«Азия оҕолоро» спорт оонньууларыгар интэриэс улахан

Ил Дархан дойду салалтата уонна Азия Олимпийскай сэбиэтэ ити оонньууларга улахан болҕомтону ууралларын иһитиннэрдэ. «Биһиги бырайыакпытыгар улахан эрэли сүктэрэллэр, кини салгыы сайдыытыгар саҥа саҕахтар арыллаллар. Онон биһиги оонньуулары үрдүк таһымнаахтык тэрийэн ыытыахтаахпыт», — диэн, Егор Борисов бу тэрээһин регион социальнай-экономическай сайдыытыгар уонна инвестицияны тардыыга улахан оруолун бэлиэтээтэ.
Манан сибээстээн Саха сирин баһылыга коллегаларыттан бырайыагы норуоттар икки ардыларынааҕы таһымҥа таһаарыы туһунан иһитиннэрэллэригэр көрдөстө. VI Норуоттар икки ардыла­рынааҕы «Азия оҕолоро» спортивнай оонньуулары Ашхабадка Азия Олимпийскай сэбиэтин (ОСА) Генеральнай ассамблеятыгар ситиһиилээхтик билиһиннэрбиттэр, онно кэтээччи быһыытынан Океания дойдуларын бэрэстэбиитэллэрэ эмиэ кыттыбыттар. Чуолаан, бүгүҥҥү күҥҥэ Филиппины уонна Новая Зеландия дойдуларын интэриэстэрэ улахан.
Россия омук дойдуларын министиэристибэтигэр спортивнай күрэхтэһиилэр географияларын кэҥэтиини, омук дойдулара муҥутуур ахсаанынан кыттыыларыгар усулуобуйаны үөскэтиини тоҕоостооҕунан ааҕаллар. Манна сыһыаннаан ОСА президенэ Шейх Ахмад Аль-Фахад Аль-Сабах тус өйөбүлэ улахан суолтаны ылар, кини физкультура уонна спорт эйгэтигэр политика кыттыһыытын сорунуулаахтык утарар. Тэрийэр кэмитиэт бэрэстэбиитэллэрэ иһитиннэрбиттэринэн, «Азия оонньууларыгар» кыттар туһунан барыллааһын сайаапкалар 2016 сыл тохсунньу 1 күнүттэн киириэхтэрэ. 40-тан аҕыйаҕа суох дойду кыттара күүтүллэр, кинилэртэн сорохторугар ОСА өттүттэн көмө оҥоһуллуоҕа.
Россия регионнарыгар эмиэ «Азия оонньууларыгар» интэриэс үрдүк. Федеральнай уокуруктарга РФ Президенин боломуочуйалаах бэрэстэбиитэллэрин хонтуруолунан хамаандалары сүүмэрдээһин барар, кинилэр оонньуулар хаһаайыннарын кытта күрэстэһэр, күүстээхтэн күүстээхтэри мунньар соруктаахтар.
Иһитиннэриини сибидиэнньэҕэ ылан баран, Егор Борисов оонньуулары тэрийиигэ интэриэстээх өрүттэри түмүүгэ туһаайыллыахтаах РФ Бырабыыталыстыбатын таһымыгар быһаарыы барылын бэлэмнииргэ сорудахтаата. Саха сирин баһылыга омук дойдуларыттан судьуйалары киэҥник тардыы наадатын ыйда. Норуоттар икки ардыларынааҕы кылаастаах спортивнай инвентары уонна тэриллэри атыылаһыыга техническэй сорудаҕы хаачыстыбалаахтык оҥорууга анал хамыыһыйа тэриллиэҕэ.
Мунньахха «Азия оҕолоро» оонньуулар ыалдьыттарын уонна кыттыылаахтарын олордуу уонна аһатыы, «Туймаада» стадиону кэҥэтии боппуруостара көрүлүннүлэр.
Өрөспүүбүлүкэ баһылыга киин куораты тупсарыы боппуруостарыгар туспа мунньаҕы ыытарга сорудахтаата.