28 августа 2015 в 19:06

Аан дойду рекордун олохтуур былааннаах

Атырдьах ыйын 22 күнүгэр Таатта улууһун киинигэр Ытык Күөлгэ Российскай Федерация Былааҕын уонна Физкультурник күннэригэр анаммыт уһун сиргэ сүүрүүнү пропагандалыыр сыаллаах күрэхтэһии буолла.

Сүүрүүгэ норуоттар икки ардыларынааҕы кылаастаах спорт маастара Семен Дедюкин 60 сааһыгар анаан 60 км, Саха сирин спордун маастара Василий Попов уонна Саха сирин спордун маастарыгар кандидат Владимир Находкин 55 саастарыгар анаан 55 км сүүрдүлэр.
Семен Дедюкин 60 биэрэстэ сири 4 чаас 43 мүнүүтэ 11 сөкүүндэнэн кэллэ.Владимир Находкин 55 км – 04:47:54, Василий Попов – 04:56:33 түмүктээтилэр.

Тэрийээччи Семен Дедюкин 50 км сүүрүүгэ үөлээннээхтэрин ортотугар аан дойду рекордун олохтуур былааннааҕын иһитиннэрдэ. Билигин 50 биэрэстэҕэ 60 саастаахтарга аан дойду рекордсменынан Германия быһыйа Эрвин Реммеле буолар, кини бириэмэтэ — 03:29:51.

СИА.