УҺук Илиҥҥэ — иккис миэстэ

РФ быыбар киин хамыы­һыйатын дааннайдарынан, дойду үрдүнэн быыбардааччы 47,81% кыттыыны ылбыт. Бу Россия историятыгар саамай намыһах көрдөрүү буолла. Урукку өттүгэр саамай намыһах көрдөрүү 1993 сыллаахха – 54,81% этэ. 2011 сыллаахха – 60,21%, 2007 сыллаахха – 63,78%, 2003 сыллаахха – 55,75% киһи куоластаабыт.
Оттон Саха сиригэр быы­бардааччы 48,11% кытынна. Ити туһунан Саха сирин Быыбар киин хамыыһыйатын бэрэс­сэдээтэлэ Анатолий Кривошапкин иһитиннэрдэ. Анатолий Кривошапкин этэринэн, РФ атын субъектарыгар тэҥ­нээтэххэ, өрөспүүбүлүкэ быыбардааччы ахсааныгар куһаҕана суох түмүгү көрдөрдө. Уһук Илин регионугар Саха сирэ быыбарга кыттыыга иккис миэстэни ылла. Чукотка 59,35% ылан, инники күөҥҥэ таҕыста.

«Биир ньыгыл Арассыыйа» иһин быыбардааччы 46,42% куоластаабыт. Кини кэнниттэн «Сиэрдээх Арассыыйа» — 15,20%, РФКП — 14,35%, РЛДП – 10,70%. «Коммунисты России» (3,14%), «Российская партия пенсионеров за справедливость» (2,34%), «Родина» (1,56%), «Яблоко» (1,16%) биэс бы­рыһыаны куоһарбатахтар. Биир бырыһыаны куоһарбатах баартыйалар: «Зеленые» (0,82%), «Гражданская платформа» (0,82%), «Партия роста» (0,73%), «Парнас» (0,49%), «Патриоты России» (0,31%), «Гражданская сила» (0,16%).
Биир мандааттаах уокурукка «Сиэрдээх Арассыыйа» баар­тыйаттан Госдума дьокутаата Федот Тумусов — 41,03 %. Олег Тарасов — 20,45%, Петр Аммосов — 15,47 % Гаврил Парахин — 6,80% куолаһы ыллылар.
Саха сирин үрдүнэн быы­барга саамай актыыбынай кыттыыны Өлөөн улууһа (84%) ылла. Анаабырга — (83,5%), Горнай улууһугар — (77%).

Дьокуускай куоракка барыта 72 тыһ. киһи (38%) быыбарга кытынна.
Өрөспүүбүлүкэ үрдүнэн быыбар хамыыһыйаларыгар 7 тыһ. тахса киһи үлэлээтэ. 165 быыбардыыр учаастакка видео­наблюдение туруо­руллубута.
Быыбар күнүгэр өрөспүүбүүлкэ үрдүнэн 811 быыбар учаастага үлэлээтэ. Итиэннэ бу күн Булун, Эдьигээн уонна Нерюнгри улуустарыгар баһылыгы талар быыбар буолла.
Саха сирин Быыбар киин хамыыһыйатын бэрэссэдээтэлин солбуйааччы Ирина Конакова иһитиннэрбитинэн, Госдума быыбарын бэлэмнээһиҥҥэ уонна тэрийиигэ федеральнай бюджеттан уопсайа 13 млрд солк., Саха сиригэр – 245 мөл. солк. көрүллүбүт.
Бала±ан ыйын 18 кµнµгэр сарсыарда 8 чаастан бµтµн Россия µрдµнэн быыбар учаастактара µлэлэрин са±алаабыттара.

Дьокуускай куорат На­бережнай уокуругун олохтоохторо Л.А. Колосов аатынан 33 №-дээх орто оскуолатын дьиэтигэр баар 53/741 №-дээх учаастакка быыбардаатылар.
Быыбар, РФ сокуонугар сөп түбэһиннэрэн, булкаастаах систиэмэнэн барда. Быыбар­дааччылар, бартыыйынай испииһэк да иһин, эмиэ ол курдук биир мандааттаах уокуруктар ханьыдааттарыгар куоластарын биэрдилэр.
Күнүс 14:00 мүн. быыбар учаастагар утуу-субуу кэлии-ба­рыы. Нэһилиэнньэ быыбар суолтатын, оруолун өйдөөн, үөрэ-көтө кэлэн гражданскай иэстэрин өрө көтөҕүллүүлээхтик толордулар.
Судаарыстыбаннай Дуума дьо­кутааттарыгар куоластаан, дойдубут, өрөспүүбүлүкэбит бигэ туруктаахтык сайдар суолун талабыт.