767
16 июня 2017 в 11:43
Кыһалҕалар туһунан – киэҥник
Быйыл Россияҕа Экология сыла биллэриллэн, далааһыннаах тэрээһиннэр бара тураллар. Бу күннэргэ Уфаҕа норуоттар икки ардыларынааҕы экологическай форум уонна Казаньҥа Экологияҕа федеральнай сэбиэт мунньаҕа буолан аастылар. Бу тэрээһиннэргэ Ил Түмэн сир сыһыаннаһыыларыгар, айылҕа ресурсаларыгар уонна экологияҕа сис кэмитиэтин бэрэссэдээтэлэ Владимир Прокопьев кытынна.
Владимир Прокопьев ити икки улахан тэрээһиннэргэ кыттан, Саха сиригэр тулалыыр эйгэни харыстааһыҥҥа ыытыллар үлэлэргэ тохтоон, Саха сирэ ыытар үлэтин билиһиннэрдэ. Башкирияҕа уонна Татарстаҥҥа сырыытын туһунан Владимир Михайлович бу курдук кэпсээтэ.
- Казаньҥа дойду үрдүнэн экологияҕа суоһаабыт кыһалҕалар,
маныаха тулалыыр эйгэни аныгы технологияны туһанан харыстыыр тустарынан кэпсэтии барда. Билигин дойду үрдүнэн тобохтору экологияҕа буортута суох оҥоруу боппуруоһа сытыытык турар. “Тобохтор уонна тобохтору туһаныы туһунан” саҥалыы редакцияламмыт РФ сокуона былырыын тахсыбыта. Регионнар анаммыт кэм иһигэр тобохтор, сыбаалкалар боппуруостарын быһаараллара ирдэнэр. Бу сокуону олоххо киллэрии олус улахан үлэни ирдиир. Атын регионнар эмиэ биһиги курдук бэлэмнэнии түһүмэҕэр сылдьаллар. Ол курдук 2017-2018 сс. тобохтору кытта үлэлэһэр операторы булан, үлэ исхиэмэтин оҥоруохтаахпыт. Биһиги өрөспүүбүлүкэбитигэр тобохтор, сыбаалкалар боппуруостарын сокуон ирдииринэн быһаарарга уопсайа 20 млрд солк. наада. 2019 сылтан тобохтору экологияҕа охсуута суох суох оҥорорго бэлэмнэммит былаан олоххо киириэҕэр эрэнэбит”, -- диэн депутат эттэ.
Владимир Прокопьев Экологияҕа федеральнай сэбиэт чилиэнинэн буолар. Сэбиэт тэриллибитэ төрдүс сылыгар барбыт. “Сылга иккитэ сэбиэт мунньаҕа ыытыллар. Сытыы кыһалҕанан буолбут боппуруостары дьүүллэһэбит, регионнарга ыытыллар үлэ хонтуруолланар”, -- диэн кини быһаарар.
Оттон Башкирия Уфатыгар буолбут норуоттар икки ардыларынааҕы экологическай форумҥа Владимир Прокопьев экологическай үөрэхтээһин туһунан “төгүрүк остуолга” “Саха Өрөспүүбүлүкэтигэр экологическай политиканы олоххо киллэриигэ тулалыыр эйгэни харыстыыр туһунан үөрэх уонна сырдатыы оруола” диэн тиэмэҕэ кэпсэтиини салайан ыытта. “Саха сиригэр экологическай үөрэхтээһиҥҥэ улахан үлэ барарын туһунан регионнар билэллэр эбит. Экологическай доктрина ылыммыппытын истибиттэр. Бу докумуон кэскиллээх буоларыгар бары сөбүлэстилэр”, -- диэн кэпсээтэ.
Форумҥа буолбут “төгүрүк остуолларга” баар кыһалҕалары дириҥник ырыппыттар. Холобур, экологическай үөрэхтээһин таһынан, “Ыраас уу хаачыстыбата”, “Куораттар экологическай сайдыылара”, “Арассыыйаҕа күөх экономика сайдыыта”, “Ойууру баһылыырга экологиятын харыстааһын” диэн тиэмэҕэ күүстээх кэпсэтиилэр ыытыллыбыттар.
