837
15 января 2016 в 13:52
Ааспыт сыл сорох түмүктэрэ. Саҥа сыл саһарҕалаах дуо?
2015 сылы атаардыбыт. Саҥа кэм син биир кэллэ – 2016 с. үүннэ. Хомойуох иһин, дууһабытыгар, сүрэхпитигэр-быарбытыгар бу сырыыга үөрүү-көтүү угуттаабата, ыар санаа аттыбытыгар чугас сырытта. Онон, бырааһынньык ааспытын кэннэ, өйдөнөн-төйдөнөн баран, олохпут ханнык ыар сүгэһэри санныбытыгар бырахпытын туһунан кэпсэтэн көрүөххэ. Киһи толкуйдуур, ырытар, сыаналаан уонна инникитин чарапчыланан көрөр дьикти дьоҕурдаах. Онон олох салҕанан барар. Санаа түһүүтүн хаалларан, тугу гыныахтаахпыт туһунан кэпсэтиэхтээхпит.
Ааспыт сыл сорох түмүктэрэ
Бу күннэргэ Москваҕа Е.Гайдар аатынан экономика боппуруостарыгар анаммыт Форум үлэлээн бүттэ (тохсунньу 13-15 күннэрэ). Бу улахан мунньахха «Россия уонна аан дойду: инникини бэриэтчилээһин» («Россия и мир: взгляд в будущее») диэн боппуруос тула кэпсэтии барда.
Манна экономистар, үп-харчы эйгэтин үлэһиттэрэ (ол иһигэр Аан дойдутааҕы Баантан), политиктар, ырытааччылар, бизнес бэрэстэбиитэллэрэ уонна да атыттар кыттыыны ыллылар. Форум үлэтин үчүгэйдик үөрэтэн, сыаналаан, дьүүллэһэн көрөр эрэйиллэр. Олус араас санаалар этилиннилэр эрээри, бииргэ үлэлээһин суолларын-иистэрин көрдөөһүн баһыйбыта санааны көтөҕөр. Баҕар, тылга да этиллибитин иһин.
Форум пленарнай мунньаҕар Россия Бырабыыталыстыбатын бэрэссэдээтэлэ Д.Медведев тыл эттэ. Онтон биһиги 2015 сыл сорох түмүктэрин туһунан эппит тылларыгар ордук болҕомто биэрдибит. Олортон саамай дьоһуннаахтара, биһиги санаабытыгар, манныктар:
Бастакытынан. 2015 сыллаахха Россия экономиката ыһыллыаҕа, олох-дьаһах быста мөлтүөҕэ, уопсастыбаҕа былааһы утары хамсааһын күүһүрүөҕэ уонна ол политическай куһаҕан түмүктэргэ аҕалыаҕа диэн санаалар олоҕо суохтара дакаастанна. Итинник санаа түһүүлэр 2014 сыл ахсынньыттан ыла саҕаламмыттара уонна 2015 с. тохсунньуга, нууччалыы эттэххэ, «паникалааһын» хабааннаммыттара. Балаһыанньа ыарахан этэ, ол эрэн политическай систиэмэ үрэллибэтэ, экономика салаалара син үлэлииллэр, үп-харчы систиэмэтэ «тыыннаах», үһүс аан дойду сэриитэ буолбата. Бу үчүгэй түмүк дуу, суох дуу? Куһаҕана суох түмүк.
Иккиһинэн. Россия Бырабыыталыстыбата элбэхтэ уонна үксүгэр сөпкө кириитикэҕэ тардыллар. Ол эрэн 1998, 2008-2009, 2014-2015 сыллардаах социальнай-экономическай уонна үп-харчы кириисистэриттэн сөптөөх уруок ылыллыбыт, кытаанах усулуобуйаҕа үлэлиир уопут үөскээбит. Игорь Шувалов Форумҥа эппитинэн, 2015 с. Россия Бырабыыталыстыбата экономика сайдыытын сааһылааһыҥҥа, кириисистэн тахсар дьаһаллары ылыныыга биир да улахан сыыһаны таһаарбатах.
