Петербург кэрэ көстүүлэрэ

«Улуу куорат кырачаан худуоһунньуктарын быыстапката өссө ханнык да оскуолаҕа аһылла илигэ. Дьикти кэрэ быыстапка «Виртуальнай музей» бырайыак салайааччыта, начаалынай кылаас учуутала Тимофей Никитич Тимофеев тэрийиитинэн турда. Сыл анараа өттүгэр биһиги оскуолабыт Санкт-Петербург художественнай музейын филиалынан буолбута. Биһиги өрөспүүбүлүкэбитигэр маннык оскуолалар биэстэр эрэ. Тимофей Никитич өӨөтүнэн биһиги музей филиала буолбуппут», — диэн быыстапка аһыллыытыгар 33 №-дээх оскуола дириэктэрэ Тамара Семеновна Таюрская бэлиэтээтэ.

Кумааҕы холустаҕа Арассыыйа биир саамай кэрэ архитектурнай тутуулардаах Санкт-Петербург кэрэ көстүүлэрин оҕолор уруһуйдаабыттар. Петропавловскай кириэппэс, Адмиралтейство, «Медный всадник» пааматынньык, Дворцовай муоста, Александро-Невскай Лавра, Исакиевскай Собор, Дворцовай болуоссат  уонна да Санкт-Петербург атын сирдэрин «Виртуальный музей» диэн бырайыак иһинэн уруһуй куруһуогар сылдьар оҕолор ойуулаан ыыппыттар.

33№-дээх оскуолаҕа уруһуй устуудьуйатын салайааччыта Артур Громов быыстапка оҕо далааһыннаахтык толкуйдууругар көмөлөһөрүн бэлиэтээтэ. Кини үөрэтэр оҕолоругар туһаайан эттэ: «Ойдүүгүт дуо, сотору араас куораттар кэрэ көстүүлэрин бэйэҕит курдук уруһуйдуулларын сөбүлүүр оҕолор харахтарынан көрүөххүт диэбиппин. Тимофей Никитич бырайыагын көмөтүнэн биһиги Санкт-Петербург үөрэнээччилэрин кытары сибээстэстибит. Уруһуй линияларыгар, өҥнөр эгэлгэлэригэр болҕомтоҕутун уураарыҥ. Аны Дьокуускай куораты ойуулаабыккытын Санкт-Петербург биир эмит оскуолатыгар быыстапка гынан туруоруохпут», — диэтэ.

Дьокуускай куорат 33 №-дээх оскуолатын оҕолоругар анаан Санкт-Петербургтан 601 №-дээх оскуола «Виртуальный филиал Русский музей»  филиалын салайааччыта Татьяна  Анатольевна Бухоник видеонан уһулбут эҕэрдэтин тиэртилэр.  «Мин Судаарыстыбаннай Нуучча музейын таһыгар туран эрэ эһиэхэ, ыраах Саха сирин оҕолоругар эҕэрдэ ыытабын. Улуу Пушкин хоһоонунан «Друзья, прекрасен наш союз» диэн этэбин».

Быыстапка кэнниттэн оскуола иһинэн уруһуй устуудьуйатыгар сылдьар 4 «в» кылаас үөрэнээччитэ Вася Кокорев санаатын үллэһиннэ. «Мин бу быыстапкаҕа Исаакиевскай собор уонна «Аҕа дойду сэриитин кылаабынай кыргыһыылара» диэн каарта быһыытынан уруһуйдары сөбүлээтим. 9-10 саастаах оҕолор уруһуйдара диэтэххэ, олус үчүгэй! Биһигини учууталбыт Артур Николаевич өҥ эгэлгэтин сөпкө туһанарга үөрэтэр. 36 өҥнөөх кырааскалаахпын. Айылҕаны уруһуйдуурбун сөбүлүүбүн. Олүөнэ остуолбаларын уруһуйдаабытым. Главпочтамт ыыппыт куонкуруһугар «Ийэм мэтириэтэ» диэн уруһуйбунан сертификат ылбытым», — диэтэ.