Эми хонтуруоллааһын, тахограф, Рунет…

Сэтинньи 1 күнүттэн кыра үп тэрилтэлэрэ олорор дьиэни солуок тутан кредит биэрэллэрэ тохтуоҕа, таҥараҕа сүгүрүйэ айаннааччылар  саҥа статуһу ылыахтара, оттон тахографтара суох түгэнигэр тырааныспар хампаанньаларын бас билээччилэргэ хааччахтары киллэриэхтэрэ. Бу ыйга өссө туох уларыйыы баарый?

Сэтинньи 1 күнүттэн. Дьоҕус үп тэрилтэлэрэ дьиэни солуок тутан кредит биэрэр кыахтара сүтэр

Дьоҕус финансовай тэрилтэлэр олорор дьиэни эбэтэр баайга-дуолга өлүүнү солуок тутан кредит биэрэллэрэ тохтуур. Докумуон ааптардарын ортотугар – Госдума спикерэ Вячеслав Володин уонна Федерация Сэбиэтин бэрэссэдээтэлэ Валентина Матвиенко.

«Хомойуох иһин, олорор дьиэни солуок тутан үрдүк бырыһыаҥҥа харчы иэс биэрэр бизнес баар буолбута, оттон гражданнар итинник иэстэрин кыайан төлөөбөт түгэннэригэр кинилэртэн соҕотох дьиэлэрин былдьаан ылаллар, – диэн Госдума финансовай ырыынакка кэмитиэтин баһылыга Анатолий Аксаков эттэ. — Сокуон итинник түгэннэри туоратар кыаҕы үөскэтиэҕэ».

Вячеслав Володин этэринэн, «гражданин олорор дьиэтин сыанатын кытта тэҥнээтэххэ, бэрт кыра кредиттэн сылтаан соҕотох квартиратыттан матара табыллыбат».

Сэтинньи 1 күнүттэн. Тахограф суох буоллаҕына…

3,5 тоннаттан үрдүк муҥутуур ыйааһыннаах таһаҕас массыынатын уонна автобустары  ыытар суоппардар бэйэлэрин тырааныспардарыгар тахограбы хааччыйар, ону сэргэ Суол быраабылаларынан тырааныспары ыытар уонна сынньанар бириэмэлэрин нуормаларын тутуһар  эбээһинэстэнэллэр.

Административнай сокуону кэһиилэр тустарынан кодекска (КоАП) көннөрүүлэри сэргэ ити быраабылалары кэһии иһин административнай эппиэтинэс киллэриллэр.

Сынньалаҥ бириэмэтин нуормаларын тутуспатахтарына, суоппардарга 1,5 тыһ. солкуобайтан 2 тыһ. солк. диэри ыстараап олохтонор, дуоһунастаах сирэйдэргэ — 7-10 тыһ. солк., чааһынай предпринимателлэргэ — 15-25 тыһ. солк., юридическай сирэйдэргэ — 20-50 тыһ. солк. Суоппардар үлэлэрин режимэ Россия нуормалыыр аакталарын кытта сөп түбэһиспэт буоллаҕына, юридическай уонна дуоһунастаах сирэйдэр эппиэтинэһи сүгэллэр.

Ону таһынан, линияҕа тахограба суох тахсыы эбэтэр тахограф үлэтин тохтотуу иһин ыстараап 1-3 тыһ. солкуобайтан 3-5 тыһ. солк. диэри улаатар. Эмиэ итинник кэһии иһин дуоһунастаах сирэйдэр 7-10 тыһ. солк. төлүөхтэрэ, ИП – 15-25 тыһ. солк., юридическай сирэйдэр – 20-50 тыһ. солк. Итини таһынан, тэрилтэ үлэтэ 90 сууккаҕа диэри тохтотуллуон сөп.

«Билигин үлэлиир сокуонунан маннык кэһиилэр иһин ыстараабы, дьиҥэр, суоппар бэйэтэ төлүүр эбит буоллаҕына, биһиги бу саҥа сокуонунан, бастатан туран, чааһынай предпринимателлэргэ уонна юридическай сирэйдэргэ эппиэтинэһи киллэрэбит, ол аата тырааныспар хампаанньаларын бас билээччилэргэ», — диэн бэлиэтээтэ Госдума бэрэссэдээтэлэ Вячеслав Володин.

