814
07 августа 2015 в 13:06
ХНТ-гэр Арктика боппуруостарыгар Арассыыйа сайаапкатын көрөргө мэһэйдэһии баар буолуон сөп
Атырдьах ыйын 4 күнүгэр ХНТ-гэр саҥардыллан ыытыллыбыт сайаапкаҕа, Арассыыйа континентальнай шельфэ суотугар, Арктикаҕа бэйэтин кыраныыссаларын кэҥэтэргэ сорунар. Госдума региональнай политикаҕа уонна Хотугу уонна Дальнай Восток проблемаларыгар кэмитиэтин бэрэссэдээтэлэ Николай Харитонов этэринэн, норуоттар икки ардыларынааҕы тэрилтэҕэ докумуон көрүүтэ муҥутуур уустуктук ааһыан сөп.
ХНТ муора быраабыгар Конвенциятыгар этиллэринэн, судаарыстыба экономическай зонатын муора түгэҕин чэрчитинэн, материк бэйэтэ салҕанар уонна уопсай геологическай тутуллаах эрэ буоллаҕына, кэҥэтиэн сөп. Өскөтүн бу усулуобуйа тутуһуллубут буоллаҕына, континентальнай шельфэ ХНТ кыраныыссаларга хамыыһыйатыгар сайаапка бэриллэр.
Арассыыйа түһэрбит сайаапкатыгар биһиги шельфэбит састаабыгар Ломоносов хребетин, Менделеев-Альфа уонна Чукоткатааҕы көтөҕүллүүлэрин, ону таһынан кинилэри араарар Подводниктар котловиналарын уонна Чукоткатааҕы котловиналары киллэрэр туһунан этиллэр.
Олус элбэх мэһэйдэр баар буолуохтара, диэн парламентарий бигэтик этэр.
Бу этиллибит сири-уоту Арассыыйа өссө 2001 сылтан ситиһэ сатыыр. Ол эрээри мэһэйдэр баалларынан сибээстээн, боппуруос билигин да сатаан быһаарыллыбакка турар. Бүгүҥҥү күҥҥэ диэри Арассыыйа Бэдэрээссийэтин Арктикаҕа континентальнай шельфэтин ис кыраныыссата быһаарылла илик.
Николай Харитонов ааҕарынан, бэринэр өссө да эрдэ уонна барыта үчүгэйдик быһаарылларыгар эрэниэххэ сөп. “Тугу эмэ сорунуулаахтык ситиһэ сатыыр дьоҥҥо куруук барыта табыллар”, — диэн бэлиэтиир.
— Биһиги номнуо шельфэҕэ былаах ыйаатыбыт уонна барыларыгар бу биһиги сирбит-уоппут диэн этэбит. Онон тохтоон хаалбаппыт, салгыы ылсабыт”,— диир депутат.
– Онно сиртэн хостонор баай улахан саппааһа баар, ол Арассыыйа экономиката сайдарыгар наада.
Госдума саайтыттан.
