Лайктар уонна репостар иһин…

Госдума депутаттара Алексей Журавлёв (фракцияҕа киирбэт) уонна Сергей Шаргунов (РФКП) сокуону утарар ис хоһоонноох лайктар (биһирээһин бэлиэтэ) уонна  атын дьоҥҥо тарҕатыы иһин холуобунай оннугар административнай эппиэтинэһи көрөр сокуон барылын оҥордулар.

Биэс  сыл  оннугар – 15  суукка

Билигин, Холуобунай кодекс 282-с ыстатыйатын бы­һыытынан, сонуну тарҕатар си­тим эбэтэр Интернет нөҥүө киһини ханнык расаҕа киирсэринэн, эр киһи, дьахтар, ханнык омук буоларынан, саҥарар тылынан, итэҕэлинэн  абааһы көрүү, өстүйүү, ону сэргэ холуннарыы, аатын-суолун түһэрии иһин 300-500 тыһ. солк. ыстарааптан саҕалаан 2-5 сылга көҥүлүн быһыыга диэри накаастабыл көрүллэр.

Госдумаҕа киллэриллибит көҕүлээһин ааптардара ити нуорманы холуобунайтан таһааран, административнай оҥорорго итиэннэ маннык ис хоһоонноох текстэр, аудио уонна видео таһаарыылар иһин 10-20 тыһ. солк. диэри ыстараап эбэтэр 100 чааска диэри булгуччулаах үлэ, эбэтэр 15 сууккаҕа диэри административнай хаайыы бы­һыытынан накаастабылы олохтуурга этэллэр.

Сергей Шаргунов уонна Алексей Журавлёв санааларынан, күүһү туттан эбэтэр суоһурҕанан, ону тэҥэ бэйэ сулууспалаах балаһыанньатын туһанан бөлөх дьон эбэтэр тустаах киһи  оҥорбут экстремистии дьайыылара холуобунай буруйунан хаалыахтаахтар.

Чуолкайа  суох нуормалар

Бэйэлэрин этиилэрин төрү­түн быһааралларыгар, депу­таттар сокуону утары ис хоһоонноох контент дьоҥҥо төһө күүскэ дьайарын уонна сокуоннайа суох дьайыыларга көҕүлүүрүн дьиҥнээҕинэн булан ылар кыаллыбатын ыйаллар. Депутаттар этэллэринэн, бу түгэҥҥэ экспердэр түмүктэрэ хайдах киһититтэн тутулуктаах – оттон олор суут бириигэбэрин төрдүнэн буолаллар эбээт.

Сергей Шаргунов президент Владимир Путины кытта “Быһа линия” кэмигэр сокуоннарга экстремизм өйдөбүлэ чопчута суоҕун туһунан боппуруоһу көтөхпүтэ. Онуоха судаарыстыба баһылыга итиннэ баланса хааччыллара суолталаах: биир өттүттэн экстремизмы уонна бобуллубут идеологияны тарҕатыыны сэрэтэр наадалаах, атын өттүттэн – нуормалар быһаарыылара чопчуланыахтаах диэн хоруйдаабыта.

«Үөһэ ыйыллар РФ ХК 282-с ыстатыйатын нуормата чуолкайа суоҕа сокуону туттууга араастык түөргүлээһиҥҥэ уонна бэйэ баҕатынан буруйдааһыҥҥа тиэрдэр», — диэн докумуон быһаарыы суругар Сергей Шаргунов уонна Алексей Журавлёв түмүктүүллэр. Кинилэр бэлиэтээбиттэринэн, социальнай ситимнэргэ сонуннары атастаһыы уопсастыбаҕа улахан куттала суох, онон сибээстээн арыый сиэрдээх эппиэтинэһи олохтуурга этэллэр.

«Ким  да  сүгэнэн далбаатаабат»

РФ ХК 282-с ыстатыйата Россия Федерациятын Төрүт сокуонугар быһаччы олоҕурар, оттон бу темаҕа сиһилии быһаарыылар “Экстремизмы утары охсуһуу туһунан” Федеральнай сокуоҥҥа бэриллибиттэр диэн Госдума судаарыстыбаннай тутууга уонна сокуону оҥорууга кэмитиэтин бэрэссэдээтэлэ Павел Крашенинников санатта.

«Дойду эбэтэр быраабы харыстааччылар “ити ыстатыйанан сүгэнэн курдук далбаатыыллар” диэн эппэппин. Статистика да атыны этэр», — диэтэ депутат «Парламент хаһыатыгар».

Парламентарий ааҕарынан, конституционнай бырааптары уонна көҥүллэри көмүскээһин маннык дьаһаллара ханнык баҕарар судаарыстыбаҕа баар буолуохтаахтар. Онон Алексей Журавлев уонна Сергей Шаргунов көҕүлээһиннэрин кини тоҕооһо суоҕунан сыаналыыр. Оттон РФ ХК 282-с ыстатыйатын туһаныыга эбэтэр чопчулааһыҥҥа ханнык эмэ боппуруостар баар буоллахтарына, олору ырытан баран, толкуйдаммыт быһаарыылар ылыллыах тустаахтар диир.

«Бу көҕүлээһин төрүөтэ хас да улахан айдааннаах түгэннэри кытта сибээстээх буолуон сөп. Ол эрээри итинник туорааһыннар быраабылалары сотууга тө­рүөтүнэн буолуо суохтаахтар», — диир Госдума экологияҕа кэмитиэтин бэрэссэдээтэлин солбуйааччы Сергей Боярскай. Кини сымыйа иһитиннэрии иһин социальнай ситимнэри бас билээччилэргэ накаастабыл туһунан сокуон барылын оҥорууга кыттан турар.

Депутат бэлиэтээбитинэн, экстремизмы утары охсуһууга сокуону оҥорооччулар сүрүн сыаллара – иһитиннэрэр эйгэни уонна гражданнарга куттал суох буолуутун көмүскээһин. “Аныгы уопсастыбаҕа турар ирдэбиллэр сөптөөх уонна балайда кытаанах харданы эрэйэллэр. Ити кутталларга биһиги сөптөөх хааччаҕы туруорбатахпытына, дьон улахан аҥаарын көмүскэлэ суох хаалларыахпыт”, — диэн кини “Парламент хаһыатыгар” санаатын эттэ.