860
16 сентября 2016 в 12:15
Киргизия суруйааччыларын айымньыларын тылбаастаммыт кинигэтэ тахсыаҕа
Эһиил уһуччулаах судаарыстыбаннай уонна политическай деятель, Саха сирин уонна Кыргызстан судаарыстыбаннаһын төрүттээччилэриттэн биирдэстэрэ Максим Кирович Аммосов төрөөбүтэ 120 сыллаах үбүлүөйүн бэлиэтиир тэрээһин чэрчитинэн, Кыргызстан өрөспүүбүлүкэтин култууратын күннэрэ буолуохтара.
Икки өтүттэн сүбэлэһии быһыытынан кыргыз биллиилээх суруйааччыларын уонна поэттарын айымньыларын тылбаас кинигэтэ бэлэмнэнэр. Бу кинигэни бэлэмнээн таһаарыыга Ил Түмэн судаарыстыбаннай мунньаҕын бэрэссэдээтэлэ Александр Жирков салалтынан редакционнай сэбиэт үлэлиир. Кинигэ таһаарыытыгар өрөспүүбүлүкэбит биллэр-көстөр суруйааччылара кыттыһаллар
Балаҕан ыйын 12 күнүгэр айымньылары тылбаастаһын үлэтин хаамыытын туһунан мунньах буолла. Бу үлэни Ил Түмэн аппараатын докумуоннааһын управлениетын начальнигын солбуйааччы Мария Илларионова сүрүннүүр. Кини: «Уопсайа 43 кыргыз ааптардарын айымньыларын тылбаастыырга ылыстыбыт. 31 айымньыны олохтоох суруйааччыларга тылбааска биэрдибит. Ол иһигэр 13 прозаны, 18 хоһоонунан айымньыны», — диэтэ.
Мария Константиновна иһитиннэрбитинэн, күн бүгүн 24 айымньы тылбаастаммыт. Айымньылары Кыргызтан өрөспүүбүлүкэтин национальнай библиотеката ыыппыт.
Александр Жирков айымньы ааптардарын кытары лицензия дуогабарын түһэрсэр наадатын бэлиэтээтэ. «Максим Кирович Аммосов кыргызтарга улаханнык ытыктанар. Ордук — урукку көлүөнэҕэ. Олохтоох кадрдары өйөөбүтүн, кыргыз оччотооҕу интеленциятын көмүскэспит үтүөтүн умнубаттар. Биһиги, сахалар киэн туттар киһибит үбүлүөйүн Кыргыз өрөспүүбүлүкэтин кытары ситимниирбит олус кэскиллээх диэн бэлиэтиибин. Кыргызстан култууратын күннэригэр кинигэни таһаартарарбыт таһынан, бэстибээли уонна быыстапкалары тэрийиэххэ наада. Максим Аммосов үтүө өйдөбүлэ өлбөөдүйүө суоҕа», — диэн эттэ.
