Салааларынан үөрэҕи үбүлээһин араастаһыыта күүһүрбүт

Түмүгэр парламентарийдар Россия Федерациятын Бырабыыталыстыбатын Бэрэссэдээтэлэ Д.А.Медве­девкэ Судаарыстыбаннай Дума аатыттан туһаайан этии оҥорор туһунан Уураах ылыннылар. Бу уураах толоруулаах былаас федеральнай уорганнарын дьаһалыгар баар үрдүк үөрэх тэрилтэлэригэр үөрэх үлэтин хааччыйыы боппуруоһугар сыһыаннаах.
Судаарыстыбаннай Дума депутаттара Россия үөрэҕин тиһигэр үрдүк үөрэх тэрилтэлэрин үбүлээһин араастаһыыта күүһүрбүтүттэн дьиксинэллэрин биллэрдилэр. Ити ордук тыа хаһаайыстыбатын, култуура уонна доруобуйа харыстабылын федеральнай министиэристибэлэрин дьаһалыгар баар үрдүк үөрэх тэрилтэлэрин таарыйар. Араастаһыы уонна үөрэх хаачыстыбата намтааһынын төрүөттэрин ырытыы көрдөрбүтүнэн, салааларынан биир үөрэнээччигэ суоттаан, федеральнай бюджет үбүн суотугар вузтары үбүлээһин 2 уонна онтон да элбэх төгүл арыттаһар.
Ол курдук, Доруобуйа харыстабылын министиэристибэтин 50-тан тахса ахсааннаах вузтарыгар хас биирдии устудьуоҥҥа 72 тыһыынча солкуобай кэриҥэ харчы ананар эбит буоллаҕына, Һөрэх министиэристибэтин итинник тэрилтэлэригэр – биир устудьуоҥҥа 170 тыһ. солк. ааҕыллар.
Үөһэ ыйыллар докумуон бастакы эрэдээксийэтигэр аграрнай вузтар туһунан эрэ этиллэрэ. Бу боппуруос суолталааҕын Судаарыстыбаннай Дума бэрэссэдээтэлэ Вячеслав Володин бэлиэтээтэ. Кини бу кыһалҕа, дьиҥэр, бары салаа вузтары таарыйарын эттэ уонна Дума туһааннаах кэмитиэттэрэ уураах барылын ситэрэллэригэр этии оҥордо.
Бюджекка уонна нолуоктарга кэмитиэт чилиэнэ Галина Данчикова дойду премьеригэр туһуланар сурукка докумуон бастакы барыйааныгар тыктарыллыбатах Спорт министиэристибэтин салаа вузтарын киллэрэргэ этии оҥордо. Саха Јрөспүүбүлүкэтин сиригэр-уотугар РФ Спорка министиэристибэтин дьаһалыгар баар үөрэх тэрилтэтинэн Чурапчытааҕы физическэй култуура уонна спорт судаарыстыбаннай института буолар.
Атын салаа вузтартан өрөспүүбүлүкэҕэ үрдүк үөрэхтээх үлэһиттэри Дьокуускайдааҕы тыа хаһаайыстыбатын судаарыстыбаннай академията – РФ Тыа хаһаайыстыбатыгар министиэристибэтин биэдэмистибэннэй үөрэҕин тэрилтэтэ, Арктикатааҕы култуура уонна искусство судаарыстыбаннай института – РФ култуураҕа министиэристибэтин үөрэҕин тэрилтэтэ бааллар.
— Үрдүк үөрэх хаачыстыбатын хааччыйыыга сыһыаннар хаттаан көрүллүөх тустаахтар, ол иһигэр үөрэх үлэтин үбүлээһин нуормаларын ааҕыы методиката, – диэн быһаарда Галина Данчикова. — бу олус суолталаах боппуруос биэдэмистибэлэр икки ардыларыгар көдьүүстээх хардарыта үлэни эрэйэр.
Депутат этэринэн, хаачыстыбалаах үөрэх биһиги уопсастыбабыт сайдыытын стратегическай тирэхтэриттэн биирдэстэрэ буолар, үрдүк үөрэх эйгэтигэр судаарыстыба ыытар бэлиитикэтэ кэлим уонна сүрүннэммит буолуохтаах.