Коррупцияны утары сокуоҥҥа уларытыылар

Бу сокуон барылыгар өрөспүүбүлүкэҕэ судаарыстыбаннай дуоһунаска үлэлиир дьону, эрэли сүтэрбиттэринэн сибээстээн, үлэлэриттэн ууратыы бэрээдэгэ олохтонор. Докумуон быһыытынан, өрөспүүбүлүкэҕэ судаарыстыбаннай дуоһунаска сылдьар киһини үлэтиттэн ууратыы эбэтэр босхолооһун бэрэбиэркэ түмүгүнэн оҥоһуллар. Өрөспүүбүлүкэ судаарыстыбаннай дуоһунаһыгар киириэн сөп гражданнар уонна Саха сирин судаарыстыбаннай дуоһунастарыгар үлэлиир дьон биэрэр сибидиэнньэлэрэ кырдьыктаах уонна толору буолуутун, СӨ судаарыстыбаннай дуоһунастарыгар үлэлиир дьон хааччахтааһыннары тутуһууларын бэрэбиэркэлээһин туһунан Балаһыанньаҕа олоҕуран бэрэбиэркэ ыытыллар.
Сокуон барылын быһыытынан, коррупциялаах сокуону кэһии быһыыта-майгыта, төһө ыарахана, оҥоһуллубут усулуобуйалара, киһи атын хааччахтары уонна бобуулары тутуһуута, тус интэриэстээҕэ, коррупцияны утары охсуһар сыалтан олохтоммут эбээһинэстэрин толоруута, ону сэргэ кини урукку өттүгэр бэйэтин дуоһунастаах эбээһинэстэрин толоруутун түмүктэрэ дисциплинарнай ирдэбили туһаныыга учуоттаналлар.
Докумуоҥҥа олоҕуран, эрэли сүтэрбитинэн сибээстээн үлэттэн ууратыы туһунан быһаарыыны ылаллар: Өрөспүүбүлүкэ баһылыга – Саха сирин Баһылыга судаарыстыбаннай дуоһунастарга анаабыт дьонугар сыһыаннаан; Судаарыстыбаннай Мунньах (Ил Түмэн) – парламенынан судаарыстыбаннай дуоһунастарга быыбардаммыт эбэтэр анаммыт дьоҥҥо; Саха сирин Конституционнай суута – өрөспүүбүлүкэ Конституционнай суутугар судаарыстыбаннай дуоһунастарга үлэлиир дьоҥҥо сыһыаннаан; Саха сирин Киин быыбар хамыыһыйата – бу хамыыһыйаҕа судаарыстыбаннай дуоһунастарга үлэлиир дьоҥҥо.
Сокуон барылыгар өрөспүүбүлүкэ Баһылыгын уонна Бырабыыталыстыбатын Администрациятын боломуочуйаламмыт салаалара дохуоттар, ороскуоттар, баай-дуол уонна баайга-дуолга сыһыаннаах эбэһээтэлистибэлэр тустарынан сибидиэнньэлэр кырдьыктаахтарын уонна толоруларын бэрэбиэркэлиэхтэрин сөп диэн суруллар. Тэрилтэлэр коррупцияны сэрэтиигэ миэрэлэри ылар эбээһинэстэрэ олохтонор. Ону таһынан, «Коррупцияны утары охсуһуу туһунан» Федеральнай сокуон 13.4 ыстатыйатыгар сөп түбэһиннэрэн, СӨ Баһылыгын уонна Бырабыыталыстыбатын Администрациятын боломуочуйаламмыт салааларыгар коррупциялаах сокуону кэһиилэри сэрэтиигэ функциялар сүктэриллэллэрэ көрүллэр.
Коррупцияны утары охсуһуу эйгэтигэр олохтоох салайыныы уорганнарын боломуочуйаларыгар олохтоох салайыныы уорганнарынан ылыллыбыт нормативнай правовой аакталарга, ону сэргэ олор барылларыгар коррупцияны утары экспертизаны ыытыы киирэр. Муниципальнай сулууспалаахтар дуоһунастарын регламеныгар быраабылалары, нормативтары, ирдэбиллэри, дуоһунастарынан эбээһинэстэрин, ол эбээһинэстэрин толорботохторуна эбэтэр сөптөөхтүк толорбот буоллахтарына эппиэтинэһи олохтооһуҥҥа хонтуруол ыытыллыахтаах. Ыйыллыбыт сирэйдэр дуоһунастаах эбээһинэстэрин толорботохторуна эбэтэр сөптөөхтүк толорбот буоллахтарына кинилэри эппиэтинэскэ тардыы механизма олохтонор. Олохтоох салайыныы уорганыгар коррупцияны утары охсуһууга муниципальнай былааннар, программалар оҥоһуллуохтаахтар, коррупцияны утары мониторинг ыытыллыахтаах. Коррупцияны утары охсуһууга хамыыһыйалар, сүбэлэһэр уорганнар тэриллэллэр.
Сокуон барылын иккис ааҕыыга народнай депутат Алексей Еремеев биэс көннөрүүнү киллэрдэ.
Өрөспүүбүлүкэ народнай депутаттара сокуон барылын бүтэһиктээх ааҕыыга ылыннылар.