Андрей Борисов: «Бастаан культураны өйдүү үөрэниэхтээхпит»

Пекиҥҥэ Саха сирин культуратын күннэрэ гуманитарнай уонна культурнай суолталаах эрэ буолбатахтар, ону таһынан Россия Кытайы кытта экономикаҕа уонна политикаҕа сибээстэрэ сайдыытыгар кылааты киллэрэллэр, диэн СӨ Судаарыстыбаннай сүбэһитэ Андрей Борисов бэлиэтээтэ. «Политикаҕа уонна экономикаҕа сибээстэри олохтуох иннинэ, бастаан атын омук культуратын уонна искусствотын өйдүүргэ үөрэниэх­тээхпит. Бу Саха сирин культураҕа уонна духуобунай сайдыыга министиэристибэтин салалтатынан олоххо киирбит норуоттар икки ардыларынааҕы бырайыак суолтатын өйдөөн, өрөспүүбүлүкэ Ил Дархана Егор Борисов Кытай Народнай Өрөспүүбүлүкэтигэр Саха сирин культуратын Күннэрин ыытыы идеятын толору өйөөбүтэ», – диэн эттэ судаарыстыбаннай сүбэһит.
Өрөспүүбүлүкэ культуратын араас көрүҥэ билиһиннэриллэн, Кы­тай публикатын улахан сэҥээ­риитин ылла, культура уонна искусство эйгэтигэр салгыы бииргэ үлэлээһин суоллара торумнаннылар, аны Саха сиригэр Кытай культуратын Күннэрин ыытыы дьүүллэһиллэр, диэн бырайыак түмүктэрин туһунан Саха сирин культураҕа уонна духуобунай сайдыыга миниистирэ Владимир Тихонов иһитиннэрдэ. Миниистир бу улахан хабааннаах культура бырайыагын тэрийиигэ көмөтүн иһин өрөспүүбүлүкэ делегациятын салайааччытыгар – Ил Түмэн Бэрэссэдээтэлэ Александр Жирковка махталын тиэртэ. Маннык бөдөҥ бырайыак министиэристибэлэр, биэдэмистибэлэр, айар коллективтар түмсүүлээх үлэлэрэ суох кыаллыбат. Өрөспүүбүлүкэ культуратын Күннэригэр барыта 336 киһи кыттыбыта.
Өрөспүүбүлүкэ Культуратын күннэрин кэмигэр Д.К.Сивцев – Суорун Омоллоон аатынан Судаарыстыбаннай Опера уонна балет театрын солистарын толорууларыгар Александр Бородин «Игорь кинээс» оператын премьерата улахан ситиһиилээхтик буолан ааста. Саха сирин оператын артыыстарын таһынан испэктээкилгэ Мариинскай театр, Луганскайдааҕы филармония уонна да атын Россия сүрүн театрдарын солистара ыҥырыллан кыттыбыттара. Бу опера премьерата Дьокуускайга 2016 сыл олунньутугар буолуоҕа.
Сүрүн партиялары Д.К.Сивцев – Суорун Омоллоон аатынан Опера уонна балет театрын солистара: СӨ үтүөлээх артыыһа Юрий Баишев (Игорь кинээс), норуоттар икки ардыларынааҕы куонкурустар лауреаттара Прасковья Герасимова (Ярославна), Руслан Буханцев (кинээс Владимир Галицкай), СӨ үтүөлээх артыыһа Николай Попов (кинээс уола Владимир Игоревич), норуоттар икки ардыларынааҕы куонкурустар лауреаттара Людмила Кузьмина (Кончаковна), Кончак хан партиятын Мариинскай театр солиһа, Башкортостан народнай артыыһа Аскар Абдразаков толордулар.

Дмитрий ОСИПОВ.