтин чилиэнэ Александр Старовойтов (ЛДПР) бу саҥа көҕү­лээһин көннөрүүнү ирдиирин туһунан санаалаах. Кини санаппытынан, билигин үлэлиир сокуонунан, босхо иккис трасса баар эрэ усулуобуйатыгар төлөбүрдээх суол тутуллуон сөп. Оттон ити бастакы ааҕыыга ылыллыбыт сокуон барыла, бастатан туран, чопчу инвестиция бырайыагын – массыына суолун учаастагынан буолуохтаах Пур өрүһү туоруур муостаны тутууга туһаайыллар.

«Биһиги бэйэбит көннөрүүлэрбитинэн, бастакынан, Бырабыыталыстыбаттан бу төлөбүрдээх муостанан айан тарыыбын ааҕыы методикатын биэрэрин ирдиэхпитин баҕарабыт. Оттон кинилэр эһиги сокуону ылыныаххыт, онтон салгыы регион методиканы оҥоруоҕа диэн мэлдьи этэллэр. Депутаттар эмиэ буруйдаах буолан тахсыахтара, — диэн сокуону таһаарааччы “Парламент хаһыатыгар” кэпсээтэ. – Биһиги сокуонунан быһаарыахпытын баҕарар кккис түгэммит, — бу сокуон барыла дьайар зонатын ити инвестиция соҕотох бырайыагынан хааччахтааһын. Этиллэр сокуону көҕүлээһин Уһук Хоту сиргэ бүтүннүүтүгэр төлөбүрдээх суоллары эрэ оҥорор кыаҕы аспатын туһугар».

Депутат сокуон барылыгар ыйыллыбыт уларытыылары кини уонна коллегалара  нэдиэлэ бүтэһигэр бэлэмнээн Госдумаҕа киллэрэр санаалаахтарын иһитиннэрдэ.

«Парламент хаһыатын» матырыйаалынан балаһаны Елена БАИШЕВА бэлэмнээтэ