Итини тэҥэ, Россия Киин Баанын кытта олус сөпкө, тапсан үлэлэспиттэр. Ол түмүгэр, холобур, Россия харчытын саппааһа туора-маары ыскайдаммата, сыананы көҥүл ыытыы түмүгэр солкуобай сууллан түспэтэ уонна бэйэтин национальнай валюта буолар оруолун толорор, доллары кытта «сэриигэ» үгүс дьон солкуобайдарын тутан хааллылар. Кириисиһи утары охсуһар миэрэлэр, бастатан туран, олоҕу-дьаһаҕы хааччыйар салаалары өйөөһүҥҥэ туһаайылыннылар.
Биһиги итинник санаабытын, наада буоллаҕына, сыыппараларынан толору бигэргэтэргэ бэлэммит. Ити сыыппаралары киһи барыта билэр. Олох да хаамыытыттан итини сэрэйиэххэ сөп.
Үсүһүнэн. Үөһэ этиллибит түмүктэр куһаҕана суох буолан бараннар, кинилэр биһиэхэ «тыыннаах» эрэ хааларбытынан үчүгэйдэр. Ол аата «катастрофа буолуо» диэбиттэрэ туолбата. Быйыл буолар Государственнай Дума быыбарыгар дойду «тыыннаах» буолара политическай суолталаах. Ол эрэн дойду экономикатын туруга олус мөлтөх. Инфляция 2015 с. 12,9 % тэҥнэстэ. Ол аата пенсионердар балаһыанньалара итиччэ бырыһыан мөлтөөтө. Ону көннөрөргө судаарыстыба пенсияны итинник бырыһыаҥҥа эбэн биэриэхтээх этэ. Хомойуох иһин, бачча харчы суох. Онон пенсия эбэтэр 4, эбэтэр 6 бырыһыанынан эрэ эбиллэрэ буолуо.
Итинник ыарахан боппуруостар биһиэхэ элбээтилэр, олору түргэнник быһаарар наада курдук. Холобур, дойду сайдыытын хааччыйааччыларынан үөрэхтээһин, доруобуйа харыстабыла, олоҕу-дьаһаҕы хааччыйар тэрилтэлэр (инфраструктура) буолаллар. Итиннэ, сурах быһыытынан, бюджеты 10 % көҕүрэтиэххэ дииллэр. Оттон оборонаҕа уонна бэрээдэги көрүүгэ ороскуот көҕүрээбэт. Кинилэр инники сайдыыны хааччыйбаттар эрээри, дойдуну көмүскүүр эмиэ наада. Онон, манна үөскээбит утары турсууну хайдах быһаарарбыт биллибэт, харахпытын да сабан кэбистэхпитинэ, боппуруос ханна да баран хаалбат. Онон, эмиэ нууччалыы эттэххэ, структурнай реформалар син биир наадалар. Олору ким ыытар?
Аны бюджет туһунан. Бу биир сүрүн боппуруос. 2015 с. бюджет дефицитэ 1 трлн солкуобай этэ. Ону сабарга Бырабыыталыстыба харчыны уурулла сытар үптэн (золотовалютные резервы), эбэтэр ырыынак эйгэтиттэн судаарыстыба иэһин курдук «уларсан» ылан биэриэхтээх этэ. Манна судаарыстыба эрдэ көрүллүбэтэх ороскуоту оҥордо. 2016 с. бюджет тиийбэт харчыта, кырата буоллаҕына, 2-2,5 трлн солкуобай буолуох курдук. Оттон кириисис салҕанан бардаҕына, уһаатаҕына, ньиэп сыаната түһэ турдаҕына, судаарыстыба хантан харчы булар? Туох-ханнык буолуоҕун билигин ким да билбэт.
Ол да буолбутун иһин ааспыт 2015 сылы, кириисис үгэннээбит бириэмэтин учуоттаатахха, Бырабыыталыстыба куһаҕана суохтук түмүктээтэ. Өскөтүн 1998 с. балаһыанньаны өйдөөн кэллэххэ, оччолорго дьыаланы кыайан көннөрбөтөхпүт. Дефолт саҕаламмытынан С.Кириенко Бырабыыталыстыбата отставкаҕа барбыта. Билигин балаһыанньа атын, экономиканы салайан биэриэххэ сөп, материальнай уонна үп-харчы ресурсалара бааллар. Онон билигин сиирэ-халты быыһанан олоробут. Оттон кэлэр өттүгэр?
Саҥа сыл саһарҕалаах дуо?
