Россия бюджетын туохха кэмчилиир сатамматый?

Николай Арефьев, Госдума экономическай политикаҔа, промышленноска, инновация сайдыытыгар уонна предпринимательствоҔа кэмитиэтин бэрэссэдээтэлин бастакы солбуйааччыта, РФКП фракцията:

– Кризис кэмигэр, уопсайынан, кэмчилиир туһунан этэр уустук. Ол оннугар үп ресурсаларын табыгастаахтык туһаныыны дьүүллэһиэххэ наада. Биһиги экономиканы кризистэн таһаарыахпытын баҔарар буоллахпытына, киниэхэ харчыны кэччэйиэ суохтаахпыт. Ол харчы биһиэхэ баар. Холобур, 100 млрд доллар кэриҥэ АХШ-гар сытар, ол курдук миниистирдэр кабинеттара АХШ бырабыыталыстыбатын сыаналаах кумааҔыларын атыыласпыта. Ити үбү төннөрүөххэ уонна кэмчилээмиэххэ! Номнуо кэлэр сыл бастакы аҥаарыгар биһиэхэ Резервэ фондата суох буолуоҔа, оччоҔуна Национальнай үтүө туруктаныы фондатын үбүн аһаан-сиэн барыахпыт.

Михаил Емельянов, Госдума судаарыстыбаннай тутууга уонна сокуону оҥорууга кэмитиэтин бэрэссэдээтэлин бастакы солбуйааччыта, «Сиэрдээх Россия» фракция:

– Бюджет үлэһиттэрин хам­наһыгар уонна пенсияларга, ол эбэтэр кризискэ кимнээҔэр да улаханнык оҔустарар нэһилиэнньэ араҥаларын өйөөһүҥҥэ кэмчилиир табыллыбат. Биһиги итиннэ кэмчилээбэтэхпитинэ, онон дьон атыылаһар кыаҔын көҔүлүөхпүт, туһааннааҔынан, экономика сайдыытын эмиэ. Оттон инфляцияҔа сыһыаннаан эттэххэ, бу үгүс өттүгэр валютаҔа үспүкүлээннии дьайыыларынан быһаарыллар. ВалютаҔа көдьүүстээх хонтуруолу киллэриэххэ – оччоҔуна ханнык да инфляция суох буолуоҔа.

Олег Казаковцев, Федерация Сэбиэтин бюджекка уонна финансовай ырыынактарга кэмитиэтин чилиэнэ:

– Барытыгар уонна мэлдьи кэмчилиэх тустаахпыт. Онуоха анаан ороскуоттары сарбыйар наадата суох, ол оннугар үбү-харчыны көдьүүстээхтик ороскуоттуохтаахпыт. Биһиги министиэристибэлэри кытта хардарыта үчүгэйдик үлэлээн, харчыны толкуйдаан ороскуоттууру ситиһиэхтээхпит. Итиниэхэ бөрүкүтэ суох быһаарыы быһыытынан, регионнарга анаан араас оҥорон таһаарааччылартан ыарахан сыаналаах томографтары атыылаһыыны, ол кэннэ кинилэр араас эбии тэриллэри атыылаһарга уонна өрөмүөннүүргэ, таҥарга күһэллибиттэрин өйдөөн кэлэбин. Ол оннугар сыананы үчүгэйдик түһэрэн уонна мэктиэлэммит көрүүнү-истиини хааччыйар биир атыылааччыны кытта сөбүлэһиэххэ баар этэ.

Алёна Аршинова, Госдума үөрэххэ уонна наукаҔа кэмитиэтин чилиэнэ, «Биир ньыгыл Россия» фракцията:

– Россия Федерациятын бюджета үөрэххэ кэмчилиирэ сатаммат. Бу экономикаҔа сүрүн үүнэр тирэх буолар. Ону таһынан, үөрэхтээһин сүнньүнэн биһиги гражданнарбыт уонна дойдубут аан дойдуга күрэстэһэр кыахтарын быһаарар. Кинини кытта наука – сайдыыны хамсатааччы быстыспат сибээстээх.

Михаил Терентьев, Госдума үлэҔэ, социальнай политикаҔа уонна ветераннар дьыалаларыгар кэмитиэтин бэрэссэдээтэлин солбуйааччыта, «Биир ньыгыл Россия» фракция:

– Биһиги бюджеппыт үөрэххэ уонна социальнай эйгэ сайдыытыгар, инбэлииттэргэ уонна пенсиялаахтарга көмөҔө кэмчилиирэ табыллыбат. Судаарыстыбабыт социальнай буоларынан, чуолаан ити уруттата тутуллуохтаах. Үөрэхтээһин инникитин дойду экономиката сайдыытыгар кыахтары биэрэр: күүстээх үөрэхтээһин баар буоллаҔына, биһиэхэ атын да суолталаах эйгэлэр үрдүк таһымнаах буолуохтара.

Гаджимет Сафаралиев, Госдума үөрэххэ уонна наукаҔа кэмитиэтин чилиэнэ, «Биир ньыгыл Россия» фракцията:

– Бастакытынан, социальнай боппуруостарга, иккиһинэн оборона ороскуоттарыгар кэмчилиир наадата суох. Биһиги бэйэбит саллааппытын аһаппат уонна таҥыннарбат буоллахпытына, атын дойду саллаатын таҥыннарыахпыт уонна аһатыахпыт. Бюджеты оҥорууга, бастакынан дьон уонна куттал суох буолуутун туһугар кыһаллыахтаахпыт.

Николай Харитонов, Госдума регион политикатыгар уонна Хоту сир, Уһук Илин проблемаларыгар кэмитиэтин бэрэссэдээтэлэ, РФКП фракцията:

– Доруобуйа харыстабылыгар, үөрэххэ, тыа хаһаайыстыбатыгар кэмчилиэ суохтаахпыт. Номнуо 25 сыл устатыгар тыа хаһаайыстыбатыгар бюджет ороскуоттаах чааһын 1 бырыһыаныттан ордубат үбэ ыытыллар. Гражданнары хаарбах олорор дьиэттэн көһөрүүгэ, иһэр уу проблемаларын быһаарыыга харчыны булуохтаахпыт.

Людмила Бокова, Федерация Сэбиэтин конституционнай сокуону оӨорууга уонна судаарыстыбаннай тутууга кэмитиэтин бэрэссэдээтэлин солбуйааччыта:

– Социальнай эйгэҔэ, доруобуйа харыстабылыгар уонна үөрэххэ кэмчилиир табыллыбат! Россия – социальнай судаарыстыба, ол иһин биһиги социальнай мэктиэлэри хааччыйыах тустаахпыт. Маныаха Резервэ фондатын толорууга эбии кыахтары көрдүөхтээхпит. Кини айылҔа ресурсаларын атыылааһын суотугар толоруллар этэ, ол эрээри бүгүн экономикаҔа үүнүү атын источниктара эмиэ бааллар, холобур, IT-технологиялары экспордааһын.