Спикер этэринэн, «бу пассажирдарга куттал суох буолуутун үрдэтиэҕэ, ол курдук, тырааныспар хампаанньата харчыны түргэнник баһан ылар туһугар рейскэ сылайбыт суоппардары таһаарар ымсыы санаата суох буолуохтаах».

Онон бырабыыталыстыба уурааҕынан тырааныспары техническэй көрүүгэ кинилэр тахографтарынан хааччыллыыларын уонна сөптөөхтүк үлэлииллэрин бэрэбиэркэлээһин киллэриллэр.

Сэтинньи 1 күнүттэн. Россияҕа быстах олорорго көҥүлү ылыы судургутуйар

Россияҕа төрөөбүт, РФ  гражданинын кытта холбоспут, биир дойдулаахтар баҕа өттүлэринэн көһүүлэригэр көмө оҥорууга судаарыстыбаннай бырагыраама кыттыылааҕынан буолар, күрээбит эбэтэр дойдуга быстахтык хорҕойбут дьоҥҥо быстах олороллоругар, квотаны учуоттаабакка эрэ, көҥүл бэриллиэҕэ.

Ону сэргэ, үрдүк квалификациялаах исписэлиистэргэ уонна кинилэр аймахтарыгар (үлэлииллэригэр көҥүллэммит болдьоххо) уонна квалификациялаах исписэлиистэргэ (3 сылга) биэрии түгэннэрин аахсыбатахха,   судаарыстыба сиригэр-уотугар олорууга көҥүллүүр докумуону (уруккутунан 5 сыл оннугар) болдьоҕо суох кэмҥэ биэрии киллэриллэр.

Маныаха быстах олорууга көҥүлү биэрии туһунан сайабылыанньалары көрүү болдьоҕо 6 ыйтан 4 ыйга диэри сарбыллар.

Ити ыйыллар докумуонунан быстах олорууга көҥүлү ылбакка эрэ дойдуга өр кэмҥэ олорор (вид на жительство) көҥүлү ылыахтарын  сөп омук дойдуларыттан кэлэр дьон кэккэтэ кэҥиир. Кинилэр ортолоругар — РСФСР сиригэр төрөөбүт итиэннэ ааспыт кэмҥэ сэбиэскэй дойду гражданнара, ону сэргэ Крым автономнай союзнай өрөспүүбүлүкэтиттэн депортацияламмыт дьон уонна кинилэр аймахтара. Өр кэмҥэ олорор көҥүлү Россияҕа төрөөбүт, омук дойдуларыгар иитиллэ барбыт оҕолор ылар кыахтаналлар.

Өссө биир күүһүгэр киирбит сокуонунан омук сирин киһитигэр эбэтэр гражданствота суох киһиэхэ дойдуга өр кэмҥэ олорууга көҥүлү ылыы иһин судаарыстыба пошлинатын кээмэйэ 5 тыһ. солк. буолуоҕа.

Сэтинньи 1 күнүттэн. Рунеты тас кутталтан көмүскүөхтэрэ

Россияҕа Рунет туруктаах үлэтигэр куттал суоһуур түгэнигэр “уопсай туһаныллар ситими кииннээн салайыыны” Роскомнадзор оҥоруоҕа.

Россия бырабыыталыстыбата маннык салайыы бэрээдэгин бигэргэтиэҕэ, куттал көрүҥнэрин уонна олору туоратыы дьаһалларын быһаарыаҕа.

Федерация Сэбиэтин бэрэссэдээтэлэ Валентина Матвиенко бэлиэтээбитинэн, бу сокуон сыала-соруга Россияны Интернеттэн туспа араарыы буолбатах. Кини этэринэн, Россияны аан дойдуттан араарар “туһата суох уонна кыаллыбат”, ол оннугар туруктаах Рунет туһунан сокуон Россияны цифровой технологиялартан уонна Аан дойдутааҕы ситимтэн араарыыны таһаарбат аналлаах.