Биллэн турар, саһарҕалаах. Айылҕа сокуонун ким да уларытар кыаҕа суох. Оттон дойду, уопсастыба, дьон олоҕор сандаархай саһарҕа 2016 с. көстөрө саарбах курдук. Кириисис салҕанан барыаҕа уонна өссө ыараан иһиэҕэ. Аан дойдутааҕы валютнай фонда уонна Аан дойдутааҕы баан Россияҕа экономика өссө уустугуруо диэн сабаҕалыыллар.
Ааспыт сылга өссө ханнык эрэ эрэл кыыма баар эбит буоллаҕына, быйыл, үүммүт сылга, көнөр суолга киирбэт кыахтаахпыт. Биһиги дьоҥҥо кырдьыгы этиэхтээхпит. Онно үс сүрүн биричиинэ баар.
Бииринэн, ньиэп сыаната 25-30 эрэ доллар буолла (биир буочуката). Оттон дойду бюджета буочука ньиэп сыаната 63 доллар буолуо диэн суоттаммыта. Ол аата киирэр дохуоттар үс төгүл кэриэтэ кыччыыллар. Итини “стрессовай” балаһыанньа диэн ааттыыллар.
Иккиһинэн, Россияны утары ыытыллар экономическай санкциялар аан дойдуга баар атыы-эргиэн быраабылаларын уонна сыһыаннаһыыларын (ВТО) кэһэллэр уонна биһиэхэ ночооттоох быһыыны-майгыны үөскэтэллэр. Кинилэр ырыынак аан дойдутааҕы сыһыаннаһыылара Россияны эрэ утарар түгэнигэр киллэрэллэр. Онон кредитнэй уонна инвестиционнай сибээстэр бысталларыгар күһэйэллэр.
Үсүһүнэн, 2016 сылга Государственнай Дума быыбара барарынан, дойду политическай элитатын хайыта сатыыллар, былааһы утарсар күүстэри сомоҕолууллар («бэһис колонна», олохтоох уонна кыраныысса таһынааҕы оппозиция, норуот миитиннэрэ уонна бырачыастара). Итини улам кэҥэтэн, 2018 с. Президент быыбарыгар В.В.Путины былаастан тэйитэр санаалаахтар.
Туох да саарбаҕа суох маннык куорҕаллаах үлэни былааннаан, олоххо киллэрэ сатыыр күүстэр АХШ бааллар. Бу кинилэр аан дойдуга элбэхтик туттубут уонна туттар сценарийдара.
Россияҕа суоһаабыт улахан кутталы учуоттаан, ону сорунуулаахтык утарсар миэрэлэр наадалар. Итинник дьаһаллар суһаллык оҥоһуллан, түргэнник быһаарыллан сонно тута олоххо киллэриллиэхтээхтэр. Быһатын эттэххэ – суһал уларыта тутуулар наадалар. Ону Президент, Бырабыыталыстыба эргимтэлэрэ холбоһон оҥоруохтаахтар. Манна экономиканы кириисистэн таһаарар хас да концепциялар оҥоһуллан, онтон саамай дьайыылаахтарын талан ылыахха наада. Мин санаабар, үлэни сүрүннүүр бириэмэннэй Штаб тэриллиэн сөп.
Дойду Президенэ В.В.Путин итинник сорудаҕы туруорар курдук. Ону толоруохха наада.
Аан дойду балаһыанньата
Билигин аан дойду балаһыанньата Россияҕа сыһыаннаан олус уустугурда. Ол эрэн бу сыл сэтинньигэ АХШ-гар Президент быыбара буоларын учуоттаан, тутуу былдьаһыахха наада. Донбасс, Луганскай уонна Украина боппуруостара ити быыбарга диэри быһаарыллыахтара суоҕа. Порошенко соруйан бириэмэни тардар. Сирияҕа биһиги ситиһиилэрдээхпит, олору чиҥэтэн биэриэххэ. БРИКС уонна ШОС дэнэр түмсүүлэр үлэлэрин түргэтэтиэххэ. Евроазиатскай Сойуус үлэтэ бытаарда, ону эрчимирдэн биэриэххэ. Кытай уонна Индия диэки үтүө тыллары этэртэн туттунар наадата суох бу политическай тактика.
Уопсайынан, Россия аан дойдутааҕы балаһыанньатыгар тахсыбыт бытаарыылары саҥа таһымҥа таһаарар кэм тирээтэ.
Николай Слепцов, политолог, «Билии» уопсастыба чилиэнэ.