Парламент – Кыайыы болуоссатыгар субуотунньукка

Парламеҥҥа улахан эппиэтинэс сүктэриллибитэ – Аҕа дойду Улуу сэриитигэр Кыайыы 72 сылын бэлиэтээһиҥҥэ Кыайыы болуоссатын көрүҥүн тупсарыы, бэлэмнээһин.
Норуот дьокутааттара Кыайыы болуоссатыгар турар стела аттыгар сири тиэрдилэр, аппараат үлэһиттэрэ болуоссакка сыста сытар биэрэк үрдүн ыраастаатылар. Барыта 196 куул кураанах бөҕү хомуйдулар.
«Саха сирин парламена толору састаабынан Бүтүн Россиятааҕы “Күөх саас” субуотунньукка таҕыста. Бүгүн Кыайыы болуоссатыгар салайааччылар, сис кэмитиэттэр бэрэссэдээтэллэрэ, өрөспүүбүлүкэ норуотун дьокутааттара уонна аппараат үлэһиттэрэ бааллар. Көрөргүт курдук, куораппыт саамай ытык уонна кырасыабай миэстэлэриттэн биирдэстэригэр – Кыайыы болуоссатыгар бүттүүн биир фронунан охсуулаахтык үлэлиибит. Манна аҕыйах күнүнэн киин куорат олохтоохторо уонна ыалдьыттара бары ытыктыыр Аҕа дойду Улуу сэриитин кыттыылаахтарын уонна ветераннарын, тыыл үлэһиттэрин чиэстиэхтэрэ”, — диэн бэлиэтээтэ Александр Жирков.
Киин куорат Губинскай уокуругун баһылыга Любовь Саввина экологическай субуотунньукка Ил түмэнтэн саамай элбэх, ол курдук, 90-тан тахса киһи кыттыбытын иһин махтанна.
Вице-спикер Виктор Губарев чуолаан Кыайыы болуоссатыгар үлэлээбиттэрэ суолталааҕын, ити үгэскэ кубулуйуохтааҕын бэлиэтээтэ.
Ил Түмэн наукаҕа, үөрэххэ, кул­туураҕа, сонуну тарҕатар ситимнэргэ уонна уопсастыбаннай тэрилтэлэр дьыалаларыгар сис кэмитиэтин бэрэссэдээтэлэ Антонина Григорьева: “Киин куораппытын тупсаҕай оҥорууга биһиги тус кылааппытын киллэрэбит. Бүгүн Кыайыы стелатын таһыгар үлэлиибит. Төрөөбүт эһэм Прокопий Иванович Гаврильев Сталинград кыргыһыытыгар Ийэ сирин көмүскүү сылдьан охтубута. Онон Кыайыы болуоссатыгар субуотунньугу ыытыыны дириҥ суолталааҕынан ааҕабын – кэлэр көлүөнэлэр тустарыгар олохторун толук уурбут көлүөнэҕэ, эһэлэрбитигэр ытыктабылы биллэрэбит”, – диэтэ Антонина Григорьева.
Оттон Хонтуруоллуур кэмитиэт бэрэссэдээтэлэ Александр Уаров субуотунньукка кыттан, оҕо сааһын итиэннэ устудьуон сылларын санаата. Кини урукку норуоту түмэр үтүө үгэс сөргүтүллэриттэн астынарын биллэрдэ.
Сир сыһыаннаһыыларыгар, айылҕа баайыгар уонна эко­логияҕа сис кэмитиэт бэрэссэдээтэлэ Владимир Прокопьев Дьокуускайга экологическай субуотунньугу ыытыыны олус наадалаах тэрээһининэн ааттаата. Кини Россияҕа Экология сылын көрсө уһун болдьоххо суоттанар Саха сирин Экологияҕа доктрината ылыллыбытын, онон тулалыыр эйгэни харыстааһыны уонна өрөспүүбүлүкэ экология өттүнэн куттала суох буолуутун таарыйар боппуруостарга бары түмсэн үлэлиэхтээхтэрин санатта.