Докумуон ааптардарыттан биирдэстэрэ, Федерация Сэбиэтин конституционнай сокуону оҥорууга уонна судаарыстыбаннай тутууга кэмитиэтин баһылыга Андрей Клишас Россияҕа 92 мөлүйүөнтэн ордук Интернети туһанааччы баарын санатта. Кини дойду тас өттүттэн Рунетка ханнык баҕарар атаакалааһыҥҥа эбэтэр АХШ-гар баар төрүт сервердэртэн сигналы араарыыга бу дьоҥҥо муҥтуур кыра хоромньуланалларын туһугар кыаллар барыта оҥоһуллуохтаах диэтэ.

Сэтинньи 1 күнүттэн. Таҥараҕа үҥэ айаннааччылар саҥа статустаналлар

Паломник (кэриирдьит) анал статуһа олохтонор. Паломник үлэтин төлөбүрдээх да, төлөбүрэ да суох төрүккэ оҥорор уһулуччу быраап итэҕэл тэрилтэлэригэр бэриллэр. Маныаха итинник айаҥҥа дьон бэйэлэрэ баралларын ким да боппот.

Сокуон быһыытынан, итэҕэлгэ сүгүрүйэр миэстэлэргэ уонна итэҕэл объектарыгар сылдьар, ону сэргэ итэҕэл сиэригэр-туомугар кыттар сыаллаах айаҥҥа туруммут гражданнар паломниктарынан ааҕыллаллар.

Паломниктар айаннара 24 чаастан 6 ыйга диэри салҕаныан сөп. Сокуону оҥорооччулартан биирдэстэрэ, Госдума гражданскай уопсастыбаны сайыннарыыга, уопсастыбаннай уонна итэҕэл түмсүүлэрин боппуруостарыгар кэмитиэтин бэрэссэдээтэлэ Сергей Гаврилов паломничество эйгэтигэр баар проблемалары быһаарыы наадата уолдьаспытын быһаарда.

Депутат этэринэн, бу эйгэҕэ масыанньыктар үлэлэриттэн элбэх ахсааннаах таҥараҕа итэҕэйэр дьон албыннаппыттар. Ол түмүгэр паломниктар айаннарын туһунан харчыны кураанахха ыытыы эбэтэр сүтэрии курдук санаа уопсастыбаҕа олоҕуруутугар ити сабыдыаллаабыт. «Паломниктар айаннарын сыалынан  туристическай шопинг эбэтэр тэбиэни кытта уончата селфи буолбакка, ытык миэстэлэргэ сүгүрүйүү буолар. Биһиги итини өйдүүбүт, онон паломник өйдөбүлэ билигин сокуоҥҥа бигэргэтилиннэ», — диэтэ депутат.

Сэтинньи 29 күнүттэн. Эмп хаачыстыбатын хонтуруоллааһын кытаатыаҕа

Аҕа дойдуга уонна омук сирдэригэр оҥоһуллубут эмп препараттарын гражданскай эргииргэ киллэриэх иннинэ оҥорон таһаарааччы эбэтэр таһыттан киллэрэр хампаанньа 3 төгүл клиническэй бэрэбиэркэлээһини ааспыттарын бигэргэтэр докумуоннары Росздравнадзорга биэрэр эбээһинэстэниэхтэрэ.

Билигин баар эмп препаратын декларациялааһын эбэтэр сертификаттааһын процедурата суох буолар.

Доруобуйа харыстабылын министиэристибэтэ бэлэмнээбит көннөрүүлэрэ оҥорон таһаарааччыларга уонна эмп дистрибьютордарыгар эппиэтинэһи кытаатыннарыахтара.Медицинскэй туһаныыга анаан Россияҕа аан бастаан оҥоһуллубут эбэтэр дойдуга аан бастаан киллэриллэр эмп препаратын бастакы 3 сериятыгар сыһыаннаан,  хас биирдии серияҕа клиническэй чинчийиилэр боротокуолларын Росздравнадзорга эбии биэрэллэригэр этиллэр.

Ити бэрэбиэркэлээһини сокуонунан аккредитацияламмыт Доруобуйа харыстабылын министиэристибэтин уонна Росздравнадзор федеральнай судаарыстыбаннай бюджеттан үбүлэнэр тэрилтэлэрэ ыытыахтара. Дойду тас өттүттэн киирбит эмтэргэ дистрибьютор оҥорон таһаарааччы сертификатын, ону сэргэ препарат регистрацияланар кэмигэр ирдэбиллэргэ сөп түбэһэрин туһунан эппиэтинэстээх сирэй бигэргэтиитин хонтуруоллуур тэрилтэҕэ биэриэх тустаах.

Оттон Аҕа дойдуга оҥоһуллар уонна тас дойдуттан киирэр иммунобиологическай препараттары эргииргэ киллэриигэ сыһыаннаан биир суолталаах дьаһал баар. Росздравнадзор серия наадалаах ирдэбиллэргэ сөп түбэһэрин туһунан түмүктээһини учуоттаан, вакциналар хас биирдии серияларыгар көҥүлү биэриэҕэ.

Ону таһынан

Сэтинньи 1 күнүттэн. Хамсаабат баайы-дуолу масыанньыктартан көмүскүөхтэрэ

Физическэй сирэй бас билиитинэн буолар хамсаабат баайы-дуолу көһөрүүнү, бис билии быраабын тохтотууну судаарыстыбаннай регистрациялааһын туһунан сайабылыанньа итиэннэ онно сыһыарыллан, электроннай докумуоннар көрүҥнэринэн күүһүрдүллүбүт, квалификациялаах электроннай илии баттааһыннаах докумуоннар киирдэхтэринэ, Росреестр үлэһиттэрэ ол туһунан бас билээччигэ иһитиннэрэр эбээһинэстэнэллэр. Ону ити сайабылыанньа киирбит күнүгэр оҥоһуллар.

Сэтинньи 1 күнүттэн. Киртитэр тобохтору быраҕыы квоталаныаҕа

Бөдөҥ бырамыысыланнас кииннэригэр, чуолаан, Братскайга, Красноярскайга, Липецкэйгэ, Магнитогорскайга, Медногорскайга, Нижнэй Тагилга, Новокузнецкайга, Норильскайга, Омскайга, Челябинскайга, Череповецка уонна Читаҕа киртитэр тобохтору салгыҥҥа быраҕыыны квоталааһыҥҥа эксперимени ыытар туһунан сокуон күүүһгэр киирэр. Ити эксперимент 2020 сыл тохсунньу 1 күнүттэн 2024 сыл ахсынньы 31 к. диэри ыытыллыаҕа.

Сэтинньи 2 күнүттэн. “Тыа сирин луохтуура” уонна “Тыа сирин биэлсэрэ” бырагыраамаларыгар сааһынан хааччахтааһын суох буолар

Тыа сиригэр эбэтэр 50 тыһ. киһиэхэ диэри нэһилиэнньэлээх куораттарга үлэлии көһөр быраастарга уонна биэлсэрдэргэ биир кэмнээх харчынан төлөбүрү биэриигэ сааһынан хааччахтааһын уһуллар. Бу иннинэ итинник төлөбүргэ быраабынан 50-гар диэри саастаах эмчиттэр туһаналлара. Быраастар көһөллөрүгэр 1 мөл. солк. ылаллар, биэлсэрдэр – 500 тыһ. солк.

“Парламент хаһыатын” матырыйаалларынан Елена Баишева бэлэмнээтэ

Уважаемые читатели!

1. Покупая электронную версию Издания, вы осознаете, что покупаете ее исключительно для личного (семейного) пользования. Перепродажа или любая другая передача купленного вами номера газеты третьим лицам запрещается и может преследоваться по закону.
2. Обязанности продавца, в качестве которого выступает Издание, считаются выполненными с момента отправки Покупателю ссылка на скачивание купленного и оплаченного им номера газеты.
3. Стоимость газеты в розницу 30 руб.

ВАЖНО! Иногда, по независящим от Издания причинам, спам-фильтры Покупателя перебрасывают письмо с заказанной вами ссылкой в папку «Спам». Поэтому если вы не получили от нас автоматически сгенерированного письма со ссылкой, для начала проверьте папку «Спам». Если его нет и там — обращайтесь в нашу редакцию.